Azərbaycan–Avropa İttifaqı əməkdaşlığında yeni strateji mərhələ: Bakı görüşünün beynəlxalq əhəmiyyəti

Bakı:

25 °C

65 %

12 m/s

AZ RU EN

Ana səhifə / Arxiv / Azərbaycan–Avropa İttifaqı əməkdaşlığında yeni strateji mərhələ: Bakı görüşünün beynəlxalq əhəmiyyəti

Azərbaycan–Avropa İttifaqı əməkdaşlığında yeni strateji mərhələ: Bakı görüşünün beynəlxalq əhəmiyyəti

07.07.2026 [14:04]

Müasir beynəlxalq münasibətlər sistemində baş verən geosiyasi dəyişikliklər dövlətlərarası əməkdaşlığın məzmununa yeni yanaşmalar formalaşdırır. Qlobal enerji təhlükəsizliyi, nəqliyyat-kommunikasiya əlaqələrinin inkişafı, regional sabitliyin təmin olunması və iqtisadi inteqrasiyanın genişlənməsi dövlətlərin xarici siyasət gündəliyində mühüm yer tutur. Belə bir şəraitdə Azərbaycan Respublikasının həyata keçirdiyi müstəqil və milli maraqlara əsaslanan xarici siyasət ölkənin beynəlxalq mövqeyinin daha da möhkəmlənməsinə, etibarlı tərəfdaş kimi nüfuzunun artmasına və regional əməkdaşlıq proseslərində rolunun güclənməsinə xidmət edir.

Bu baxımdan, 1 iyul 2026-cı il tarixində Bakıda Azərbaycan Respublikasının Prezidenti İlham Əliyev ilə Avropa Komissiyasının Prezidenti Ursula Fon der Lyayen arasında keçirilmiş görüş və mətbuata verilmiş bəyanatlar Azərbaycan–Avropa İttifaqı münasibətlərinin inkişafında mühüm siyasi hadisə kimi dəyərləndirilə bilər. Görüş çərçivəsində aparılan müzakirələr göstərdi ki, tərəflər arasında formalaşmış əməkdaşlıq qarşılıqlı etimad və strateji maraqlar əsasında yeni inkişaf mərhələsinə qədəm qoymuşdur.

Prezident İlham Əliyev çıxışında Avropa Komissiyasının Prezidentini Azərbaycanda salamlamaqdan məmnunluğunu ifadə edərək, son illərdə qarşılıqlı təmasların intensiv xarakter aldığını vurğulamışdır. Dövlət başçısı qeyd etmişdir ki, yüksək səviyyəli dialoqun davamlı xarakter alması Azərbaycan ilə Avropa İttifaqı arasında münasibətlərin dinamik inkişafını və qarşılıqlı siyasi etimadın möhkəmləndiyini nümayiş etdirir. Bu yanaşma tərəflərin əməkdaşlığın perspektivlərinə verdiyi əhəmiyyətin göstəricisi olmaqla yanaşı, mövcud tərəfdaşlığın institusional əsaslarının daha da gücləndiyini təsdiqləyir.

Beynəlxalq münasibətlər sistemində etibarlı tərəfdaş anlayışı yalnız iqtisadi əlaqələrin həcmi ilə müəyyən olunmur. Dövlətlər arasında siyasi etimad, beynəlxalq hüququn norma və prinsiplərinə hörmət, üzərinə götürülən öhdəliklərin yerinə yetirilməsi və uzunmüddətli əməkdaşlıq iradəsi də bu münasibətlərin əsas göstəricilərindəndir. Azərbaycan son illərdə həyata keçirdiyi ardıcıl siyasətlə məhz bu keyfiyyətləri nümayiş etdirərək Avropa İttifaqı ilə münasibətlərini qarşılıqlı faydalı əməkdaşlıq prinsipləri əsasında inkişaf etdirmişdir.

Görüş zamanı regional təhlükəsizlik məsələləri xüsusi diqqət mərkəzində olmuşdur. Prezident İlham Əliyev Cənubi Qafqazda sülhün təmin olunmasının və regionda yeni əməkdaşlıq mühitinin formalaşdırılmasının əsas prioritetlərdən biri olduğunu qeyd etmişdir. Dövlət başçısı Azərbaycanın bölgədə davamlı sabitliyin bərqərar olması istiqamətində ardıcıl səylər göstərdiyini vurğulamış, müharibədən sonrakı dövrdə yaranmış yeni reallıqların əməkdaşlıq üçün geniş imkanlar yaratdığını bildirmişdir.

Azərbaycanın mövqeyi ondan ibarətdir ki, regionda dayanıqlı sülh yalnız beynəlxalq hüququn norma və prinsiplərinə hörmət, dövlətlərin suverenliyinin tanınması və qarşılıqlı etimadın möhkəmləndirilməsi əsasında mümkündür. Bu yanaşma ölkənin xarici siyasət kursunun əsas istiqamətlərindən biri olmaqla yanaşı, regional əməkdaşlığın genişlənməsi üçün də mühüm zəmin yaradır.

Prezident İlham Əliyev çıxışında Avropa Komissiyasının sülh prosesinə verdiyi dəstəyi yüksək qiymətləndirmişdir. Bu mövqe göstərir ki, Azərbaycan beynəlxalq tərəfdaşlarla münasibətlərdə qarşılıqlı hörmət və konstruktiv dialoq prinsipini əsas götürür. Azərbaycanın təşəbbüsləri regionda qarşıdurma mühitinin aradan qaldırılmasına, iqtisadi əməkdaşlığın genişləndirilməsinə və kommunikasiyaların bərpasına xidmət edir. Bu istiqamətdə həyata keçirilən siyasət təkcə region dövlətləri üçün deyil, həm də Avropa ilə Asiya arasında iqtisadi əlaqələrin inkişafı baxımından mühüm əhəmiyyət daşıyır.

Azərbaycanın geostrateji mövqeyi ölkəmizin beynəlxalq əhəmiyyətini daha da artırır. Şərq ilə Qərbi birləşdirən mühüm nəqliyyat marşrutlarının üzərində yerləşən Azərbaycan beynəlxalq ticarətin və tranzit daşımalarının etibarlı iştirakçısı kimi çıxış edir. Müasir nəqliyyat infrastrukturu, logistika imkanlarının genişləndirilməsi və regional bağlantı layihələrinin həyata keçirilməsi ölkəmizin Avrasiya məkanında strateji mövqeyini daha da gücləndirir. Bu amillər Avropa İttifaqı ilə əməkdaşlığın iqtisadi əsaslarını genişləndirməklə yanaşı, qarşılıqlı maraqların daha da yaxınlaşmasına xidmət edir.

Bakı görüşü bir daha nümayiş etdirdi ki, Azərbaycan–Avropa İttifaqı münasibətləri qarşılıqlı etimad, siyasi dialoq və ortaq maraqlar üzərində qurulan davamlı əməkdaşlıq modelinə çevrilmişdir. Bu əməkdaşlıq yalnız ikitərəfli münasibətlərin inkişafı ilə məhdudlaşmır, eyni zamanda Cənubi Qafqazda sabitliyin möhkəmləndirilməsinə, regional əməkdaşlığın genişlənməsinə və beynəlxalq təhlükəsizlik mühitinə töhfə verir.

Prezident İlham Əliyevin həyata keçirdiyi xarici siyasət kursu Azərbaycanın beynəlxalq nüfuzunun artmasına, çoxtərəfli əməkdaşlıq imkanlarının genişlənməsinə və ölkəmizin etibarlı tərəfdaş kimi mövqeyinin möhkəmlənməsinə xidmət edir. 1 iyul 2026-cı il tarixli Bakı görüşü də bu siyasətin ardıcıl şəkildə davam etdirildiyini və Azərbaycan–Avropa İttifaqı münasibətlərinin gələcək inkişafı üçün yeni imkanlar yaratdığını göstərən mühüm siyasi hadisə kimi qiymətləndirilə bilər.

Anar Məmmədov,

YAP Gədəbəy rayon təşkilatının əməkdaşı

Paylaş:

Baxılıb: 33 dəfə