Prezident İlham Əliyevin sülh və əməkdaşlıq mesajları

Bakı:

18 °C

94 %

0 m/s

Əlaqə

AZ RU EN

Ana səhifə / Arxiv / Prezident İlham Əliyevin sülh və əməkdaşlıq mesajları

Prezident İlham Əliyevin sülh və əməkdaşlıq mesajları

21.10.2026 [12:53]

Oktyabrın 15-də Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Görüşü Azərbaycanın beynəlxalq əməkdaşlığın inkişafına verdiyi töhfələrin müzakirəsi baxımından mühüm əhəmiyyət daşıyıb. Prezident İlham Əliyevin tədbirdəki çıxışı beynəlxalq münasibətlərdə ədalət və hüquq prinsiplərinin qorunması, dövlətlərin suverenliyinə hörmət, regional təhlükəsizlik və sülhün möhkəmləndirilməsi kimi vacib məsələləri əhatə edib.

Dövlət başçısı Azərbaycanın müstəqil xarici siyasətinin bərabərhüquqluluq, dövlətlərin daxili işlərinə qarışmamaq, ərazi bütövlüyü və suverenliyə hörmət prinsiplərinə əsaslandığını vurğulayıb. Prezident çıxışında Azərbaycanın uzun illər üzləşdiyi işğal probleminə, BMT Təhlükəsizlik Şurasının qətnamələrinin vaxtında icra edilməməsinə və beynəlxalq münasibətlərdə ikili standartların yaratdığı problemlərə diqqət çəkib. Azərbaycanın öz ərazi bütövlüyünü və suverenliyini bərpa etməsi ilə bağlı təcrübəsini qeyd edən Dövlətimizin başçısı beynəlxalq təşkilatların qərarlarının kağız üzərində qalmamalı, onların həyata keçirilməsi üçün təsirli mexanizmlər yaradılmalı olduğunu bildirib.

Prezident İlham Əliyevin çıxışında xüsusi yer tutan məsələlərdən biri də sülhün qorunması və möhkəmləndirilməsi olub. Dövlət başçısı Azərbaycanın müharibədən sonra Ermənistana sülh təklif etdiyini və regionda əldə olunan sülhün qorunmasının vacibliyini diqqətə çatdırıb. Bu mesaj beynəlxalq münasibətlərdə qarşıdurmaların aradan qaldırılması, etimadın gücləndirilməsi və uzunmüddətli sabitliyin təmin olunması baxımından əhəmiyyət daşıyır.

Prezident İlham Əliyev Azərbaycanın AQEM-ə sədrliyi dövründə təşkilatın gücləndirilməsinə, nəqliyyat və bağlantıların inkişafına, rəqəmsallaşmaya, ətraf mühitin mühafizəsinə, turizmə, təhsil və elm sahələrində əməkdaşlığa xüsusi diqqət yetirildiyini bildirib. Həyata keçirilən təşəbbüslər nəticəsində təşkilatın institusional və hüquqi imkanlarının genişləndiyini qeyd edən ölkə başçısı üzv dövlətlər arasında dialoqun və qarşılıqlı fəaliyyətin inkişafının əhəmiyyətini vurğulayıb. Azərbaycanın AQEM-ə sədrliyinin daha iki il müddətinə uzadılmasına göstərilən dəstəyə görə üzv dövlətlərə təşəkkürünü ifadə edib.

Bakı Zirvə Görüşündə səsləndirilən fikirlər Azərbaycanın beynəlxalq əməkdaşlığın genişləndirilməsinə, regional təhlükəsizliyin möhkəmləndirilməsinə və dövlətlər arasında qarşılıqlı etimadın artırılmasına yönəlmiş yanaşmasını əks etdirib. Prezident İlham Əliyevin çıxışı bir daha göstərib ki, davamlı sülhün təmin olunması üçün beynəlxalq hüquqa hörmət, qəbul edilmiş qərarların icrası və dövlətlər arasında bərabərhüquqlu əməkdaşlıq mühüm şərtlərdir.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 40 dəfə

Xəbər lenti

Hamısına bax