26 İyun – Azərbaycan Silahlı Qüvvələri Günü: Güclü ordunun şanlı yoluna baxış

Bakı:

22 °C

75 %

4 m/s

Əlaqə

AZ RU EN

Ana səhifə / Arxiv / 26 İyun – Azərbaycan Silahlı Qüvvələri Günü: Güclü ordunun şanlı yoluna baxış

26 İyun – Azərbaycan Silahlı Qüvvələri Günü: Güclü ordunun şanlı yoluna baxış

24.06.2026 [12:51]

Hər il iyunun 26-sı Azərbaycanda Silahlı Qüvvələr Günü kimi qeyd olunur. Bu əlamətdar tarix ölkəmizin müstəqilliyinin, dövlətçiliyinin və milli təhlükəsizliyinin əsas təminatçısı olan Azərbaycan Ordusunun keçdiyi şərəfli yolu xatırlamaq, hərbçilərimizin xidmətini yüksək qiymətləndirmək baxımından xüsusi əhəmiyyət daşıyır.

Azərbaycan Xalq Cümhuriyyətinin 1918-ci il iyunun 26-da ilk nizami hərbi hissənin yaradılması barədə qərar qəbul etməsi milli ordumuzun formalaşmasının başlanğıcı hesab olunur. Məhz buna görə də bu tarix müasir Azərbaycan Silahlı Qüvvələrinin yaranma günü kimi qeyd edilir.

Müstəqilliyin ilk illərində ölkədə hökm sürən siyasi və iqtisadi çətinliklər ordu quruculuğuna da mənfi təsir göstərirdi. Lakin Ümummilli Lider Heydər Əliyev hakimiyyətə qayıtdıqdan sonra dövlət quruculuğu ilə yanaşı, güclü və peşəkar ordunun formalaşdırılması istiqamətində mühüm addımlar atıldı. Heydər Əliyevin rəhbərliyi ilə ordu quruculuğu dövlət siyasətinin əsas prioritetlərindən birinə çevrildi, hərbi hissələrin maddi-texniki bazası gücləndirildi, peşəkar kadr hazırlığına xüsusi diqqət yetirildi. Onun müəyyən etdiyi strateji kurs Azərbaycan Ordusunun gələcək inkişafının möhkəm təməlini yaratdı.

Bu siyasət bu gün Prezident, Ali Baş Komandan cənab İlham Əliyev tərəfindən uğurla davam etdirilir. Son illərdə həyata keçirilən islahatlar nəticəsində Azərbaycan Ordusu regionun ən güclü silahlı qüvvələrindən birinə çevrilib. Ordumuzun maddi-texniki təminatı müasir silah və texnika ilə gücləndirilib, hərbi qulluqçuların sosial rifahının yaxşılaşdırılması istiqamətində mühüm addımlar atılıb.

Azərbaycan Ordusunun gücü və peşəkarlığı xüsusilə 2020-ci ildə baş vermiş 44 günlük Vətən müharibəsində özünü göstərdi. Prezident, Ali Baş Komandan İlham Əliyevin rəhbərliyi altında Azərbaycan Ordusu tarixi qələbə qazanaraq ölkənin ərazi bütövlüyünün bərpasını təmin etdi. Bu Zəfər xalqımızın milli qürur mənbəyinə çevrildi və Azərbaycan hərb tarixində yeni bir səhifə açdı.

Bu gün Azərbaycan Silahlı Qüvvələri dövlətimizin suverenliyinin, sərhədlərimizin toxunulmazlığının və xalqımızın təhlükəsizliyinin etibarlı təminatçısıdır. Ordumuzun əldə etdiyi uğurlar göstərir ki, Heydər Əliyevin əsasını qoyduğu və İlham Əliyevin uğurla davam etdirdiyi ordu quruculuğu siyasəti Azərbaycanın hərbi qüdrətini daha da artırır.

26 İyun – Silahlı Qüvvələr Günü münasibətilə bütün hərbi qulluqçularımızı, veteranlarımızı və Azərbaycan Ordusunun inkişafında əməyi olan hər kəsi təbrik edir, Vətənimizin keşiyində dayanan qəhrəman əsgər və zabitlərimizə uğurlar arzulayırıq. Güclü dövlətin əsas dayaqlarından biri olan güclü Azərbaycan Ordusu xalqımızın qürur mənbəyi olaraq bundan sonra da ölkəmizin təhlükəsizliyini layiqincə qoruyacaq.

Bayramınız mübarək olsun!

Mirnəsib Kazımov

YAP Biləsuvar rayon təşkilatı 6 saylı şəhər ərazi partiya təşkilatının sədri

Paylaş:

Baxılıb: 114 dəfə