Zəngilanın yeni həyatı – Böyük Qayıdışın təntənəsi

Bakı:

21 °C

83 %

12 m/s

Əlaqə

AZ RU EN

Ana səhifə / Arxiv / Zəngilanın yeni həyatı – Böyük Qayıdışın təntənəsi

Zəngilanın yeni həyatı – Böyük Qayıdışın təntənəsi

19.10.2026 [12:46]

Hər bir xalqın tarixində elə günlər var ki, həmin günlər keçmişin ağrılarını, bu günün qürurunu və gələcəyə olan inamını özündə birləşdirir. 20 Oktyabr – Zəngilan Şəhəri Günü məhz belə əlamətdar tarixlərdəndir. Bu gün doğma torpaqlarına qovuşan zəngilanlıların sevincini, Azərbaycanın tarixi Zəfərini və işğaldan azad edilmiş ərazilərimizdə başlanan möhtəşəm quruculuq mərhələsini təcəssüm etdirir.

Zəngilan Azərbaycanın qədim tarixə, zəngin mədəni irsə və gözəl təbiətə malik bölgələrindən biridir. Bu torpaq əsrlər boyu xalqımızın milli-mənəvi dəyərlərinin qorunduğu, nəsillərin bir-birini əvəz etdiyi doğma yurd olub. Lakin 1993-cü ildə başlayan işğal bu gözəl diyarın həyatını alt-üst etdi. İnsanlar ev-eşiklərindən ayrı düşdülər, tarixi abidələr dağıntılara məruz qaldı, şəhər və kəndlər viran edildi. Buna baxmayaraq, zəngilanlılar doğma torpaqlarına qayıdacaqlarına olan ümidlərini heç vaxt itirmədilər.

2020-ci il oktyabrın 20-də Azərbaycan Ordusunun Zəngilan şəhərini işğaldan azad etməsi bu ümidləri gerçəyə çevirdi. Prezident İlham Əliyevin rəhbərliyi ilə əldə edilən tarixi Zəfər doğma yurda qayıdışın yolunu açdı. Artıq Zəngilanın adı ayrılıq və həsrətlə deyil, azadlıq, dirçəliş və yeni həyatla assosiasiya olunur.

Prezident İlham Əliyevin rəhbərliyi ilə işğaldan azad edilmiş ərazilərdə genişmiqyaslı bərpa və yenidənqurma işlərinə başlanılması dövlətimizin gələcəyə hesablanmış siyasətinin mühüm göstəricisidir. Zəngilan rayonunda həyata keçirilən layihələr insanların rahat yaşayışının təmin edilməsinə, müasir infrastrukturun qurulmasına və iqtisadi imkanların genişləndirilməsinə xidmət edir.

Bu istiqamətdə Ağalı kəndində yaradılan “Ağıllı kənd” layihəsi xüsusi əhəmiyyət daşıyır. Müasir yaşayış evləri, sosial xidmətlər, təhsil və digər infrastruktur imkanları ilə seçilən Ağalı Böyük Qayıdışın rəmzinə çevrilib. Keçmiş məcburi köçkünlərin doğma yurda qayıtması illərlə ürəklərdə yaşadılan arzunun gerçəkləşməsidir. İnsanların öz evlərində yeni həyata başlaması, uşaqların doğma torpaqda böyüməsi, ailələrin gələcəyini burada qurması Zəngilanın dirçəlişinin ən gözəl mənzərəsidir.

Zəngilanın inkişafında nəqliyyat və logistika imkanları da mühüm yer tutur. Rayonun əlverişli coğrafi mövqeyi, həyata keçirilən yol və infrastruktur layihələri onun gələcəkdə regionun iqtisadi və nəqliyyat əlaqələrində əhəmiyyətli rol oynamasına şərait yaradır. Bu imkanlardan səmərəli istifadə edilməsi yeni iş yerlərinin açılmasına, sahibkarlığın inkişafına və əhalinin rifahının yüksəlməsinə töhfə verə bilər.

Quruculuq işləri ilə yanaşı, tarixi-mədəni irsin qorunması da xüsusi diqqət tələb edir. Zəngilanın qədim məscidləri, türbələri, arxeoloji abidələri və digər tarixi məkanları xalqımızın keçmişini gələcək nəsillərə çatdıran mənəvi sərvətlərdir. Onların qorunması və bərpası milli yaddaşımızın yaşadılması deməkdir.

Bu gün Zəngilanın dirçəlişi yalnız bir rayonun inkişafı ilə məhdudlaşmır. O, Azərbaycanın öz torpaqlarını bərpa etmək, insanları doğma yurdlarına qaytarmaq və regionda davamlı inkişafı təmin etmək iradəsinin ifadəsidir. Prezident İlham Əliyevin azad edilmiş ərazilərə səfərləri və quruculuq layihələrinin həyata keçirilməsi bu prosesin ardıcıl şəkildə davam etdirildiyini göstərir.

Zəngilan Şəhəri Günü bizə xatırladır ki, Vətən sevgisi yalnız sözlə deyil, əməli işlə, zəhmətlə və məsuliyyətlə təsdiqlənir. Bu günün qəhrəmanları həm torpaqlarımızı azad edən igidlərimiz, həm də həmin torpaqlarda yenidən həyat quran insanlarımızdır.

Zəngilan yenidən doğulur, öz tarixi simasını bərpa edir və gələcəyə inamla addımlayır. Onun küçələrində həyatın canlanması, evlərdə ocaqların yanması, torpağın yenidən becərilməsi xalqımızın əyilməz iradəsinin təntənəsidir.

YAP Samux rayon təşkilatının sədri Gündüz Bayramov