Prezident İlham Əliyevin Laos Prezidentinin Azərbaycana səfəri zamanı verdiyi bəyanat iki ölkə arasında dostluq və əməkdaşlıq münasibətlərinin inkişafında yeni mərhələ açır

Bakı:

21 °C

83 %

12 m/s

AZ RU EN

Ana səhifə / Arxiv / Prezident İlham Əliyevin Laos Prezidentinin Azərbaycana səfəri zamanı verdiyi bəyanat iki ölkə arasında dostluq və əməkdaşlıq münasibətlərinin inkişafında yeni mərhələ açır

Prezident İlham Əliyevin Laos Prezidentinin Azərbaycana səfəri zamanı verdiyi bəyanat iki ölkə arasında dostluq və əməkdaşlıq münasibətlərinin inkişafında yeni mərhələ açır

19.10.2026 [12:25]

Azərbaycan Respublikasının Prezidenti İlham Əliyevin oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı mətbuata verdiyi bəyanat iki ölkə arasında münasibətlərin gələcək inkişaf istiqamətlərini əks etdirir. Dövlət başçısı vurğulayıb ki, qəbul edilən Birgə Bəyanat gələcək əməkdaşlığın əsas istiqamətlərini müəyyənləşdirir və ikitərəfli əlaqələrin daha da dərinləşməsi üçün mühüm zəmin yaradır.

Azərbaycan ilə Laos arasında diplomatik münasibətlər otuz ildən artıqdır ki, uğurla davam edir. Bu müddət ərzində hər iki ölkə beynəlxalq təşkilatlar çərçivəsində qarşılıqlı dəstək və həmrəylik nümayiş etdirib. Siyasi dialoqun davamlılığı dövlətlər arasında etimadın möhkəmlənməsinə və qarşılıqlı maraqlara əsaslanan əməkdaşlığın inkişafına imkan yaradıb.

Prezident İlham Əliyev bildirib ki, Laos Prezidentinin Azərbaycana rəsmi səfəri ikitərəfli münasibətlərə müsbət təsir göstərəcək. Səfər çərçivəsində keçirilən təkbətək və geniştərkibli görüşlərdə mühüm məsələlər müzakirə olunub, gələcək əməkdaşlıqla bağlı konkret addımlar müəyyən edilib. Bu görüşlər iki ölkənin mövcud imkanlardan daha səmərəli istifadə etmək niyyətini nümayiş etdirir.

İkitərəfli münasibətlərin mühüm istiqamətlərindən biri parlamentlərarası əlaqələrdir. Hər iki ölkədə dostluq qruplarının yaradılması deputatlar arasında təmasların genişləndirilməsinə, qanunvericilik sahəsində təcrübə mübadiləsinə və beynəlxalq parlament təşkilatları çərçivəsində əməkdaşlığa şərait yaradır. Bu əlaqələrin inkişafı dövlətlər arasında siyasi münasibətlərin möhkəmlənməsinə də töhfə verir.

Azərbaycan və Laosun hakim partiyaları arasında əməkdaşlıq da xüsusi əhəmiyyət daşıyır. Bir neçə il əvvəl imzalanmış Anlaşma Memorandumu partiyalararası əlaqələrin inkişafına və qarşılıqlı təcrübə mübadiləsinə imkan yaradıb. Bu istiqamətdə əməkdaşlığın genişləndirilməsi siyasi dialoqun davamlılığını gücləndirməklə yanaşı, iki ölkənin ortaq maraqlarının daha yaxından öyrənilməsinə xidmət edir.

Prezident İlham Əliyev siyasi münasibətlərin yüksək səviyyədə olduğunu qeyd edərək iqtisadi əlaqələrin də eyni səviyyəyə yüksəldilməsinin vacibliyini vurğulayıb. Mövcud ticarət dövriyyəsinin iki ölkənin potensialını tam əks etdirmədiyini bildirən dövlət başçısı iqtisadi əməkdaşlığın intensivləşdirilməsi ilə bağlı müvafiq tapşırıqların verildiyini diqqətə çatdırıb. Bu yanaşma qarşılıqlı iqtisadi əlaqələrin genişləndirilməsinə yönəlmiş konkret siyasətin ifadəsidir.

Bakıda keçirilməsi nəzərdə tutulan Laos-Azərbaycan biznes-forumu iqtisadi münasibətlərin inkişafı baxımından mühüm platforma olacaq. Forumun sahibkarlar arasında əlaqələrin qurulmasına, investisiya imkanlarının araşdırılmasına və qarşılıqlı maraq doğuran layihələrin müəyyənləşdirilməsinə töhfə verməsi gözlənilir. Azərbaycanın Laos tərəfindən təqdim ediləcək konkret investisiya layihələrini nəzərdən keçirməyə hazır olması iqtisadi tərəfdaşlığın qarşılıqlı fayda prinsipləri əsasında inkişaf etdirilməsinə verilən önəmi göstərir.

Təhsil və humanitar sahələrdə əməkdaşlıq da Azərbaycan-Laos münasibətlərinin vacib istiqamətlərindəndir. Prezident İlham Əliyev vaxtilə iki mindən çox laoslu tələbənin Azərbaycanda təhsil aldığını xatırladaraq bu ənənənin bərpa olunmasını təklif edib. Təqaüd mexanizminin yaradılması təşəbbüsü gənclərin ölkəmizdə təhsil almasına, bilik və bacarıqlarını artırmasına, gələcəkdə isə iki ölkə arasında əlaqələrin inkişafında iştirak etməsinə şərait yarada bilər.

Laos Prezidentinin Azərbaycana rəsmi səfəri iki ölkə arasında dostluq münasibətlərinin möhkəmlənməsinin və əməkdaşlıq imkanlarının genişlənməsinin göstəricisidir. Qəbul edilən Birgə Bəyanat, keçirilən görüşlər və müəyyənləşdirilən konkret addımlar gələcək tərəfdaşlığın əsasını təşkil edir. Prezident İlham Əliyevin bəyanatında ifadə olunan mövqe Azərbaycanın qarşılıqlı hörmətə, bərabərhüquqlu əməkdaşlığa və ortaq maraqlara əsaslanan xarici siyasətinin mühüm istiqamətlərindən birini əks etdirir.

Rövşən Qasımov,

YAP Gədəbəy rayon təşkilatının məsləhətçisi

Paylaş:

Baxılıb: 17 dəfə

Xəbər lenti

Hamısına bax