Türkiyədə bərpaolunan mənbələrdən enerji istehsalı artır

Bakı:

24 °C

63 %

10 m/s

Əlaqə

AZ RU EN

Ana səhifə / Dünya / Türkiyədə bərpaolunan mənbələrdən enerji istehsalı artır

Türkiyədə bərpaolunan mənbələrdən enerji istehsalı artır

23.02.2026 [20:10]

Türkiyə Energetika və Təbii Sərvətlər Nazirliyinin açıqlamasına görə, hazırda bərpaolunan enerji ümumi quraşdırılmış elektrik enerjisi tutumunun 77.114 meqavatını və ya 62,5 faizini təşkil edir.

AZƏRTAC Anadolu agentliyinə istinadla xəbər verir ki, yanvar ayının sonuna olan məlumata görə, quraşdırılmış elektrik enerjisi tutumunda Günəş enerjisinin payı 25.827 meqavata və ya 20,9 faizə, külək enerjisinin payı isə 12,1 faizlik payını qoruyaraq 14.862 meqavata çatıb. Günəş və külək enerjisinin quraşdırılmış ümumi gücü yanvar ayında 40.689 meqavata çatıb ki, bu da 33 faizlik pay deməkdir.

Energetika və təbii sərvətlər naziri Alparslan Bayraktar Türkiyənin quraşdırılmış Günəş və külək enerjisi tutumunu 2035-ci ilə qədər 120.000 meqavata çatdırmağı hədəflədiklərini bildirib. O əlavə edib: “Son 23 ildə ölkəmizdə bərpaolunan enerji sahəsində səssiz bir inqilab həyata keçirdik. Quraşdırılmış Günəş və külək gücümüzü demək olar ki, sıfırdan bu gün 40.000 meqavata çatdırdıq. Beləliklə, külək və Günəş enerjisi sahəsində 120.000 meqavat hədəfimizin üçdə birinə nail olduq”.

Daha sonra 120.000 meqavatlıq hədəfə çatmaq üçün fərqli modellər tətbiq etdiklərini vurğulayan Bayraktar qeyd edib: “Bunlardan biri bərpaolunan enerji resursları sahələridir (YEKA). İnvestorların böyük marağını cəlb edən YEKA tenderlərinə keçən il 3800 meqavat güc ayırdıq. Hər il ən azı 2000 meqavat YEKA tenderləri təşkil etməyə davam edəcəyik. Bundan əlavə, sənayeçilərimizin özünün istehlakı üçün Günəş elektrik stansiyalarına (GES) marağı davam edir. Bu çərçivədə yanvar ayında onların özünün istehlakı üçün 3500 meqavat güc ayıracağımızı elan etdik. Burada öz istehlakı üçün elektrik enerjisi istehsal edəcək dövlət qurumlarına və strateji sektorlara üstünlük verəcəyik”.

Bayraktar hökumətlərarası müqavilələr vasitəsilə daha rəqabətli qiymətlərlə genişmiqyaslı layihələr hazırlandığını və Səudiyyə Ərəbistanının Türkiyədə ümumi gücü 5000 meqavat olan Günəş və külək elektrik stansiyaları inşa edəcəyini bildirib. O əlavə edib: “İlk mərhələdə imzaladığımız 2000 meqavatlıq Günəş elektrik stansiyası layihələri ilə Türkiyədə ən ucuz elektrik enerjisini 25 il müddətinə sabit qiymətə alacağıq. Qarşılıqlı qazanc prinsipi əsasında hərəkət edərək qarşıdakı dövrdə yeni ikitərəfli müqavilələr bağlaya bilərik. Yeni müqavilələr quraşdırılmış gücümüzü və təchizat təhlükəsizliyini daha da artıracaq”.

Paylaş:

Baxılıb: 424 dəfə