Dövlətlərarası əlaqələrin qarantı

Bakı:

10 °C

81 %

6 m/s

Əlaqə

AZ RU EN

Ana səhifə / Arxiv / Dövlətlərarası əlaqələrin qarantı

Dövlətlərarası əlaqələrin qarantı

27.04.2026 [09:23]

Müasir beynəlxalq münasibətlər sisteminin mürəkkəb və dinamik xarakter aldığı bir dövrdə Azərbaycan və Ukrayna arasındakı əlaqələr sadəcə rəsmi diplomatik protokol çərçivəsini çoxdan aşmışdır. Bu münasibətlər bu gün hər iki dövlətin milli maraqlarının kəsişdiyi, qarşılıqlı etimada əsaslanan və zamanın ən çətin sınaqlarından uğurla keçmiş dərin strateji tərəfdaşlıq xarakteri daşıyır. Xüsusilə son dörd il ərzində dövlət başçıları səviyyəsində reallaşan yeddi yüksək səviyyəli görüş bu diplomatik dinamikanın nə qədər intensiv və məqsədyönlü olduğunun ən bariz göstəricisidir. Prezident İlham Əliyev və Prezident Volodimir Zelenski arasındakı səmimi şəxsi münasibətlər, liderlər arasındakı yüksək etimad mühiti dövlətlərarası əlaqələrin ən möhkəm qarantı rolunda çıxış edir.

Bu strateji tərəfdaşlığın sarsılmaz təməlini hər iki ölkənin bir-birinin ərazi bütövlüyü və suverenliyi prinsiplərinə olan dəyişməz sadiqliyi təşkil edir. Azərbaycan və Ukrayna beynəlxalq hüququn bu fundamental prinsiplərini bütün beynəlxalq platformalarda tərəddüdsüz şəkildə müdafiə edirlər. Bu prinsipial mövqe təkcə ikitərəfli maraqlara deyil, həm də qlobal təhlükəsizlik arxitekturasının qorunmasına xidmət edir. Liderlərin müntəzəm təmasları regional çağırışlara qarşı çevik qərarların verilməsinə, habelə geosiyasi risklərin minimuma endirilməsinə şərait yaradır.

İqtisadi müstəvidə əldə olunan nəticələr siyasi iradənin praktiki müstəviyə uğurla transfer edildiyini sübut edir. İki ölkə arasındakı ticarət dövriyyəsinin yarım milyard dolları keçməsi iqtisadi əməkdaşlığın potensialından xəbər verir. Xüsusilə enerji sektorunda SOCAR-ın Ukraynadakı çoxşaxəli və uğurlu fəaliyyəti bu münasibətlərin strateji əhəmiyyətini daha da artırır. SOCAR təkcə iqtisadi dividend qazanan bir şirkət deyil, həm də Ukraynanın enerji təhlükəsizliyinin təmin olunmasında mühüm rol oynayan etibarlı tərəfdaş kimi qəbul edilir. Eyni zamanda, kənd təsərrüfatı, nəqliyyat-logistika və rəqəmsal texnologiyalar sahəsindəki layihələr iqtisadi bağları daha da şaxələndirir.

Azərbaycanın Ukraynaya göstərdiyi humanitar yardımlar və enerji infrastrukturunun bərpası üçün verdiyi dəstək iki xalq arasındakı tarixi dostluğun ən real və humanist təzahürüdür. Müharibənin gətirdiyi çətinliklər fonunda Azərbaycanın Ukrayna xalqının yanında olması, xüsusilə qış aylarında enerji təchizatının dayanıqlılığı üçün göndərdiyi texniki avadanlıqlar rəsmi Bakının sadiq və etibarlı dost olduğunun sübutudur. Ukrayna rəhbərliyinin Azərbaycanın vasitəçilik potensialına olan yüksək inamı və rəsmi Bakının təklif etdiyi sülh platformalarına verdiyi önəm Azərbaycanın beynəlxalq nüfuzunun və diplomatik gücünün təsdiqidir.

Qəbələ bəyanatları və əldə olunmuş razılaşmalar bir daha nümayiş etdirdi ki, hər iki dövlət regional təhlükəsizlik, nəqliyyat dəhlizlərinin inkişafı və iqtisadi inteqrasiya məsələlərinə eyni strateji prizmadan baxır. Azərbaycanın təşəbbüskarı olduğu nəqliyyat layihələri Ukrayna üçün Avropa və Asiya arasında mühüm tranzit imkanları vəd edir.

Azərbaycan və Ukrayna arasındakı bu mütəmadi və yüksək səviyyəli təmaslar sınaqlardan uğurla çıxmış sarsılmaz bir model formalaşdırmışdır. Bu strateji tərəfdaşlıq təkcə bugünkü ehtiyaclara cavab vermir, həm də gələcəyə hədəflənən, uzunmüddətli və sabit inkişafı nəzərdə tutan bir perspektiv vəd edir.

Əlişah Rəcəbov
YAP Ağdaş rayon təşkilatının sədri

Paylaş:

Baxılıb: 143 dəfə