Fərid Hüseyn: İnanıram ki, Azərbaycan–Özbəkistan qardaşlığı bundan sonra da yeni mədəni layihələrlə zənginləşəcək

Bakı:

23 °C

56 %

5 m/s

AZ RU EN

Ana səhifə / Mədəniyyət / Fərid Hüseyn: İnanıram ki, Azərbaycan–Özbəkistan qardaşlığı bundan sonra da yeni mədəni layihələrlə zənginləşəcək

Fərid Hüseyn: İnanıram ki, Azərbaycan–Özbəkistan qardaşlığı bundan sonra da yeni mədəni layihələrlə zənginləşəcək

24.08.2026 [15:31]

Azərbaycan və Özbəkistan arasındakı mövcud siyasi-ictimai və ədəbi-mədəni əlaqələr qürur duyacağımız səviyyədədir. Azərbaycan Respublikasının Prezidenti İlham Əliyev və Özbəkistan Respublikasının Prezidenti Şavkat Mirziyoyevin sözə, dilə və ədəbiyyata könüldən bağlı olmaları yeni ədəbi layihələrin həyata keçirilməsi, eləcə də mədəni-humanitar əlaqələrin daha da möhkəmləndirilməsi baxımından ədiblərimiz və sənətkarlarımız üçün geniş imkanlar yaradır. Eyni zamanda, ölkələrimiz arasındakı siyasi və iqtisadi münasibətlərin yüksək səviyyədə olması mədəni-ədəbi əlaqələrimizin də daha geniş vüsət almasına mühüm zəmin yaradır.

Bunu AZƏRTAC-a açıqlamasında Azərbaycan Yazıçılar Birliyinin Gənclər Şurasının sədri, Özbəkistan Yazıçılar Birliyinin üzvü Fərid Hüseyn deyib.

Onun sözlərinə görə, Özbəkistanda Heydər Əliyev adına Azərbaycan Mədəniyyət Mərkəzinin fəaliyyət göstərməsi çox mühüm və təqdirəlayiq hadisədir. Mərkəz mövcud imkanlarından səmərəli istifadə edərək müxtəlif layihələr həyata keçirir, Azərbaycan və Özbəkistan xalqları arasında ictimai-mədəni əlaqələrin qarşılıqlı şəkildə möhkəmləndirilməsində mühüm rol oynayır. Azərbaycan–Özbəkistan qardaşlığının tarixi, təbii və səmimi əsasları var. Nizami–Nəvai bağlılığı, hər iki xalqın ədəbiyyat tarixində “Xəmsə” ənənəsinin yaratdığı mənəvi və ədəbi vəhdət bu gün qardaş xalqlarımızın həyatının bütün sahələrində özünü göstərir.

“Özbəkistanın Səmərqənd və Xivə şəhərlərinə həsr etdiyim iki poetik əsər – “Səmərqənd divanı” və “Xivə dəftəri” Azərbaycan, özbək, ingilis və rus dillərində hər iki ölkədə kitab şəklində nəşr olunub. Bundan əlavə, Əlişir Nəvai, Əbdürrəuf Fitrət və Siracəddin Səyyidin kitablarını, eləcə də “Özbək şeiri antologiyası”nı çapa hazırlamışam. Sevindirici haldır ki, uzun illərdir qardaş Özbəkistanla qurduğumuz ədəbi əlaqələr yüksələn xətlə inkişaf edir”, - deyə o qeyd edib.

Fərid Hüseyn deyib: “Biz, ədəbiyyat və sənət adamları da Türk dünyasının birliyi və mənəvi bütövlüyü naminə ədəbi-mədəni əlaqələrin daha da inkişaf etdirilməsi üçün əlimizdən gələni əsirgəməməliyik. İnanıram ki, Azərbaycan–Özbəkistan qardaşlığı bundan sonra da daha da möhkəmlənəcək və yeni, böyük mədəni layihələrlə zənginləşəcək”.

Paylaş:

Baxılıb: 329 dəfə