Elm aparıcı qüvvədir, onu millətin rifahına yönəltmək lazımdır

Bakı:

23 °C

56 %

6 m/s

Əlaqə

AZ RU EN

Ana səhifə / Arxiv / Elm aparıcı qüvvədir, onu millətin rifahına yönəltmək lazımdır

Elm aparıcı qüvvədir, onu millətin rifahına yönəltmək lazımdır

05.11.2025 [16:52]

Cari ilin noyabr ayının 3-də Azərbaycan Milli Elmlər Akademiyasının 80 illik yubileyi münasibətilə keçirilən mərasimdə Azərbaycan Respublikasının Prezidenti cənab İlham Əliyev çıxış etmişdir.

Dövlət başçısının çıxışı həm ölkə elminin tarixi inkişaf yoluna nəzər salmaq, həm də gələcək istiqamətləri müəyyənləşdirmək baxımından xüsusi əhəmiyyət kəsb edir.

Möhtərəm Prezident çıxışında qeyd etmişdir ki, Azərbaycan Milli Elmlər Akademiyası 80 il ərzində ölkənin elmi və intellektual potensialının formalaşmasında mühüm rol oynayıb. Həm sovet dövründə, həm də müstəqillik illərində Akademiya elmi kadrların yetişdirilməsi, fundamental və tətbiqi tədqiqatların aparılması, milli maraqlara xidmət edən elmi istiqamətlərin inkişafı sahəsində böyük nailiyyətlər qazanıb. Ölkə başcısı vurğulayıb ki, bu gün Akademiya müasir dövrün tələblərinə uyğun fəaliyyət göstərməli, elmi nailiyyətlərini ölkənin sosial-iqtisadi inkişafına yönəltməlidir.

Cənab Prezident çıxışında son illərdə elm sahəsinə dövlət tərəfindən göstərilən diqqət və qayğının əhəmiyyətini də xüsusi vurğuladı. O bildirdi ki, son on ildə elmə ayrılan vəsait iki dəfədən çox artıb, elmi müəssisələrin infrastrukturunun yenilənməsi, laboratoriyaların müasir avadanlıqlarla təmin edilməsi istiqamətində mühüm addımlar atılıb. Dövlətimizin Rəhbəri qeyd etdi ki, bu islahatların məqsədi Azərbaycan elmini beynəlxalq səviyyədə rəqabətqabiliyyətli etmək, gənc alimlərin fəaliyyətini stimullaşdırmaq və elmi nəticələrin praktik tətbiqini genişləndirməkdir.

Dövlət başçısı süni intellekt, rəqəmsal texnologiyalar və innovasiyalar sahəsində aparılan işlərə xüsusi diqqət yetirdi. O bildirdi ki, müasir dünyada ölkələrin inkişafı bilik və texnologiyalara əsaslanır, buna görə də Azərbaycan elmi bu istiqamətdə daha fəal olmalıdır. Cənab Prezident alimlərə çağırış edərək qeyd etdi ki, tədqiqatlar real iqtisadi və sosial problemlərin həllinə yönəldilməli, elmi nəticələr istehsalat, kənd təsərrüfatı, enerji və təhlükəsizlik sahələrində tətbiq edilməlidir.

Möhtərəm Prezident İlham Əliyev çıxışının sonunda vurğuladı ki, təbii resurslar ölkə üçün vacib olsa da, əsas dayanıqlı inkişaf mənbəyi insan kapitalı və elmdir. Elmə qoyulan sərmayə gələcəyin təminatıdır. Prezident əminliklə bildirdi ki, Azərbaycan alimləri bundan sonra da ölkənin inkişafına, elmin tərəqqisinə və xalqın rifahına öz töhfələrini verəcəklər.

Bu çıxış bir daha göstərdi ki, dövlət səviyyəsində elmə verilən dəyər Azərbaycanın gələcək strateji inkişaf kursunun əsas istiqamətlərindən biridir. Elm, texnologiya və innovasiya ölkənin modernləşməsində aparıcı qüvvə kimi dəyərləndirilir. Prezident İlham Əliyevin sözləri ilə desək, “elm aparıcı qüvvədir və onu millətin rifahına yönəltmək hər birimizin borcudur.”

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 495 dəfə