UNA Afrikaya humanitar yardım məsələlərində medianın rolunu müzakirə edib

Bakı:

23 °C

65 %

9 m/s

Əlaqə

AZ RU EN

Ana səhifə / Dünya / UNA Afrikaya humanitar yardım məsələlərində medianın rolunu müzakirə edib

UNA Afrikaya humanitar yardım məsələlərində medianın rolunu müzakirə edib

28.10.2024 [12:39]

İslam Əməkdaşlıq Təşkilatı Milli Xəbər Agentlikləri Birliyinə (UNA) üzv olan informasiya agentliklərinin baş direktorları və yüksək vəzifəli şəxslərinin, habelə beynəlxalq humanitar ekspertlərin iştirakı ilə “Humanitar mediaya doğru: humanitar fəaliyyətin dəstəklənməsi və yardım səylərinin işıqlandırılmasında jurnalistikanın rolu” mövzusunda dəyirmi masa keçirilib.

AZƏRTAC WAM agentliyinə istinadla xəbər verir ki, dəyirmi masa İƏT-in Ciddədəki mənzil-qərargahında Afrikanın Sahil və Çad gölü hövzəsində məcburi köçkünlərə və qaçqınlara dəstək üzrə Donorlar Konfransı çərçivəsində təşkil olunub. Tədbirin təşkilatçıları qismində Kral Salman Humanitar Yardım Mərkəzi, İƏT, BMT-nin Humanitar Məsələlərin Əlaqələndirilməsi İdarəsi və Qaçqınlar üzrə Ali Komissarlığı çıxış ediblər.

UNA-nın baş direktoru Məhəmməd bin Əbd Rabbi əl-Yami humanitar böhranlara cavab verməkdə medianın mərkəzi rolunu vurğulayaraq bu sahədə mütəxəssislərin roluna və cavab tədbirləri vasitəsilə yardımları təşviq etmək üçün medianın gücünə güvəndiyini bildirib. O, humanitar təşkilatlarla media arasında daha güclü tərəfdaşlığa və humanitar təşəbbüslərin mediada işıqlandırılmasını əlaqələndirmək üçün birbaşa kommunikasiya kanallarının yaradılmasına çağırıb.

Kral Salman Humanitar Yardım Mərkəzinin sözçüsü Samir bin Abdullah Əl Cutayli çıxışında bildirib ki, İslam ölkələri informasiya agentlikləri arasında əməkdaşlıq humanitar fəaliyyətlərə dəstək baxımından vacibdir, çünki bu, icmalara və təşkilatlara hərtərəfli təsir göstərir.

Tədbirdə çıxış edən BƏƏ-nin WAM agentliyinin, həmçinin Mali, Kamerun, Çad və digər ölkələrin rəsmi informasiya orqanlarının rəhbərləri İƏT çərçivəsində humanitar məsələlərdə medianın roluna dair sammitin keçirilməsini təklif ediblər.

Dəyirmi masa humanitar məzmun üzrə xəbər mübadiləsinin artırılması, media ilə beynəlxalq yardım təşkilatları arasında koordinasiyanın gücləndirilməsi və hərtərəfli ictimai inkişafı dəstəkləmək üçün mediada “inkişaf naminə kommunikasiya” konsepsiyasının dərinləşdirilməsinə dair bir sıra tövsiyələrlə yekunlaşıb. Əlavə təkliflər arasında humanitar hesabatlarda statistik məlumatlar üzərində şəxsi hekayələrə diqqətin yönəldilməsi, humanitar kommunikasiyada media mütəxəssislərinin bacarıqlarının artırılması və informasiya istehlakçılarına kömək etmək üçün dəqiq məlumatın təmin edilməsi, dezinformasiyanın qarşısının alınması da yer alıb.

Paylaş:

Baxılıb: 509 dəfə