Əfqanıstanda zəlzələ qurbanlarının sayı artır, sağ qalanlar isə humanitar fəlakətlə üzləşə bilər

Bakı:

26 °C

53 %

4 m/s

Əlaqə

AZ RU EN

Ana səhifə / Dünya / Əfqanıstanda zəlzələ qurbanlarının sayı artır, sağ qalanlar isə humanitar fəlakətlə üzləşə bilər

Əfqanıstanda zəlzələ qurbanlarının sayı artır, sağ qalanlar isə humanitar fəlakətlə üzləşə bilər

04.09.2025 [22:53]

Xilasedicilər bu həftə Əfqanıstanda zəlzələlər nəticəsində dağılmış evlərin dağıntıları altından cəsədləri çıxarmaq üçün mübarizə aparır, beynəlxalq yardım agentlikləri qida, sığınacaq və dərman ehtiyatının azaldığı barədə xəbərdarlıq edir və bu fonda sağ qalanları qaranlıq gələcək gözləyir.

AZƏRTAC “Reuters” agentliyinə istinadla xəbər verir ki, ölkənin şərqində zəlzələdən zərər çəkmiş dağlıq ərazilərdə axtarış əməliyyatları çərşənbə günü axşam saatlarında davam edib, səlahiyyətlilər daha çox cəsədin çıxarıldığını bildiriblər. Dəqiq sayı hələ müəyyən edilməsə də, ölənlərin sayının 1457 nəfəri ötdüyü xəbər verilir.

Ən çox zərərə uğrayan Kunar əyalətində sağ qalanlar bildirirlər ki, onlara məxsus olan hər şey məhv olub.

Əfqanıstanda son illərdəki ən ölümcül zəlzələlərdən biri olan ilk 6 bal gücündə zəlzələ bazar günü Kunar və Nangarhar əyalətlərində geniş dağıntılara və tələfata səbəb olub, onun episentri 10 kilometrlik dayaz dərinlikdə yerləşib. Çərşənbə axşamı günü 5,5 bal gücündə ikinci zəlzələ çaxnaşmaya səbəb olub və xilasetmə işlərini yarımçıq qoyub, çünki zəlzələ dağlardan qayaların uçmasına və ucqar ərazilərdə kəndlərə gedən yolların bağlanmasına gətirib çıxarıb.

Hakimiyyət orqanları daha 3400 nəfərin yaralandığı, 6700-dən çox evin dağıldığı barədə məlumat verib. BMT xəbərdarlıq edib ki, insanlar dağıntılar altında qaldıqları üçün ölənlərin sayı arta bilər.

Beynəlxalq Qızıl Xaç və Qızıl Aypara Cəmiyyətləri Federasiyası (IFRC) bildirir ki, humanitar ehtiyaclar “kütləvi şəkildə və sürətlə artır”.

Müharibə, yoxsulluq və azalan humanitar yardımdan əziyyət çəkən, ağır hava şəraitinin əlavə problem yaratdığı 42 milyon əhalisi olan Cənubi Asiya ölkəsində xilasetmə və bərpa səyləri üçün resurslar məhduddur.

Ümumdünya Səhiyyə Təşkilatı tələbin artması fonunda dərman, ilk tibbi yardım dəstləri və zəruri malların tədarükünü təmin etməyin vacib olduğunu bəyan edib və bildirib ki, 3 milyon dollarlıq maliyyə çatışmazlığı var. BMT-nin Ümumdünya Ərzaq Proqramı isə sağ qalanları dəstəkləmək üçün lazım olan maliyyə və təchizatın yalnız dörd həftə kifayət edəcəyini vurğulayıb. Bu barədə onun rəhbəri Con İlieff çərşənbə günü “Reuters” agentliyinə bildirib.

Paylaş:

Baxılıb: 461 dəfə