Dağlıq Qarabağ münaqişəsi Azərbaycanın ərazi bütövlüyü çərçivəsində həll edilməlidir

Bakı:

18°C

63%

1m/s

Əlaqə

AZ RU EN

Ana səhifə / Gündəm / Dağlıq Qarabağ münaqişəsi Azərbaycanın ərazi bütövlüyü çərçivəsində həll edilməlidir

Dağlıq Qarabağ münaqişəsi Azərbaycanın ərazi bütövlüyü çərçivəsində həll edilməlidir

14.07.2011 [07:32]

Prezident İlham Əliyev: Azərbaycan 2009-cu ildə və 2010-cu ilin əvvəlində öz niyyətini göstərmişdir. Bir daha göstərmişdir ki, sülh danışıqlarına sadiqdir və bu danışıqlar mütləq sülh müqaviləsinə gətirib çıxarmalıdır
Ermənistan-Azərbaycan, Dağlıq Qarabağ münaqişəsinin beynəlxalq hüquq normalarına əsasən həll edilməsi vəzifəsi Azərbaycan dövlətinin xarici siyasət strategiyasının öncül istiqamətlərindən birini təşkil edir. Məhz bu yöndə Ulu öndər Heydər Əliyevin uzaqgörənliklə müəyyənləşdirdiyi praqmatik strateji kursun Prezident İlham Əliyev tərəfindən uğurla və qətiyyətlə davam etdirilməsi Dağlıq Qarabağ münaqişəsinin həlli istiqamətində atılan addımların, aparılan danışıqların intensivləşməsinə səbəb olub. Bunun qanunauyğun nəticəsidir ki, Ermənistan-Azərbaycan, Dağlıq Qarabağ münaqişəsi mütəmadi qaydada beynəlxalq siyasi gündəmin öncül məsələlərindən birini təşkil etməkdədir. Eləcə də, beynəlxalq münasibətlər sisteminin tamhüquqlu aktorlarının, demək olar, hamısının yekdil və yekun qənaəti ondan ibarətdir ki, Ermənistan-Azərbaycan, Dağlıq Qarabağ münaqişəsi yalnız beynəlxalq hüquq normalarına əsasən həll olunmalıdır.
Prezident İlham Əliyev Nazirlər Kabinetinin 2011-ci ilin birinci yarısının sosial-iqtisadi inkişafının yekunlarına həsr olunmuş iclasındakı çıxışında qeyd edib ki, Azərbaycan danışıqların konstruktiv şəkildə aparılmasında maraqlıdır: “Azərbaycan 2009-cu ildə və 2010-cu ilin əvvəlində öz niyyətini göstərmişdir. Bir daha göstərmişdir ki, sülh danışıqlarına sadiqdir və bu danışıqlar mütləq sülh müqaviləsinə gətirib çıxarmalıdır”.
ümumiyyətlə, Ermənistan-Azərbaycan, Dağlıq Qarabağ münaqişəsi öz dinamikası və spesifikliyinə, xarakteristikasına görə xüsusi yanaşma tələb edən həssas problemlərdəndir. çünki indiki halda atılacaq hər hansı qeyri-konstruktiv və ədalətsiz bir addım nəticə etibarilə Cənubi Qafqazı “barıt cəlləyi”nə - destabil bir məkana çevirər. Bu isə ümumilikdə beynəlxalq təhlükəsizlik üçün təhdid yaradan başlıca dağıdıcı meyillərdən və faktorlardan birini təşkil edə bilər. Münaqişəşünaslıq elminin əsasları sübut edir ki, məhz bu cür münaqişələrin həllinə istər dünya ictimaiyyəti, istər aparıcı beynəlxalq təşkilatlar və aktorlar, istərsə də vasitəçi qurumlar xüsusi yanaşma göstərməlidirlər. çünki regional və qlobal miqyasda təhlükəsizliyin, strateji balansın və uzunmüddətli sabitliyin təmin edilməsi məhz bu cür dağıdıcı meyillərin aradan qaldırılmasından bilavasitə asılıdır. Dolayısıyla, münaqişənin həlli yönündə istər diplomatik vasitələrdən, istərsə də güc tətbiqi metodundan istifadə olunması yekdilliklə qəbul edilmiş zəruri praktik mexanizm hesab olunur. Buna görə də, Ermənistanın qeyri-konstruktiv mövqeyi neytrallaşdırılmalı və danışıqlara zərər yetirən halların aradan qaldırılması üçün kardinal tədbirlər görülməlidir. Bunun üçün vasitəçilik missiyasını həyata keçirən qurum və müvafiq beynəlxalq təşkilatlar öz səylərini daha da artırmalıdırlar.
Azərbaycan diplomatik səylərini gücləndirdiyi və lazımi addımları atdığı halda, işğalçı Ermənistan münaqişənin həlli müddətini uzatmağa və danışıqlar prosesini pozmağa çalışır. Prezident İlham Əliyevin qeyd etdiyi kimi, Ermənistan daim çalışır ki, status-kvo dəyişməz olaraq qalsın və guya ki, onlar danışıqlarda iştirak edirlər və konstruktivlik nümayiş etdirirlər: “Halbuki bütün dövrlərdə çalışıblar ki, danışıqlar prosesini pozsunlar. Azərbaycan isə birmənalı şəkildə öz konstruktivliyini göstərmişdir. Bu gün də göstərməyə hazırdır, bax, o dediyim prinsiplər əsasında. Bütün Azərbaycan vətəndaşları hazırda işğal edilmiş ərazilərə qayıtmalıdırlar. Ondan sonra sülh yarana bilər. Ondan sonra əməkdaşlıq ola bilər. O ki qaldı Dağlıq Qarabağın hüquqi statusunun müəyyən edilməsinə, 2009-cu ilin prinsiplərində göstərilmişdir ki, bu, gələcəyin məsələsidir və tərəflər razı olduğu təqdirdə bu məsələ öz həllini tapa bilər. Yəni ki, Azərbaycanın razılığı olmadan Dağlıq Qarabağın heç bir hüquqi statusu ola bilməz. Məhz ona görə mən dəfələrlə demişəm, bu gün də demək istəyirəm ki, Dağlıq Qarabağın Azərbaycandan ayrılması, Dağlıq Qarabağa müstəqilliyin verilməsi, yaxud da Ermənistana birləşməsi heç vaxt danışıqlar mövzusu olmayıb və olmayacaqdır. Nə Azərbaycan rəhbərliyi, nə Azərbaycan xalqı heç vaxt bunu qəbul etməyəcəkdir”.
Yekun olaraq qeyd etmək lazımdır ki, Ermənistan-Azərbaycan, Dağlıq Qarabağ münaqişəsi həll edilməli və ölkəmizin ərazi bütövlüyü təmin olunmalıdır. Bu, Cənubi Qafqaz kimi önəmli bir məkanda siyasi-iqtisadi prosesləri, həmçinin, durumu tarazlaşdırmaqla yanaşı, uzunmüddətli qarşılıqlı-faydalı əməkdaşlığa əsaslanan tərəfdaşlıq münasibətlərinin də formalaşmasına və inkişafına təkan vermiş olacaq.
Nurlan QƏLƏNDƏRLİ

Paylaş:

Baxılıb: 869 dəfə