BMT-nin Baş katibi hökumətləri din zəminində ayrı-seçkiliyə son qoymaq üçün daha təsirli addımlar atmağa çağırıb

Bakı:

15 °C

72 %

10 m/s

AZ RU EN

Ana səhifə / Dünya / BMT-nin Baş katibi hökumətləri din zəminində ayrı-seçkiliyə son qoymaq üçün daha təsirli addımlar atmağa çağırıb

BMT-nin Baş katibi hökumətləri din zəminində ayrı-seçkiliyə son qoymaq üçün daha təsirli addımlar atmağa çağırıb

22.08.2025 [17:36]

BMT-nin Nyu-Yorkdakı baş qərargahında hər il avqustun 21-də qeyd edilən Beynəlxalq Terror Qurbanlarını Anma Günü və BMT Baş Assambleyasının qətnaməsi əsasında təsis edilmiş 22 avqust - Beynəlxalq Din və Etiqad Zəminində Zorakılıq Aktlarının Qurbanlarının Anım Günü ilə bağlı tədbir keçirilib.

BMT-nin Baş katibi Antonio Quterreş avqustun 22-də qeyd edilən Beynəlxalq Din və Etiqad Zəminində Zorakılıq Aktlarının Qurbanlarının Anım Günü ilə əlaqədar dünya birliyinə müraciət edib. Sənəddə deyilir: “Dünyanın hər yerində insanlar inanclarına görə təqiblərə, hücumlara və hətta qətllərə məruz qalmaqda davam edirlər. İbadət yerləri murdarlanır, cəmiyyətlər terrora məruz qalır, onlayn platformalar nifrətlə doludur. Bu hərəkətlər təkcə iyrənc deyil, həm də bizim ümumi insanlığımız üçün təhlükədir.

İnsanların öz inanclarına görə hədəf alındığı, nifrət ritorikasına nəzarət olunmadığı, cəzasızlıq mühitinin hökm sürdüyü bir şəraitdə hər kəs risk altındadır. Biz bu təhlükə ilə üz-üzə qalmalıyıq. Hökumətlər ayrı-seçkiliyə qarşı güclü qanunlar qəbul etməli və həyata keçirməli, hamı üçün hörmət, inklüzivlik və insan hüquqlarını təşviq edən təhsilə sərmayə qoyulmalıdır. Siyasi, dini və icma liderləri bölücü taktikalardan imtina etməli, habelə icmalar daxilində və icmalar arasında dialoqa dəstək verməlidirlər. Rəqəmsal platformaları nifrət meqafonuna çevirməmək üçün internet məkanında təhlükəsizlik tədbirləri artırılmalı və əlavə qorunma vasitələri daxil edilməlidir.

Bu Beynəlxalq Gündə biz qurbanları yad edirik və hərəkətə keçməyi öhdəmizə götürürük. Gəlin, müxtəlifliyin qeyd olunduğu, hər kəsin təhlükəsiz və ləyaqət içində yaşaya biləcəyi bir dünya qurmaq üçün birlikdə olaq”.

AZƏRTAC BMT-nin saytına istinadla xəbər verir ki, baş qərargahda keçirilən tədbirdə terror hücumlarından sağ çıxan insanlar bir araya gələrək siyasətin formalaşdırılmasında və terror aktlarının qarşısının alınmasında qlobal miqyasda səylərin artırılmasının zəruriliyini vurğulayıblar.

BMT-nin Terrorla Mübarizə İdarəsinin (UNOCT) rəhbəri Vladimir Voronkov yüksəksəviyyəli anım mərasimində çıxışı zamanı deyib: “Bu beynəlxalq gün təkcə anımla bağlı deyil, həmçinin hər yerdə qurbanların hüquqlarını, ləyaqətini və səslərini qorumaq üçün kollektiv öhdəliyin daha bir təzahürüdür. Həyatları terrorçular tərəfindən məhv edilən qurbanların xatirəsini ehtiramla anırıq, ağrı, itki və travma ilə yaşamağa davam edənlərlə həmrəyik”.

Tədbirdə terror aktları zamanı sağ qalanların və həlak olanların yaxınlarının ifadələri səsləndirilib. Qeyd edilib ki, keçən ilin aprel ayında UNOCT güclü bir həqiqəti əks etdirən qlobal təşəbbüs olan Terrorizm Qurbanları Assosiasiyaları Şəbəkəsini (VoTAN) təsis edib. Sağ qalanların səsi siyasəti formalaşdırmaq və oxşar hücumların qarşısını almaq üçün dəyişikliklərə təkan vermək üçün vacibdir.

Paylaş:

Baxılıb: 308 dəfə