Azərbaycanın enerji strategiyası yeni mərhələdə

Bakı:

13 °C

94 %

6 m/s

Əlaqə

AZ RU EN

Ana səhifə / Arxiv / Azərbaycanın enerji strategiyası yeni mərhələdə

Azərbaycanın enerji strategiyası yeni mərhələdə

05.03.2026 [22:31]

Səyyad Mirzəyev

YAP Ağdam rayon təşkilatının əməkdaşı

Azərbaycan Respublikasının Prezidenti cənab İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclaslarında iştirak edib. Tədbirlər Azərbaycanın enerji diplomatiyasının və beynəlxalq enerji təhlükəsizliyinə verdiyi töhfənin növbəti dəfə nümayişidir. Cənab Prezident çıxışında bildirib ki, Azərbaycan təşəbbüskarı və aparıcı iştirakçısı olduğu Cənub Qaz Dəhlizi vasitəsilə Avropanın enerji təhlükəsizliyində mühüm rol oynayır. Qeyd olunub ki, bu layihə təkcə enerji infrastrukturu deyil, eyni zamanda ölkələr arasında strateji tərəfdaşlığın möhkəmlənməsinə xidmət edən platformadır. Dövlət başçısı vurğulayıb ki, Azərbaycan etibarlı tərəfdaş kimi üzərinə götürdüyü bütün öhdəlikləri vaxtında və yüksək keyfiyyətlə yerinə yetirib.

İclasda çıxış edən Prezident İlham Əliyev enerji marşrutlarının şaxələndirilməsinin əhəmiyyətini xüsusi qeyd edərək, Cənub Qaz Dəhlizinin genişləndirilməsi, yeni bazarlara çıxış imkanlarının artırılması və qarşılıqlı faydalı əməkdaşlığın davam etdirilməsinin vacibliyini diqqətə çatdırıb. Yaşıl Enerji Məşvərət Şurası çərçivəsində keçirilən 4-cü iclasda Azərbaycan Respublikasının bərpaolunan enerji sahəsində həyata keçirdiyi layihələr, Xəzər dənizinin külək enerjisi potensialı və “yaşıl keçid” strategiyası barədə ətraflı məlumat verilib. Dövlət başçısı bildirdi ki, ölkəmiz bərpa olunan enerji resurslarının inkişafı istiqamətində böyük potensiala malikdir və bu potensialın reallaşdırılması üçün genişmiqyaslı layihələr həyata keçirilir. Cənab Prezident qeyd etdi ki, ki, xüsusilə Qarabağ və Şərqi Zəngəzur iqtisadi rayonlarının “yaşıl enerji zonası” elan edilməsi bu istiqamətdə atılan mühüm addımlardan biridir. Azərbaycan külək, günəş və digər bərpa olunan enerji mənbələri hesabına enerji istehsalını artırmaqla həm daxili tələbatı ödəməyi, həm də gələcəkdə yaşıl enerjinin ixracını həyata keçirməyi hədəfləyir. Cənab Prezident vurğuladı ki, Azərbaycanın enerji siyasəti balanslı yanaşmaya əsaslanır: bir tərəfdən ənənəvi enerji resurslarının səmərəli istifadəsi təmin edilir, digər tərəfdən isə bərpa olunan enerji mənbələrinin inkişafı prioritet istiqamət kimi müəyyənləşdirilir. Bu yanaşma Azərbaycanın qlobal enerji keçidi prosesində fəal iştirakını təmin edir.

Prezident qeyd edib ki, Azərbaycan ənənəvi enerji resursları ilə yanaşı, yaşıl enerjinin istehsalı və ixracı istiqamətində də mühüm addımlar atır. Bu, ölkənin uzunmüddətli dayanıqlı inkişaf strategiyasının əsas prioritetlərindən biridir.

Dövlət başçısı qeyd edib ki, enerji təhlükəsizliyi artıq milli təhlükəsizliyin ayrılmaz hissəsinə çevrilib və bu sahədə beynəlxalq əməkdaşlıq qarşılıqlı etimada əsaslanmalıdır. Azərbaycanın təşəbbüsləri həm regional, həm də qlobal enerji bazarında sabitliyə töhfə verir.

Azərbaycan Respublikasının Prezidenti cənab İlham Əliyevin sözügedən iclaslarda iştirakı Azərbaycanın enerji siyasətinin ardıcıl və strateji xarakter daşıdığını, ölkənin həm ənənəvi, həm də bərpaolunan enerji sahəsində etibarlı tərəfdaş kimi mövqeyini daha da möhkəmləndirdiyini bir daha təsdiq edir.

Paylaş:

Baxılıb: 346 dəfə