Prezident İlham Əliyevin “Avropa Siyasi Birliyi”nin 8-ci Zirvə toplantısında çıxışı: Azərbaycanın regional liderlik mövqeyinin növbəti nümayişi

Bakı:

22 °C

75 %

4 m/s

AZ RU EN

Ana səhifə / Arxiv / Prezident İlham Əliyevin “Avropa Siyasi Birliyi”nin 8-ci Zirvə toplantısında çıxışı: Azərbaycanın regional liderlik mövqeyinin növbəti nümayişi

Prezident İlham Əliyevin “Avropa Siyasi Birliyi”nin 8-ci Zirvə toplantısında çıxışı: Azərbaycanın regional liderlik mövqeyinin növbəti nümayişi

08.05.2026 [16:43]

2026-cı il mayın 4-də Prezident İlham Əliyev “Avropa Siyasi Birliyi”nin 8-ci Zirvə toplantısında videobağlantı formatında çıxış edərək Azərbaycanın regional siyasətdə artan rolunu, sülh təşəbbüslərini və Avropa ilə əməkdaşlıq istiqamətində strateji baxışını bir daha ortaya qoydu. Ermənistanın paytaxtı İrəvanda keçirilən bu toplantı həm siyasi, həm də geosiyasi baxımdan xüsusi əhəmiyyət daşıyırdı. Prezidentin çıxışı isə regionda yeni reallıqların formalaşdığını açıq şəkildə nümayiş etdirdi.

İlham Əliyev çıxışında ilk növbədə Azərbaycan ilə Ermənistan arasında münasibətlərin normallaşdırılması prosesinə toxundu. Dövlət başçısı vurğuladı ki, uzun illər davam edən münaqişədən sonra Cənubi Qafqazda davamlı sülh üçün real imkan yaranıb. Azərbaycanın sülh müqaviləsinin imzalanmasına sadiq qaldığını bildirən Prezident qeyd etdi ki, Bakı regionda sabitlik və əməkdaşlıq mühitinin formalaşmasında maraqlıdır. Bu mesaj Azərbaycanın yalnız hərbi-siyasi qələbə qazanan dövlət deyil, eyni zamanda regionun gələcəyini düşünən məsuliyyətli aktor olduğunu göstərdi.

Prezidentin çıxışında diqqət çəkən mühüm məqamlardan biri regional kommunikasiyaların açılması ilə bağlı idi. İlham Əliyev nəqliyyat və iqtisadi əlaqələrin bərpasının bütün region ölkələri üçün yeni imkanlar yaradacağını bildirdi. Bu, xüsusilə Orta Dəhlizin əhəmiyyətinin artdığı bir dövrdə Azərbaycanın tranzit və logistika mərkəzi kimi rolunu daha da gücləndirir. Dövlət başçısının fikirləri göstərdi ki, Bakı regionu qarşıdurma məkanından əməkdaşlıq platformasına çevirmək niyyətindədir.
Çıxış zamanı Azərbaycanın beynəlxalq nüfuzunun artdığını göstərən mühüm məqamlardan biri də ölkəmizin 2028-ci ildə “Avropa Siyasi Birliyi”nin Zirvə toplantısına ev sahibliyi edəcəyinin elan olunması oldu. Bu qərar Azərbaycanın Avropa siyasi məkanında etibarlı tərəfdaş kimi qəbul olunduğunu göstərir. Xüsusilə Ermənistanın da bu namizədliyi dəstəkləməsi regionda yeni siyasi atmosferin formalaşdığını göstərən vacib siyasi mesaj hesab edilə bilər.
Prezident İlham Əliyev çıxışında bəzi Avropa institutlarının Azərbaycana münasibətdə nümayiş etdirdiyi ikili standartlara da toxundu. Dövlət başçısı vurğuladı ki, Azərbaycanın ərazi bütövlüyünün və suverenliyinin təmin olunması beynəlxalq hüququn norma və prinsiplərinə tam uyğundur. Buna baxmayaraq, müəyyən dairələrin Azərbaycana qarşı qərəzli mövqe nümayiş etdirməsi qəbuledilməzdir. Prezidentin bu mesajı Azərbaycanın milli maraqlar məsələsində prinsipial mövqeyindən geri çəkilmədiyini bir daha nümayiş etdirdi.

İlham Əliyevin çıxışı həm də Azərbaycanın enerji təhlükəsizliyi sahəsində Avropa üçün strateji tərəfdaş olduğunu bir daha xatırlatdı. Hazırda Azərbaycan Avropanın enerji təhlükəsizliyində mühüm rol oynayan əsas ölkələrdən biridir. Enerji resurslarının şaxələndirilməsi fonunda Azərbaycanın etibarlı tərəfdaş kimi rolu daha da artır və bu, ölkəmizin geosiyasi əhəmiyyətini gücləndirir.

Ümumilikdə, Prezident İlham Əliyevin “Avropa Siyasi Birliyi”nin 8-ci Zirvə toplantısındakı çıxışı Azərbaycanın müasir beynəlxalq münasibətlər sistemində artan siyasi çəkisinin və strateji mövqeyinin göstəricisi oldu. Dövlət başçısının verdiyi mesajlar göstərdi ki, Azərbaycan regionda sülhün, əməkdaşlığın və inkişafın əsas təşəbbüskarlarından biridir. Bu çıxış həm ölkənin milli maraqlarının müdafiəsi, həm də Cənubi Qafqazın gələcək siyasi arxitekturasının formalaşdırılması baxımından mühüm siyasi hadisə kimi qiymətləndirilə bilər.

Ziya Paşayev

YAP İmişli rayon təşkilatı Aparatının məsləhətçisi

Paylaş:

Baxılıb: 251 dəfə