Oğuz-Qəbələ-Bakı su kəmərinin tikintisi yeni iş yerlərinin və istehsal müəssisələrinin yaradılmasına səbəb olub

Bakı:

15°C

82%

5m/s

AZ RU EN

Ana səhifə / Gündəm / Oğuz-Qəbələ-Bakı su kəmərinin tikintisi yeni iş yerlərinin və istehsal müəssisələrinin yaradılmasına səbəb olub

Oğuz-Qəbələ-Bakı su kəmərinin tikintisi yeni iş yerlərinin və istehsal müəssisələrinin yaradılmasına səbəb olub

18.01.2011 [09:44]

Kəmərin tikintisi Azərbaycanın güclü maliyyə resurslarına malik olduğunu və ən nəhəng layihələri öz imkanları hesabına həll etmək qüdrətini bir daha təsdiqləyir
2010-cu ildə paytaxt sakinləri üçün ən böyük töhfə olan Oğuz-Qəbələ-Bakı su kəmərinin istifadəyə verilməsi şəhər əhalisinin içməli su ilə təminatında mühüm dönüş yaratmaqla yanaşı, ümumilikdə ölkəmizin sosial-iqtisadi sferasında əhəmiyyətli dəyişikliklərə də səbəb olub. Su kəmərinin çəkilməsi yeni müəssisələrin fəaliyyətə başlamasına, iş yerlərinin yaradılmasına, əhalinin məşğulluğunun yüksəldilməsinə, ölkəmizin sənaye sektorunda mühüm dəyişikliklərə, istehsal olunan yerli məhsulların ixracının artmasına, sosial infrastrukturun yenidən qurulmasında yeni təcrübənin tətbiq edilməsinə imkan verib. Eyni zamanda, bu layihə respublikamızın iqtisadi qüdrətini, nəhəng sosial infrastruktur və investisiya layihələrini həyata keçirmək üçün güclü maliyyə resurslarına malik olduğunu bir daha təsdiqləyir.
Məlum olduğu kimi, Oğuz-Qəbələ-Bakı su kəmərinin çəkilməsi Azərbaycanın dövlət başçısının gərgin əməyinin və qarşıya qoyduğu hər bir məqsədə çatmaq uğrunda apardığı əzmkarlığının nəticəsində mümkün olub. 2007-ci ildən 2010-cu ilin dekabr ayına kimi görülən irimiqyaslı işlər bu layihəyə xeyli həcmdə mal-material, avadanlıq, texnika və böyük işçi qüvvəsinin cəlb olunduğunu göstərir. Məsələn, kəmərin tikintisində ümumilikdə 285 kilometrdən çox diametri 2000 millimetr olan borular, 65 kilometrdən çox diametri 300-1600 millimetr olan boru, 15 milyon kubmetrdən çox torpaq, borunun yanlarının kipləşdirilməsi üçün 7 milyon kubmetrdən çox qum-çınqıl istifadə olunub, 1000 ədəddən çox müxtəlif diametrli siyirtmə quraşdırılıb. Bu isə həddindən artıq material və texnika deməkdir.
Kəmərin tikintisi ilə bağlı görülən işlər ölkəmizdə sənayenin inkişafında mühüm rol oynayıb. Suyun keyfiyyətinin qorunması üçün borular korroziyaya qarşı davamlı olan şüşə lifli poliestrdən hazırlanıb. Kəmərin çəkilişində istifadə olunan borular Sumqayıtdakı “Azkompozit” zavodunda istehsal olunub və dünyada ekoloji cəhətdən ən keyfiyyətli məhsul sayılır. Göründüyü kimi, layihənin icrası nəticəsində Sumqayıtda böyük bir sənaye kompleksi yaradılıb. Bu müəssisənin inkişafı sənaye sektoruna impuls verib, həmin zavodun ixrac imkanlarını artırıb. Belə ki, “Azkompozit” zavodunda istehsal olunan məhsulların yüksək keyfiyyəti və rəqabətqabiliyyətliliyi xarici dövlətlərin şüşə lifli borulara marağını artırıb. Artıq həmin məhsulların xarici ölkələrə ixrac edilməsi nəzərdə tutulur.
Onu da vurğulamaq yerinə düşər ki, Oğuz-Qəbələ-Bakı su kəmərinin çəkilişi su təminatını həll etməklə yanaşı, həm də respublikamızda iş yerlərinin yaradılması strategiyasına xidmət edib. Kəmərin çəkilişində tələb olunan avadanlıqların, mal və materialların yerli müəssisələrdə istehsal edilməsi isə ölkəmizdə minlərlə insanın iş yerləri ilə təmin olunması deməkdir. Oğuz-Qəbələ-Bakı su kəmərinin tikintisi zamanı qazılmış artezian quyuları, inşa olunmuş yarımstansiyalar, suqəbuledici qurğular kompleksi, nizamlayıcı qurğular da yerli istehsal müəssisələrinə aiddir. Bu isə layihənin bir çox komponentlərinin yerli istehsal müəssisələrinin gücü hesabına yerinə yetirildiyini göstərir. Su kəmərini normal istismar etmək üçün müxtəlif ölçmə avadanlığı və qurğular tikilib, idarəetmə sistemləri yaradılıb, ən modern texnologiyaların gücündən istifadə olunub. Yəni, bütün bu işlər sistemli xarakter daşıyır və respublikamızda yeni müəssisələrin yaradılmasına səbəb olub. Hər müəssisənin yaradılması isə yüzlərlə yeni iş yeri deməkdir.
Prezident İlham Əliyevin bəyan etdiyi kimi, Oğuz-Qəbələ-Bakı kəmərinin istifadəyə verilməsi böyük tarixi hadisədir. Dövlət başçısı əbəs yerə bu layihəni ikinci Bakı-Tbilisi-Ceyhan adlandırmayıb. Qeyd etdiyimiz kimi, bu layihə maliyyə tutumuna görə, ən iri infrastruktur obyekti hesab olunur. 4 il ərzində layihənin maliyyələşdirilməsi üçün Dövlət Neft Fondundan böyük həcmdə vəsaitlər ayrılıb. Prezident İlham Əliyevin bildirdiyi kimi, bu, Azərbaycanın güclü maliyyə resurslarına malik olduğunu və ən nəhəng layihələri öz imkanları hesabına həll etmək qüdrətini təsdiqləyir: “Hesab edirəm ki, bu da tarixi bir layihədir. O da uzun illər ərzində müzakirə olunmuşdu, hətta Sovet İttifaqı zamanı müzakirə edilmişdi. Müxtəlif fərziyyələr var idi: su ehtiyatları var, yoxdur, bunun qiyməti nə qədər olacaq, necə olacaq, maliyyə haradan olacaq? Biz özümüz etdik. Kredit istədik, alınmadı, heç kim kredit vermədi. Ondan sonra hansısa müştərək investisiya proqramını işləmək istədik, o da nəticəsiz qaldı. Nə etdik? özümüz pul ayırdıq və artıq kəmər tikilir. Bu il istismara veriləcək və Bakı əhalisi təmiz içməli su ilə təmin olunacaqdır. Yenə də deyirəm, bu, mənim üçün Bakı-Tbilisi-Ceyhan neft kəməri kimi dəyərli bir kəmərdir və o, böyük rəmzi xarakter daşıyır”.
Hazırda əhalinin içməli su ilə təminatının daha da yaxşılaşdırılması, eləcə də, məişət-suvarma suyuna olan ehtiyacların tam ödənilməsi üçün layihələr icra olunmaqdadır. Məlum olduğu kimi, qarşıdakı illərdə şəhər əhalisinin tamamilə fasiləsiz su ilə təminatı ilə bağlı davamlı işlər həyata keçiriləcək. Paytaxta yeni su xətləri çəkiləcək, mövcud kiçik diametrli borular böyükləri ilə əvəz olunacaq. Bir sözlə, su təchizatı ilə bağlı infrastruktur layihələri növbəti illərdə əsas prioritetlərdən sayılır. Taxtakörpü su anbarının, Samur-Abşeron su kanalının tikintisinin davam etdirilməsi, eləcə də, “Şəhər Su Təchizatı və Kanalizasiya Layihəsi” və “Milli su təchizatı və kanalizasiya xidmətləri” layihəsinin icrası yüzlərlə insanının iş yerləri ilə təmin olunmasına böyük imkanlar açır. Bu cür infrastruktur layihələrinin geniş vüsət alması vətəndaşlar üçün yeni iş yerləri deməkdir. Hökumət bu prosesə insanları cəlb etməklə, onların sosial vəziyyətində əsaslı dəyişikliklərə əlverişli şərait yaradır.
Elbrus CƏFƏRLİ

Paylaş:

Baxılıb: 974 dəfə