Ermənistan işğal edilmiş ərazilərin tarixi və mədəni simasını dəyişmək məqsədi ilə ardıcıl tədbirlər görməkdədir

Bakı:

17°C

67%

5m/s

AZ RU EN

Ana səhifə / Gündəm / Ermənistan işğal edilmiş ərazilərin tarixi və mədəni simasını dəyişmək məqsədi ilə ardıcıl tədbirlər görməkdədir

Ermənistan işğal edilmiş ərazilərin tarixi və mədəni simasını dəyişmək məqsədi ilə ardıcıl tədbirlər görməkdədir

09.10.2010 [12:38]

Azərbaycan tərəfi əmindir ki, ATƏT-in qiymətləndirici missiyası obyektiv işləyəcək və ermənilərin bölgədə beynəlxalq hüquq normalarına uyğun gəlməyən əməllərinin qarşısının alınması üçün əhəmiyyətli tədbirlər görəcək
Ermənistan Azərbaycan torpaqlarını işğal etməsi faktını ört-basdır etmək üçün müxtəlif vasitələrdən istifadə edir. Təcavüzkar dövlət tarixi saxtalaşdırmaqdan, Azərbaycanın ərazilərinə erməni ailələri köçürməkdən, eyni zamanda, Azərbaycan mədəniyyətinə qarşı vandalizm həyata keçirməkdən belə çəkinmir.
Ermənistan işğal etdiyi torpaqlarda azərbaycanlı izini silmək üçün xüsusilə, Dağlıq Qarabağdakı müsəlman qəbiristanlıqlarını hər fürsət düşəndə dağıdır, Laçında kilsəyə böyük xaç qoydurur, erməniləşdirməyə xidmət edən digər təyinatlı fəaliyyətlər həyata keçirirlər. Məhz bu günədək əldə olunan çoxsaylı faktlar da bu qanunsuz əməllərin düşünülmüş şəkildə həyata keçirildiyini sübuta yetirir.
Belə ki, ABŞ-ın qaçqınlar üzrə Komitəsinin qaçqınların vəziyyəti ilə bağlı 2002-ci il ümumdünya icmalında Ermənistan üzrə məruzədə 1000-ə yaxın ailənin Ermənistandan Dağlıq Qarabağ və Laçın dəhlizinə köçürüldüyü açıqlanıb. Süni məskunlaşmanın mövcudluğunu təsdiqləyən başqa bir fakt isə Beynəlxalq Qırmızı Xaç Komitəsinin 2004-cü ildə yaydığı məlumatdır. Təşkilatın apardığı hesablamalara görə, Dağlıq Qarabağ ərazisinə hər ay orta hesabla 15 ailə köçürülür. Azərbaycan torpaqlarında ermənilərin qanunsuz olaraq məskunlaşdırılması faktı ATƏT tərəfindən də təsdiqlənib. 2005-ci ildə Azərbaycanın işğal altındakı ərazilərinə göndərilən ATƏT-in faktaraşdırıcı missiyası həmin ərazilərdə insanların məskunlaşdırılması faktını aşkara çıxarıb.
Amma münaqişənin həlli istiqamətində danışıqlar prosesinin davam etməsindən və işğal edilmiş ərazilərin nəzarətdən kənarda qalmasından istifadə edərək işğalçı Ermənistan Azərbaycan torpaqlarına erməni ailələrinin köçürülməsini təşviq etməkdə davam edir. BMT Baş Assambleyasının sessiyasındakı çıxışında bu məsələyə toxunan Prezident İlham Əliyev bu qanunsuz əməlin beynəlxalq hüquq normalarını və azərbaycanlı məcburi köçkünlərin mülkiyyət hüquqlarını pozduğunu bildirib: “İşğal edilmiş ərazilərə insanların köçürülməsi, eləcə də, tarixi və mədəni irsin məhv edilməsi, mənimsənilməsi orada aparılan qeyri-qanuni fəaliyyətin müxtəlif formaları ilə yanaşı, məcburi köçkünlərin mülkiyyət hüquqlarına da birbaşa zərər vurur”.
Prezident İlham Əliyev, eyni zamanda, Ermənistanın işğal olunmuş torpaqlarda Azərbaycan xalqına məxsus abidələri məqsədli şəkildə məhv etməsi faktını da dünya ictimaiyyətinin nəzərinə çatdırıb. Dövlət başçısının bildirdiyi kimi, torpaqların azərbaycanlılara məxsus olduğunu inkar etmək üçün bölgənin tarixi və mədəni siması dəyişdirilir: “Ermənistan işğal edilmiş ərazilərdə Azərbaycanın mədəni və tarixi köklərini nümayiş etdirən maddi sübutları yox etməyə çalışaraq, həmin yerlərin tarixi və mədəni simasını dəyişmək məqsədi ilə ardıcıl tədbirlər görməkdədir”.
Yeri gəlmişkən, qeyd edək ki, müasir dövrdə işğal altında olan nəzarətsiz yerlər beynəlxalq terminologiyaya əsasən, “boz zonalar” adlandırılır. Məhz həmin zonalarda işğalçı dövlətin nəzarəti ilə qanunla qadağan olunmuş hərəkətlər həyata keçirilir. Ermənistan məhz Dağlıq Qarabağı “boz zona”ya çevirib. Bu səbəbdən də, Azərbaycan əzəli torpaqlarında baş verən proseslərə nəzarət edə bilmir.
Soçi şəhərində keçirilmiş təhlükəsizlik məsələlərinə nəzarət edən yüksək vəzifəli nümayəndələrin Birinci Beynəlxalq görüşündə çıxış edən Azərbaycan Respublikası Prezidenti Administrasiyasının rəhbəri, Təhlükəsizlik Şurasının katibi, akademik Ramiz Mehdiyev deyib ki, terrorçu qrupların “boz zonalar” adlandırılan ərazilərdə fəaliyyət göstərən müxtəlif profilli kriminal təşkilatlarla birləşməsi cinayətkarlıq üçün böyük potensial yaradır və çox təhlükəli meyildir: “Ermənistan silahlı qüvvələrinin işğal etdiyi Azərbaycanın Dağlıq Qarabağ bölgəsi və onun ətrafındakı yeddi rayonunun ərazisində məhz belə nəzarət olunmayan zona yaradılmışdır. Daxil olan əməliyyat məlumatları və prosessual şəkildə sübut olunmuş faktlar israrla söyləməyə əsas verir ki, bu ərazidən narkotik vasitələrin istehsalı, silah və insan tranziti və alveri, qeyri-leqal miqrasiya, terrorçuların göndərilməsi və gizlədilməsi, qanunsuz pul vəsaitlərinin leqallaşdırılması və transmilli cinayətkarlığın digər təhlükəli növləri üçün fəal istifadə olunur. Milli və beynəlxalq hüququn təsir dairəsindən kənarda qalan bu zona və digər belə ərazilər qeyd olunan təhdidlərə adekvat və vaxtında münasibət göstərilməsi üçün əlçatmaz qalır. Buna görə də, biz Ermənistan-Azərbaycan, Dağlıq Qarabağ münaqişəsinin həlli ilə əlaqədar məsələlərə milli və regional təhlükəsizliyin təmin olunması, terror təhlükəsinin və digər təhdidlərin aradan qaldırılması sahəsində işin bir hissəsi kimi baxırıq”.
Bütövlükdə, bu ərazidə cərəyan edən hadisələr region üçün təhlükəli vəziyyət vəd edir. Azərbaycan hər bir vəcdlə çalışır ki, torpaqlarını işğaldan azad etsin və Dağlıq Qarabağdakı qeyri-qanuni hərəkətlərə son qoysun. Bu səbəbdən də, Azərbaycan bütün hüquqi yollardan istifadə edir. Məhz Ermənistanın Dağlıq Qarabağdakı vandalizm əməllərinə son qoymaq üçün rəsmi Bakı dəfələrlə Azərbaycanın erməni işğalı altında olan ərazilərinə qiymətləndirici missiyanın göndərilməsi ilə bağlı ATƏT-ə və digər beynəlxalq təşkilatlara müraciətlər ünvanlayıb. Azərbaycan Respublikası Prezidenti Administrasiyasının ictimai-siyasi məsələlər şöbəsinin müdiri Əli Həsənov jurnalistlərə açıqlamasında deyib ki, bu müraciətlərin əsasını işğal olunmuş Azərbaycan torpaqlarının biosferinin məhv edilməsi, orada yanğınların törədilməsi, zəbt edilmiş ərazilərdə qeyri-qanuni məskunlaşma, silah və silahlı qüvvələr yerləşdirilməsi, narkotik maddələr becərilməsi, istehsalı, qaçaqmalçılıq və başqa məsələlər təşkil edir: “Bu məsələlərlə bağlı Azərbaycanın müvafiq qurumları bir neçə dəfə qiymətləndirici missiyalara müraciət edib və onların həmin ərazilərə gəlmələrini təmin edib. Hazırkı missiya da onlardan biridir. Əminik ki, bu missiya obyektiv işləyəcək və ermənilərin bölgədə beynəlxalq hüquq normalarına uyğun gəlməyən əməllərinin qarşısının alınması üçün əhəmiyyətli tədbirlər görəcək”.
Bir sözlə, bu gün Ermənistanın məqsədli və düşünülmüş şəkildə Azərbaycanın əzəli torpaqlarında erməniləşdirmə siyasəti aparması haqqında kifayət qədər faktlar var. Bu səbəbdən də, Azərbaycan tərəfi ümid edir ki, ATƏT-in qiymətləndirici missiyası obyektiv işləyəcək və ermənilərin bölgədə beynəlxalq hüquq normalarına uyğun gəlməyən əməllərinin qarşısının alınması üçün əhəmiyyətli tədbirlər görəcək.
Ramil VƏLİBƏYOV

Paylaş:

Baxılıb: 956 dəfə