Təhsil və mədəniyyət işçiləri Konstitusiya islahatlarını dəstəkləyir

Bakı:

18 °C

68 %

7 m/s

Əlaqə

AZ RU EN

Ana səhifə / Gündəm / Təhsil və mədəniyyət işçiləri Konstitusiya islahatlarını dəstəkləyir

Təhsil və mədəniyyət işçiləri Konstitusiya islahatlarını dəstəkləyir

04.03.2009 [16:57]

“Yeni Azərbaycan” təşviqat qrupu Xırdalan şəhərində görüş keçirib
Dünən “Yeni Azərbaycan” təşviqat qrupunun Abşeron rayon şöbəsi Xırdalan şəhərində təhsil və mədəniyyət işçiləri ilə görüş keçirib. Görüşü giriş nitqi ilə açan “Yeni Azərbaycan” təşviqat qrupunun Abşeron rayon şöbəsinin sədri Bilman Vəliyev bildirib ki, Referendum üzrə “Yeni Azərbaycan” təşviqat qrupu ölkənin bütün bölgələri üzrə seçicilərlə görüş keçirir, Azərbaycanın demokratik inkişafına xidmət edən əlavə və dəyişikliklər barədə ətraflı maarifləndirmə işi aparır: “Əsası ümummilli liderimiz Heydər Əliyev tərəfindən qoyulmuş və bu gün Azərbaycan Prezidenti İlham Əliyev tərəfindən uğurla davam etdirilən məqsədyönlü siyasət nəticəsində ölkəmiz gündən-günə inkişaf edir, iqtisadi, sosial potensialı artır. Bu gün Azərbaycanda elə bir sahə tapmaq mümkün deyil ki, orada böyük işlər, islahatlar nəzərə çarpmasın. Həmçinin, hüquq sahəsində görülən işlər Azərbaycanda vətəndaş cəmiyyətinin qurulması prosesinə öz müsbət töhfəsini verib, insan hüquq və azadlıqlarının möhkəmləndirilməsinə xidmət edib. Lakin bu prosesin davamlı olması, gələcəkdə baş verə biləcək problemlərin indidən aradan qaldırılması üçün Konstitusiyada olan boşluqları aradan qaldırmağa, islahatlar aparmağa ehtiyac yaranıb”.
Natiq qeyd edib ki, təklif olunan əlavə və dəyişikliklər insanlarımızın hüquqlarının artırılmasına, onların sosial rifah halının yüksəldilməsinə, ölkədə demokratiyanın inkişafına xidmət edir.
Tədbirdə çıxış edən “Yeni Azərbaycan” təşviqat qrupunun vəkili, APİ-nin rektoru Yusif Məmmədov referendumun keçirilməsi prosedurları haqqında danışıb. Natiq, eyni zamanda, Konstitusiyaya təklif olunan əlavə və dəyişikliklər barədə ətraflı məlumat verib: “Təklif olunan əlavə və dəyişikliklər sırasında əsaslı və texniki dəyişikliklər var. Məsələn, 17-ci maddəyə təklif olunan əlavə ilə dövlətimiz mühüm bir addım atmış olur. Yəni, dövlət kimsəsiz uşaqları himayəyə götürməklə gələcəyimizi, genofondumuzu qoruyur. Milli Bankın, Prezident Aparatının adının dəyişdirilməsi isə texniki xarakterlidir”.
Natiq çıxışının sonunda vurğulayıb ki, Konstitusiya islahatları xalqımızın firavan yaşamasına, dövlətimizin demokratik yolla inkişafına hesablanıb.
Onu da qeyd edək ki, “Yeni Azərbaycan” təşviqat qrupunun Abşeron rayon şöbəsinin tədbirində öncə sadə vətəndaşların Konstitusiyaya təklif edilən əlavə və dəyişikliklərlə bağlı nə dərəcədə məlumatlı olduğunu öyrənmək məqsədilə sorğu keçirdik.
Elnur Zeynalov - sakin:
- Mən Azərbaycan xalqını Konstitusiyaya əlavə və dəyişikliklərə səs verməyə çağırıram. Xalqımız bu layihəyə səs verməklə öz gələcəyini sosial cəhətdən təminat altına almış olur.
Səriyyə Səlimova - sakin:
Dəyişikliklərlə tanış olmuşuq. Əlavə və dəyişikliklər dövlətimizin inkişafına, insanların rifah halının daha da yaxşılaşmasına xidmət edir.
Samirə Məmmədova - sakin:
- Biz hər zaman dövlətçiliyə bağlı insanlarıq. Bu dəfə də dövlətimizin yanındayıq və referenduma çıxarılan məsələlərə səs verəcəyik.
Mənsumə İsayeva - sakin:
- Əlavə və dəyişiklikləri dəstəkləyirəm. Martın 18-də keçiriləcək referendumda bu dəyişikliklərin lehinə səs verəcəyəm. İnanıram ki, ölkəmiz hər zaman olduğu kimi demokratik yolla irəliləyəcək və daha da inkişaf edəcək.
Samirə Əzimova - sakin:
- Bu gün Azərbaycan çox inkişaf edib. Təklif olunan məsələlər insanlarımızın həyat səviyyəsini daha da artıracaq. Mən də hamı kimi, bu əlavə və dəyişikliklərin lehinə səs verəcəm.
Xanverdi Kazımov - sakin:
- Dövlətimiz vətəndaşlarının sosial qayğılarını öz ali məqsədi saymağı planlaşdırır. Təbii ki, bu ölkənin vətəndaşı olaraq, həmin məsələnin reallaşdırılmasını dəstəkləmək lazımdır.
çinarə Əliyeva - təhsil işçisi:
- Bizlərə təqdim olunan əlavə və dəyişikliklərlə əyani tanış olduqdan sonra hər şey bəlli olur. Müxalifət yalandan bəyan edir ki, guya bu məsələlər düz deyil. Amma məsələlərə nəzər saldıqda bəlli olur ki, onlar yenə də xalqı aldadır. Burada qeyd olunanlar dövlətin insana qayğısını artırır. Mən də hamı kimi, bu əlavə və dəyişikliklərin tərəfdarıyam.
İradə Süleymanova - sakin:
- Olduqca mühüm və gözəl dəyişikliklərdir. Hər bir maddə xalqın yaşayışını gözəlləşdirməyə yönəlib. Mən də hamı kimi, bu məsələləri dəstəkləyirəm.
Ramil VƏLİBƏYOV

Paylaş:

Baxılıb: 1681 dəfə