Qubadlı – qəhrəmanlığın tarixə, Zəfərin gələcəyə çevrildiyi torpaq

Bakı:

18 °C

94 %

0 m/s

Əlaqə

AZ RU EN

Ana səhifə / Arxiv / Qubadlı – qəhrəmanlığın tarixə, Zəfərin gələcəyə çevrildiyi torpaq

Qubadlı – qəhrəmanlığın tarixə, Zəfərin gələcəyə çevrildiyi torpaq

21.10.2026 [16:30]

Hər bir xalqın tarixində elə günlər var ki, həmin günlər milli yaddaşın ayrılmaz hissəsinə çevrilir. Azərbaycan xalqı üçün 25 Oktyabr – Qubadlı şəhəri günü məhz belə əlamətdar tarixlərdəndir. Bu gün biz yalnız qazanılmış hərbi uğuru deyil, həm də doğma torpaqlarımıza qayıdışın sevincini, milli qürurumuzun təntənəsini və dövlətimizin gücünü qeyd edirik.

Prezident, Müzəffər Ali Baş Komandan İlham Əliyev Qubadlının azad edilməsinin əhəmiyyətini belə ifadə etmişdir: “Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı”. Bu fikirlər xalqımızın uzun illər ərzində qəlbində yaşatdığı arzunun gerçəkləşməsini və tarixi ədalətin bərpasını ifadə edir.

Qubadlı işğaldan əvvəl özünəməxsus təsərrüfat ənənələri ilə tanınırdı. Rayonun iqtisadi həyatında taxılçılıq, üzümçülük, tütünçülük, bostançılıq və heyvandarlıq mühüm yer tuturdu. Bərəkətli torpaqlar, zəhmətkeş insanlar və təbii sərvətlər bölgənin inkişafı üçün geniş imkanlar yaradırdı. İşğal bu inkişafı dayandırsa da, Qubadlı sakinlərinin doğma torpağa bağlılığını qıra bilmədi. Onların qəlbində bir gün geri dönəcəklərinə dair inam yaşayırdı.

Vətən müharibəsi həmin inamın gerçəkliyə çevrildiyi tarixi mərhələ oldu. Azərbaycan Ordusu Prezident İlham Əliyevin rəhbərliyi ilə ərazi bütövlüyümüzün bərpası uğrunda misilsiz qəhrəmanlıq göstərdi. Qubadlının 25 oktyabr 2020-ci ildə azad edilməsi döyüş əməliyyatlarının gedişində mühüm strateji əhəmiyyət daşıdı. Bu qələbə düşmənin mövqelərinə ciddi təsir göstərərək Azərbaycan Ordusunun irəliləyişini davam etdirməsinə və tarixi Zəfərə doğru addımlamasına şərait yaratdı. Qubadlı uğrunda mübarizə bir daha göstərdi ki, Vətən sevgisi, milli birlik və qətiyyət qarşısında heç bir maneə dayana bilməz.

Zəfərin böyüklüyü yalnız hərbi qələbə ilə ölçülmür. Onun tarixi dərsləri gələcək nəsillərə çatdırılmalı, azadlıq uğrunda mübarizənin qəhrəmanları daim xatırlanmalıdır. Qubadlıda İşğal və Zəfər muzeyləri kompleksinin yaradılması bu baxımdan xüsusi məna daşıyır. Bu kompleks xalqımızın yaşadığı faciələri, mübarizə əzmini və qələbəyə aparan yolu gələcək nəsillərə çatdıracaq. Şəhidlərimizin xatirəsinə ehtiram göstərmək, onların fədakarlığını unutmamaq milli mənəviyyatımızın əsas dayaqlarındandır.

İşğaldan azad edilmiş ərazilərdə həyata keçirilən genişmiqyaslı bərpa işləri Qubadlının gələcəyinə yeni nəfəs verir. Mahruzlu və Zilanlı kəndlərinin yenidən qurulması sakinlərin doğma yurdlarına qayıdışı üçün mühüm əhəmiyyət daşıyır. Məqsəd dağıdılmış yaşayış məntəqələrini bərpa etməklə yanaşı, insanlara təhlükəsiz, rahat və müasir həyat şəraiti yaratmaqdır.

Prezident İlham Əliyevin 19 oktyabr 2022-ci ildə Qubadlıya səfəri bu istiqamətdə görülən işlərin əhəmiyyətini bir daha nümayiş etdirdi. Dövlətimizin başçısı “Zabuxçay” və “Bərgüşadçay” su anbarlarının layihələri ilə tanış oldu. Bu layihələr kənd təsərrüfatının su təminatının yaxşılaşdırılması və əkin sahələrinin səmərəli istifadəsi üçün perspektivlər açır. Eyni səfər çərçivəsində “Azərişıq” ASC-nin 35 kilovoltluq yarımstansiyasının və Rəqəmsal İdarəetmə Mərkəzinin təməli qoyuldu. Müasir enerji infrastrukturu bölgənin davamlı inkişafına xidmət edəcək.

Bu gün Qubadlının dirçəlişi Azərbaycanın quruculuq əzminin parlaq təcəssümüdür. Mahruzlu və Zilanlıda yenidən həyatın qurulması, infrastruktur layihələrinin həyata keçirilməsi, tarixi yaddaşın qorunması Böyük Qayıdışın mühüm istiqamətləridir. Qubadlı artıq yalnız keçmişin nisgili deyil, həm də gələcəyin ümididir. 25 Oktyabr xalqımızın yaddaşında azadlığın, milli qürurun və dönməz qayıdışın bayramı kimi əbədi yaşayacaq.

Gündüz Bayramov

YAP Samux rayon təşkilatının sədri

Paylaş:

Baxılıb: 166 dəfə

Xəbər lenti

Hamısına bax