Rəqəmsal linqafon laboratoriyası Çin dilinin tədrisi səviyyəsini yüksəldəcək

Bakı:

23 °C

60 %

1 m/s

Əlaqə

AZ RU EN

Ana səhifə / Elm / Rəqəmsal linqafon laboratoriyası Çin dilinin tədrisi səviyyəsini yüksəldəcək

Rəqəmsal linqafon laboratoriyası Çin dilinin tədrisi səviyyəsini yüksəldəcək

18.10.2014 [11:13]

Oktyabrın 17-də Bakı Dövlət Universitetinin (BDU) nəzdindəki Konfutsi İnstitutunda rəqəmsal linqafon laboratoriyası istifadəyə verilib.
AzərTAc xəbər verir ki, alim və mütəxəssislərin, tələbələrin, Çin Xalq Respublikasının (ÇXR) Azərbaycandakı səfiri Xun Tsyuinin iştirak etdikləri açılış mərasimində BDU-nun rektoru, Milli Məclisin deputatı, akademik Abel Məhərrəmov Azərbaycan ilə Çin Xalq Respublikası arasında əlaqələrin, o cümlədən elm, təhsil sahəsində əməkdaşlığın əhəmiyyətindən danışıb.
Rektor Azərbaycan Prezidenti İlham Əliyevin bu ilin mayında Çinə səfərinin iki ölkə arasındakı münasibətlərin inkişafında əhəmiyyətli rolunu vurğulayıb.
Müasir dünyada elmə, təhsilə xüsusi önəm verildiyini qeyd edən akademik A. Məhərrəmov Bakı Dövlət Universitetinin ÇXR-in Anhoy Universiteti ilə əlaqələri və BDU-nun nəzdindəki Konfutsi İnstitutunun fəaliyyəti barədə məlumat verib, rəqəmsal linqafon laboratoriyasının Çin dilinin tədrisi səviyyəsinin yüksəldilməsində mühüm rolu olacağını bildirib.
Çin Xalq Respublikasının Bakıdakı səfiri Xun Tsyuin öz ölkəsi ilə Azərbaycanın dostluq münasibətlərindən bəhs edib. İki ölkə arasında elm, təhsil əlaqələrinin genişləndirilməsi barədə fikirlərini bölüşən X.Tsyuin, yeni laboratoriyadan səmərəli istifadə ediləcəyinə əminliyini bildirib.
Tədbirdə məlumat verilib ki, BDU-nun nəzdindəki Konfutsi İnstitutu 2011-ci ildə yaradılıb. Tələbələr, gənclər burada Cin dilini öyrənir, Çin tarixi, mədəniyyəti ilə tanış olurlar.
Bakı Dövlət Universitetində fəaliyyət göstərən Konfutsi İnstitutunun BDU-nun nəzdindəki “Gənc İstedadlar” liseyində, Azərbaycan Respublikasının Prezidenti yanında Dövlət İdarəçilik Akademiyasında, “ADA” Universitetində, Azərbaycan Dövlət Teleqraf Agentliyində, Qərb Universitetində, Xəzər Universitetində, Avrasiya Universitetində filialları yaradılıb.
Qeyd olunub ki, Konfutsi İnstitutlarının Mənzil-Qərargahının sponsorluğu ilə təchiz edilmiş yeni açılan laboratoriya ən müasir layihələr üzrə yaradılıb.
BDU-nun nəzdindəki Konfutsi İnstitutunun Azərbaycan tərəfindən direktoru Oqtay Cəlilbəyli, ÇXR tərəfindən direktoru Hu Fenxua laboratoriyanın təşkilində xidməti olanlara təşəkkürlərini bildiriblər.
Konfutsi İnstitutunun üçilliyinə həsr edilmiş sənədli film nümayiş etdirilib.
Sonra tədbir iştirakçıları müasir avadanlıqla təchiz edilmiş laboratoriya ilə tanış olublar.

Paylaş:

Baxılıb: 2302 dəfə