Qubadlının yeni inkişaf tarixi: işğaldan azadlıqdan quruculuğa və böyük qayıdışa doğru

Bakı:

18 °C

94 %

0 m/s

Əlaqə

AZ RU EN

Ana səhifə / Arxiv / Qubadlının yeni inkişaf tarixi: işğaldan azadlıqdan quruculuğa və böyük qayıdışa doğru

Qubadlının yeni inkişaf tarixi: işğaldan azadlıqdan quruculuğa və böyük qayıdışa doğru

21.10.2026 [17:26]

25 Oktyabr – Qubadlı Şəhəri Günü xalqımızın tarixi yaddaşında, milli qürur və dövlətçilik tariximizdə xüsusi yer tutur. Bu əlamətdar gün Azərbaycanın ərazi bütövlüyünün bərpasının, tarixi ədalətin təntənəsinin və doğma torpaqlarımıza qayıdışın rəmzidir. Qubadlı şəhərinin işğaldan azad edilməsi ilə bu qədim diyarın həyatında yeni bir mərhələnin əsası qoyulub. Bu gün Qubadlının qarşısında dayanan əsas vəzifə şəhərin və rayonun yenidən qurulması, iqtisadi potensialının bərpa edilməsi, müasir infrastrukturun yaradılması və doğma yurdlarından didərgin düşmüş sakinlərin təhlükəsiz, rahat həyat şəraitinin təmin olunmasıdır.

Qubadlı Azərbaycanın zəngin tarixi, mədəni irsi və gözəl təbiəti ilə seçilən bölgələrindən biridir. Zəngəzur silsiləsinin ətəklərində, Bərgüşad çayının sahilində yerləşən bu qədim yurd əsrlər boyu özünəməxsus həyat tərzi, adət-ənənələri və zəhmətkeş insanları ilə tanınıb. Lakin Ermənistanın Azərbaycana qarşı hərbi təcavüzü nəticəsində Qubadlı 1993-cü il avqustun 31-də işğal olunub. İşğal dövründə şəhər və rayonun yaşayış məntəqələri dağıntılara məruz qalıb, tarixi-mədəni abidələrə ciddi ziyan vurulub, minlərlə insan doğma yurdunu tərk etmək məcburiyyətində qalıb.

Qubadlı sakinlərinin uzun illər davam edən yurd həsrəti 2020-ci ildə Vətən müharibəsi zamanı Azərbaycanın qazandığı tarixi Zəfərlə sona yaxınlaşdı. Azərbaycan Ordusunun qəhrəmanlığı, əsgər və zabitlərimizin şücaəti, xalqımızın birliyi və dövlətimizin qətiyyətli siyasəti nəticəsində Qubadlı şəhəri 2020-ci il oktyabrın 25-də işğaldan azad edildi. Bu qələbə Azərbaycanın hərb tarixinə şanlı səhifə kimi yazıldı. Prezident, Müzəffər Ali Baş Komandan İlham Əliyevin rəhbərliyi ilə əldə edilən Zəfər ölkəmizin ərazi bütövlüyünün bərpası istiqamətində mühüm tarixi hadisə oldu.

25 Oktyabr – Qubadlı Şəhəri Gününün təsis edilməsi də bu tarixi hadisənin əhəmiyyətini bir daha nümayiş etdirir. Bu gün yalnız bir şəhərin azad olunmasının ildönümü deyil, həm də milli iradənin, Vətən sevgisinin və qalib xalqın əzminin təcəssümüdür. Qubadlının azadlığı uğrunda canından keçən şəhidlərimizin xatirəsi xalqımızın qəlbində əbədi yaşayır. Qazilərimizin fədakarlığı və qəhrəmanlığı isə gələcək nəsillər üçün əsl vətənpərvərlik nümunəsidir.

İşğaldan azad edilmiş ərazilərin bərpası dövlətimizin əsas prioritetlərindən biridir. Bu çərçivədə Qubadlıda həyata keçirilən layihələr şəhərin gələcək inkişafının möhkəm təməlini formalaşdırır. Müasir yol-nəqliyyat infrastrukturunun qurulması rayonun digər bölgələrlə əlaqələrinin genişlənməsinə, iqtisadi fəallığın artmasına və yeni investisiya imkanlarının yaranmasına şərait yaradır. Elektrik enerjisi, su təchizatı, rabitə və digər kommunal xidmətlərin bərpası isə yaşayış məntəqələrinin davamlı inkişafı üçün mühüm əhəmiyyət daşıyır.

Qubadlının inkişafı yalnız fiziki infrastrukturun yenilənməsi ilə məhdudlaşmır. Burada sosial həyatın dirçəldilməsi, təhsil və səhiyyə xidmətlərinin təşkili, məşğulluq imkanlarının yaradılması, sahibkarlığın təşviqi və mədəni irsin qorunması da xüsusi əhəmiyyət kəsb edir. Çünki şəhərin həqiqi dirçəlişi onun küçələrinin, binalarının və yollarının yenidən qurulması ilə yanaşı, insanların doğma torpaqlarında firavan yaşaması, işləməsi və gələcəyə inamla baxması deməkdir.

Qubadlının yenidən qurulmasında ən mühüm məsələlərdən biri keçmiş məcburi köçkünlərin doğma yurdlarına qayıdışıdır. İllərlə ata-baba torpaqlarından uzaqda yaşayan insanlar üçün Qubadlıya qayıtmaq sadəcə yaşayış yerini dəyişmək deyil, həm də öz köklərinə, xatirələrinə və mənəvi dünyasına qovuşmaqdır. Doğma evlərin yenidən tikilməsi, məktəblərin fəaliyyət göstərməsi, ailələrin öz torpaqlarında əmək fəaliyyəti ilə məşğul olması Qubadlının həyatında yeni bir dövrün başlanğıcıdır.

Bu prosesin uğurla davam etdirilməsi üçün dövlətin həyata keçirdiyi tədbirlərlə yanaşı, ictimai həmrəylik və vətəndaş məsuliyyəti də böyük əhəmiyyət daşıyır. Hər bir sakin, hər bir gənc və hər bir ziyalı Qubadlının tarixi irsinin qorunmasına, onun gələcək inkişafına və milli-mənəvi dəyərlərinin yaşadılmasına öz töhfəsini verməlidir. Doğma torpaqların yenidən qurulması həm də gələcək nəsillər qarşısında məsuliyyət deməkdir.

Qubadlının yeni inkişaf tarixi müasir Azərbaycan dövlətinin gücünü, xalqımızın birliyini və quruculuq əzmini nümayiş etdirir. Bu gün azad edilmiş torpaqlarımızda aparılan bərpa işləri Azərbaycanın yalnız müharibədə qalib gələn deyil, eyni zamanda sülhü, sabitliyi və davamlı inkişafı təmin etməyə çalışan dövlət olduğunu göstərir. Qubadlının yenidən qurulması bölgədə iqtisadi və sosial həyatın bərpasına, əhalinin rifahının yüksəldilməsinə və ölkəmizin ümumi inkişafına xidmət edir.

25 Oktyabr – Qubadlı Şəhəri Günü hər bir azərbaycanlı üçün qürur və iftixar mənbəyidir. Bu tarix bizə azadlığın, birliyin və Vətənə bağlılığın dəyərini xatırladır. Qubadlı artıq keçmişin ağrı-acıları ilə deyil, gələcəyə yönəlmiş inkişaf hədəfləri ilə gündəmə gəlir. Şəhərin yenidən qurulması, doğma sakinlərin qayıdışı və iqtisadi həyatın canlanması bu qədim diyarın yeni tarixinin əsas səhifələrini təşkil edir.

Əminliklə demək olar ki, Qubadlının qarşısında geniş inkişaf perspektivləri açılıb. Dövlətimizin diqqəti, xalqımızın həmrəyliyi və sakinlərin doğma yurda bağlılığı sayəsində şəhərimizin və rayonumuzun gələcəkdə daha da inkişaf edəcəyi, müasir yaşayış məkanına çevriləcəyi gözlənilir.

Mələk Rzayeva

YAP Kəngərli rayon təşkilatının əməkdaşı

Paylaş:

Baxılıb: 89 dəfə

Xəbər lenti

Hamısına bax