ABŞ-ın qanunverici orqanının birtərəfli mövqeyi qaçqın və məcburi köçkün gəncləri məyus edir

Bakı:

4 °C

65 %

8 m/s

Əlaqə

AZ RU EN

Ana səhifə / Gündəm / ABŞ-ın qanunverici orqanının birtərəfli mövqeyi qaçqın və məcburi köçkün gəncləri məyus edir

ABŞ-ın qanunverici orqanının birtərəfli mövqeyi qaçqın və məcburi köçkün gəncləri məyus edir

18.12.2009 [09:34]

Zəbt olunmuş Azərbaycan ərazisində dünyanın heç bir dövləti tərəfindən tanınmayan separatçı rejim beynəlxalq hüquq normalarına zidd fəaliyyət göstərməkdədir
ABŞ Nümayəndələr Palatasının və Senatın 2010-cu ildə Ermənistana və Dağlıq Qarabağ ermənilərinə iqtisadi yardım paketini qəbul etməsi məsələsi Azərbaycan ictimaiyyətində təəssüf doğurmaqdadır. Azərbaycanın mediası hələ də bu məsələni müzakirə edir, müxtəlif QHT-lər, ictimai təşkilatlar bu məsələ ilə bağlı narahatlıqlarını ABŞ Prezidenti Barak Obamaya çatdırmaq üçün bəyanatlar qəbul edirlər. Azərbaycan Qaçqın və Məcburi Köçkün Gənclər Təşkilatı da etirazını bildirmək məqsədilə bəyanat yayıb. Bəyanatda deyilir: “Cənubi Qafqaz bölgəsində müharibə və terror ocağı yaradan Ermənistan hələ də Azərbaycan Respublikasının Dağlıq Qarabağ bölgəsini və ona bitişik 7 rayonu işğal altında saxlayır. Zəbt olunmuş Azərbaycan ərazisində dünyanın heç bir dövləti tərəfindən tanınmayan separatçı rejim beynəlxalq hüquq normalarına zidd fəaliyyət göstərməkdədir. Hazırda Ermənistan Dağlıq Qarabağ məsələsi ilə bağlı sülh danışıqları prosesində qeyri-konstruktiv mövqe tutmaqda davam edir. Azərbaycan xalqı, xüsusilə də biz qaçqın və məcburi köçkünlər 20 ilə yaxındır ki, erməni terror və təcavüzündən əziyyət çəkirik. Təəssüf ki, nüfuzlu beynəlxalq təşkilatların Ermənistan-Azərbaycan, Dağlıq Qarabağ münaqişəsinə dair qətnamələrinin və qərarlarının həyata keçirilməsi indiyədək təmin edilməmişdir. Vəziyyətin bu cür davam etməsi Cənubi Qafqaz regionunda sülhün və sabitliyin təmin olunmasına təhlükə yaratmaqdadır”.
Bəyanatda, həmçinin, vurğulanır ki, Azərbaycan xalqının səbrinin tükəndiyi bir vaxtda, ABŞ Konqresinin Dağlıq Qarabağdakı separatçı rejimə 8 milyon ABŞ dolları məbləğində vəsait ayırması qaçqın və məcburi köçkün gənclərdə hiddət və təəssüf hissi doğurur: “çünki etnik təmizləməyə məruz qalan, ərazisinin 20 faizi işğal edilən və 1 milyona yaxın qaçqını olan ermənilər deyil, Azərbaycan xalqıdır. Belə olan halda maddi dəstək zərər çəkən xalqa, yoxsa, işğalçıya göstərilməlidir? Bu vəsaiti ayırmaq Ermənistanın hərbi təcavüzkarlıq və terror siyasətinə dəstək vermək deyilmi? Qarabağ probleminin həlli missiyasını üzərinə götürmüş ATƏT-in Minsk qrupunun həmsədri olan bir dövlətin qanunverici orqanının bu cür birtərəfli mövqeyi biz qaçqın və məcburi köçkün gəncləri məyus edir. Biz ABŞ Prezidenti Barak Obamanı özünün veto hüququndan istifadə edərək, Dağlıq Qarabağdakı erməni separatçılarına maddi yardım göstərilməsinin qarşısını almağa çağırırıq. İnanırıq ki, ABŞ Prezidenti bizim çağırışımızı dəstəkləyəcək və separatçı quruma maddi yardım göstərilməsi məsələsinə razılıq verməyəcəkdir”.
Bir daha xatırladaq ki, ABŞ Konqresinin Ermənistana və Dağlıq Qarabağ ermənilərinə ayırdığı iqtisadi yardım paketi çərçivəsində işğalçı dövlət Ermənistana 41 milyon dollar, separatçı Dağlıq Qarabağ ermənilərinə isə 8 milyon dollar məbləğində iqtisadi yardım ayrılıb. Azərbaycan ictimaiyyətini isə narahat edən əsas məqam ölkəmizin ərazi bütövlüyünü tanıdığını və dəstəklədiyini, münaqişənin ədalətli həllinə çalışdığını dəfələrlə ən yüksək səviyyələrdə bəyan etmiş ABŞ-ın Dağlıq Qarabağdakı separatçı rejimə dəstək verməsidir. Bu, beynəlxalq aləmdə ABŞ-ın demokratik imicinə ciddi zərbə vurur və rəsmi Vaşinqtona qarşı inamsızlığı gücləndirir. Digər tərəfdən, əksər ekspertlərin də qeyd etdikləri kimi, indiki halda ABŞ Konqresinin Dağlıq Qarabağa 8 milyon dollar yardım ayırması Azərbaycanın ərazi bütövlüyünün pozulmasına, separatçılığa dəstək, haqsızlıq və ədalətsizlikdir. Daha doğrusu, Dağlıq Qarabağın Azərbaycanın Ermənistan tərəfindən işğal olunmuş bölgəsi olduğunu, hazırda bu bölgədə özünü müstəqil dövlət elan etmiş separatçı rejimin mövcudluğunu nəzərə alsaq, ABŞ-ın son addımı heç bir şəkildə anlaşılan deyil.

Paylaş:

Baxılıb: 1122 dəfə