Daşkəsən rayonunun Quşçu kəndinə yeni içməli su xətti çəkilib

Bakı:

28 °C

57 %

5 m/s

Əlaqə

AZ RU EN

Ana səhifə / Daxili siyasət / Daşkəsən rayonunun Quşçu kəndinə yeni içməli su xətti çəkilib

Daşkəsən rayonunun Quşçu kəndinə yeni içməli su xətti çəkilib

05.10.2013 [11:24]

Yaponiya hökumətinin qrantı hesabına 8,4 kilometr məsafədən çəkilmiş, ümumi layihə dəyəri 120 min ABŞ dolları olan yeni su xəttinin açılış mərasimi olub
Daşkəsən rayonunun Quşçu kəndində Yaponiya hökumətinin qrantı hesabına 8,4 kilometr məsafədən çəkilmiş, ümumi layihə dəyəri 120 min ABŞ dolları olan yeni su xəttinin açılış mərasimi olub. Layihənin həyata keçirilməsi nəticəsində kənddə tutumu 50 ton olan su anbarı tikilib və kəndin müxtəlif yerlərində 4 bulaq inşa edilib. Açılış mərasimində Yaponiyanın Azərbaycan Respublikasındakı fövqəladə və səlahiyyətli səfiri Şusuke Vatanabey, Daşkəsən rayon İcra Hakimiyyətinin başçısı Əhəd Abıyev, rayon ictimaiyyətinin nümayəndələri, kənd sakinləri və digər qonaqlar iştirak ediblər.
Açılış mərasimində gündən-günə inkişaf edən Yaponiya və Azərbaycan arasında yaradılan xoş işgüzar əlaqələrdən, xalqlarımız arasında dostluq-qardaşlıq münasibətlərindən danışan natiqlər Azərbaycanın ucqar dağ kəndlərinə göstərilən diqqət və qayğıya görə minnətdarlıq və razılıqlarını bildiriblər.
Tədbirdə çıxış edən Daşkəsən rayon İcra Hakimiyyətinin başçısı Əhəd Abıyev deyib ki, Yaponiyanın Azərbaycan Respublikasındakı səfirliyi vasitəsilə ölkəmizdə müxtəlif sosialyönümlü layihələr həyata keçirilir, Azərbaycan-Yaponiya dostluğu və əlaqələri günü-gündən daha da möhkəmlənir. Bu layihələr ölkəmizin müxtəlif kəndlərinin içməli su ilə təchizatına, səhiyyə və təhsil sahəsində çalışan vətəndaşlarımızın sosial rifah halının yaxşılaşmasına müəyyən mənada dəstək verir. Bu layihə 2200 nəfərdən artıq kənd sakininin həyatına müsbət təsirini göstərəcək. Belə layihələr insanların sosial-iqtisadi həyatına müsbət təsir etməklə yanaşı, ölkələr və insanlar arasında əlaqələrin daha da genişlənməsi ilə nəticələnir: “Daşkəsən rayon İcra Hakimiyyətinin başçısı olaraq, Yaponiya səfirliyi ilə möhkəm dostluq və işgüzar əlaqələrin günbəgün möhkəmləndirilməsinə ümid edirəm. İnanıram ki, uğurla başa çatmış bu layihə kənd sakinləri tərəfindən müsbət qarşılanaraq minnətdarlıqla qəbul edilmişdir. Su həyatdır, aydınlıqdır, sağlam yaşamaq deməkdir”.
Açılışda Yaponiyanın Azərbaycan Respublikasındakı fövqəladə və səlahiyyətli səfiri Şusuke Vatanabey çıxış edərək deyib ki, Daşkəsənə ilk dəfədir səfər edir: “Buranın gözəl təbiəti, füsunkar gözəlliyi vardır. 10 ildə Yaponiya hökuməti Azərbaycanda 170-ə yaxın bu cür layihələr həyata keçirmişdir. Su əlbəttə, gözəllikdir, sağlamlıqdır, lakin həm də su qorxuludur. Yaponiyada 2 il bundan əvvəl sunaminin yaratdığı problemləri, baş vermiş insan fəlakətlərini xatırlatmaq istərdim. Gərək belə qorxulu fəlakətlərin qarşısı vaxtında alınsın. Yeri gəlmişkən, minnətdarlıq hissi ilə qeyd etmək istəyirəm ki, Azərbaycan Respublikasının Prezidenti bizim ölkə rəhbərinə və xalqımıza başsağlığı verdi. Azərbaycan dost ölkə kimi Yaponiya xalqına bu ağır günündə maddi yardım göstərdi”.
Quşçu kənd sakinləri adından Firudin Həsənov, Qafqaz Müsəlmanları Ruhani İdarəsinin Gəncə bölgəsi üzrə axundu Hacı Tahir və digərləri çıxış edərək Azərbaycan Respublikasının Prezidenti cənab İlham Əliyevə və Yaponiya hökumətinə rayon sakinlərinə göstərilən diqqət və qayğıya görə hörmət və ehtiramlarını bildiriblər.

Paylaş:

Baxılıb: 2075 dəfə