Ramin Məmmədov: "Dini mövzuda seminarın işğaldan azad olunmuş ərazilərimizdə təşkil olunması təsadüfi deyil"

Bakı:

27 °C

74 %

9 m/s

AZ RU EN

Ana səhifə / Din / Ramin Məmmədov: "Dini mövzuda seminarın işğaldan azad olunmuş ərazilərimizdə təşkil olunması təsadüfi deyil"

Ramin Məmmədov: "Dini mövzuda seminarın işğaldan azad olunmuş ərazilərimizdə təşkil olunması təsadüfi deyil"

23.09.2024 [17:17]

"Azərbaycanın mədəniyyət paytaxtında - qədim və əsrarəngiz Şuşada Sizinlə birlikdə belə bir vacib tədbirdə iştirak etmək qürurvericidir! Bu kürsüdən sizləri yalnız Dövlət Komitəsinin sədri kimi deyil, həm də 30 il öncə bu möhtəşəm şəhərdə uşaqlığını itirmiş Şuşa sakini kimi salamlayıram. Xoş gəlmisiniz! Dəvətimizi qəbul etdiyinizə görə hər birinizə ayrı-ayrılıqda təşəkkürümü bildirirəm. Biz hamımız böyük bir tarixi mərhələnin şahidləriyik. 4 il bundan öncə Azərbaycan ordusu Müzəffər Ali Baş Komandanın rəhbərliyi altında bütün Cənubi Qafqazın tarixində yeni bir səhifə açmağa müvəffəq oldu".

Bu fikirləri “İdeoloji mübarizədə din amili: mediadan gözləntilər” mövzusunda seminarın çıxışında Dini Qurumlarla İş üzrə Dövlət Komitəsinin sədri Ramin Məmmədov deyib.

O, çıxışında həmçinin bildirib ki, bir il öncə ölkəmiz öz suverenliyini tam şəkildə bərqərar etməklə, dünyaya güc və müdrikliyin vəhdətindən doğan unikal bir nümunə göstərdi: "Tarixi yenidən yazdıq. 30 il ərzində ədalət umduğumuz dünyaya sübut etdik ki, ağıl, iradə, qətiyyət və cəsarət bu mürəkkəb, ziddiyyətli zamanda ayağa qalxmağın, gələcəyə doğru addımlamağın yeganə düsturudur. 30 il çağırışlarımıza laqeyd bir sükutla cavab verən beynəlxalq ictimaiyyətə göstərdik ki, Azərbaycan xalqı nəinki özünün, həm də bütün bölgənin tarixini dəyişməyə qadir möhtəşəm bir xalqdır. Bu gün fərqli coğrafiyalarda baş verən toqquşmalar ümumilikdə beynəlxalq təhlükəsizlik arxitekturasını dəyişir, ikitərəfli və çoxtərəfli münasibətlərdə yeni tendensiyaların, davranış qaydalarının formalaşmasına səbəb olur. Lakin bu ziddiyyətlər bizi həm də baş verən proseslərin tarixi və ideoloji məzmununa daha çox diqqət yetirməyə sövq edir".

Media nümayəndələri ilə dini mövzuda seminarın işğaldan azad olunmuş ərazilərimizdə təşkil olunmasının təsadüfi olmadığını qeyd edən R. Məmmədov, bunun düşünülmüş bir seçim olduğunu bildirib: "Bu torpaqlarda Azərbaycan xalqına məxsus yüzlərlə dini və tarixi abidə məhv edilib. Məscidlərimiz təhqir olunub, dini məbədlərimizin tarixinin saxtalaşdırılmasına cəhd edilib. Ancaq bu gün dövlətimiz tərəfindən dini və mədəniyyət abidələrimiz bərpa olunur. Heydər Əliyev Fondunun həyata keçirdiyi bərpa-quruculuq işləri bizim öz tariximizə, milli-mənəvi dəyərlərimizə münasibətimizin ən gözəl ifadəsidir".

Havar Şəfiyeva

Paylaş:

Baxılıb: 1142 dəfə