Vətənlə bağları möhkəmləndirən layihə

Bakı:

32 °C

39 %

5 m/s

Əlaqə

AZ RU EN

Ana səhifə / Arxiv / Vətənlə bağları möhkəmləndirən layihə

Vətənlə bağları möhkəmləndirən layihə

06.08.2026 [09:05]

Diaspor gənclərini birləşdirən düşərgə...

Müasir dövrdə dövlətlərin gücü təkcə iqtisadi və hərbi imkanları ilə deyil, həm də dünyanın müxtəlif ölkələrində yaşayan soydaşları ilə qurduğu möhkəm əlaqələrlə ölçülür. Bu baxımdan diaspor siyasəti Azərbaycanın maraqlarının qorunmasında mühüm istiqamətlərdən biridir. Hər il təşkil olunan Diaspor Gənclərinin Yay Düşərgəsi də bu siyasətin uğurlu layihələrindən biri kimi diqqət çəkir. Bu il keçirilən VII Diaspor Gənclərinin Yay Düşərgəsi müxtəlif ölkələrdən gələn azərbaycanlı gəncləri bir araya gətirərək onların Vətənlə bağlarını daha da gücləndirdi.

Düşərgə iştirakçıları Azərbaycanın tarixi, mədəniyyəti, dövlətçilik ənənələri və müasir inkişafı ilə bağlı geniş məlumat əldə edirlər. Onlar işğaldan azad edilmiş ərazilərə səfərlər edir, aparılan genişmiqyaslı bərpa və quruculuq işləri ilə tanış olurlar. Bu səfərlər xaricdə yaşayan gənclərin ölkədə baş verən dəyişiklikləri öz gözləri ilə görməsinə imkan yaradır. .

Diaspor gənclərinin bir araya gəlməsi müxtəlif ölkələrdə fəaliyyət göstərən azərbaycanlı icmalar arasında əməkdaşlığın genişlənməsinə də töhfə verir. Burada yaranan əlaqələr gələcəkdə ortaq layihələrin həyata keçirilməsinə, mədəni tədbirlərin təşkilinə və beynəlxalq platformalarda daha sıx əməkdaşlığa zəmin yaradır. Bu isə Azərbaycan diasporunun daha mütəşəkkil və təsirli fəaliyyət göstərməsinə kömək edir.

Belə layihələr gənclərdə milli mənsubiyyət hissini gücləndirir. Xaricdə doğulub boya-başa çatan və ya uzun illər Azərbaycandan kənarda yaşayan gənclər bu düşərgə vasitəsilə öz köklərinə daha yaxından bağlanırlar. Ana dilinə, milli-mənəvi dəyərlərə və Azərbaycan mədəniyyətinə maraq artır. Bu isə milli irsin gələcək nəsillərə ötürülməsi baxımından mühüm əhəmiyyət daşıyır.

Avqustun 8-nə qədər Şərqi Zəngəzur iqtisadi rayonunda “Dirçələn şəhərlər” şüarı ilə Diaspor Gənclərinin 7-ci Yay Düşərgəsi keçirilir. Avqustun 2-dən etibarən başlayan düşərgədə iştirak etmək üçün dünyanın 64 ölkəsindən 123 azərbaycanlı gənc və Azərbaycana dost münasibəti bəsləyən xalqların nümayəndələri ölkəmizə gəliblər. Diasporla İş üzrə Dövlət Komitəsindən bildirilib ki, “Şəhərsalma və Memarlıq İli”nə həsr olunan düşərgə Komitənin və Heydər Əliyev Fondunun birgə təşkilatçılığı ilə keçirilir.

Proqram çərçivəsində gənclərə Heydər Əliyevin dövlət quruculuğu, milli birliyin möhkəmləndirilməsi və diaspor siyasətinin formalaşdırılması istiqamətində xidmətləri, həmçinin Azərbaycanın ərazi bütövlüyü uğrunda şəhidlərin qəhrəmanlığı, 44 günlük Vətən müharibəsində qazanılmış tarixi Zəfər və postmüharibə dövründə ölkənin inkişaf prioritetləri barədə məlumat verilib.

Azərbaycan həqiqətlərini dünyaya çatdıran gənclər

Diasporla İş üzrə Dövlət Komitəsinin sədri Fuad Muradov Zəngilanda keçirilən Diaspor Gənclərinin 7-ci Yay Düşərgəsinin açılışı zamanı söyləyib ki, xaricdə yaşayan azərbaycanlı gənclər Azərbaycan həqiqətlərinin təbliğində mühüm rol oynayırlar.

O, xaricdə yaşayan azərbaycanlı gənclərin Azərbaycan həqiqətlərinin təbliğində və ölkəyə qarşı aparılan qarayaxma kampaniyalarına qarşı mübarizədə fəal rol oynamalı olduqlarını bildirərək deyib: “Azərbaycanın yerləşdiyi coğrafiya daim müxtəlif çağırışlarla üz-üzədir və bu səbəbdən gənclər ölkəyə qarşı yönələn təhdidlərə, yanlış məlumatlandırma cəhdlərinə qarşı hazır olmalıdırlar”.

Fuad Muradov diaspor gənclərinin əsas vəzifələrindən birinin Azərbaycanın haqq səsini yaşadıqları ölkələrdə layiqincə çatdırmaq, ölkəmiz haqqında obyektiv məlumatların yayılmasına töhfə vermək olduğunu vurğulayıb.

Builki düşərgəyə Avropada yaşayan gənclərimiz böyük maraq göstəriblər

Muradov bildirib ki, builki düşərgəyə dünyanın 64 ölkəsindən 120-dən artıq iştirakçı qatılıb: “Bu il düşərgədə iştirak üçün təxminən 700 müraciət daxil olub. Müraciətlərin əsas hissəsi xaricdə yaşayan gənclərimiz tərəfindən edilib. Fərqləndirici məqamlardan biri Avropada yaşayan gənclərimizin böyük maraq göstərmələri olub. Eyni zamanda, əvvəllər heç zaman yay düşərgəsində təmsil olunmayan ölkələrdən gənclər də bu layihəyə qoşulublar. İştirakçıların böyük əksəriyyəti ali təhsillidir. Biz istəyirik ki, həm səviyyə, həm də iştirak baxımından düşərgəmizdə hər zaman müxtəliflik təmin olunsun. İnanıram ki, bu düşərgənin gələcəkdə ən mühüm nəticələrindən biri Azərbaycan dövlətinin maraqlarının və həyata keçirdiyi layihələrin reallaşdırılmasında gənclərimizin fəal iştirak etmələri olacaq.

Cəbrayıl, Qubadlı və Zəngilan rayonlarında salınacaq bütün yaşayış məntəqələri dayanıqlı inkişaf prinsipləri əsasında planlaşdırılıb və biz gündəlik fəaliyyətimizi də məhz bu prinsiplərə uyğun şəkildə həyata keçiririk”.

Məskunlaşma sürətlə davam edir

Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev düşərgədə çıxışı zamanı bildirib ki, artıq Cəbrayıl və Zəngilan şəhərlərinə, eləcə də Horovlu, Şükürbəyli, Ağalı və Məmmədbəyli kəndlərinə sakinlərin köçü təmin olunub: “Hazırda Zəngilan və Cəbrayıl şəhərlərində məskunlaşma prosesi davam edir. Qubadlı rayonunun Mahruzlu və Zilanlı kəndlərində, Qubadlı şəhərində, eləcə də digər kənd və qəsəbələrdə tikinti, yenidənqurma layihələri intensiv şəkildə icra olunur.

Artıq həmin ərazilərdə minlərlə insan yaşayır, firavan həyat qurur və müxtəlif sahələrdə fəaliyyət göstərərək regionun sosial-iqtisadi inkişafına öz töhfəsini verir”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə

“Diaspor quruculuğu, lobbiçilik və dünya azərbaycanlılarının həmrəyliyi” istiqaməti üzrə hazırlanmışdır

Paylaş:

Baxılıb: 158 dəfə