İlk Avropa Oyunları “Rio-2016” Olimpiadasına boks və güləş üzrə təsnifat imkanları yaradacaq

Bakı:

17°C

77%

5m/s

Əlaqə

AZ RU EN

Ana səhifə / İdman / İlk Avropa Oyunları “Rio-2016” Olimpiadasına boks və güləş üzrə təsnifat imkanları yaradacaq

İlk Avropa Oyunları “Rio-2016” Olimpiadasına boks və güləş üzrə təsnifat imkanları yaradacaq

11.10.2014 [10:49]

Oktyabrın 10-da “Bakı-2015” Avropa Oyunları boks və güləş yarışlarının iştirakçılarına “Rio-2016” Olimpiya Oyunlarında mübarizə aparmaq üçün təsnifat imkanlarının təklif olunacağını təsdiq edib.
“Bakı-2015”dən AzərTAc-a bildiriblər ki, idmanın hər iki növü üzrə yarışlar ilk Avropa Oyunlarında bu istiqamətdə yüksək standartı təmin edərək idmançılara Olimpiya Oyunları üçün təsnifata doğru irəliləmək şansı verəcək. Ümumilikdə “Bakı-2015”də idmanın 20 növündən 11-i Braziliyada keçiriləcək növbəti Yay Olimpiya Oyunları üçün təsnifat imkanı təklif edir.
Avropa Olimpiya Komitəsinin (AOK) prezidenti Patrik Hikki bu barədə deyib: “Boks və güləşin “Rio-2016” Olimpiya Oyunlarına təsnifat qazanmasının təsdiqlənməsi “Bakı-2015”in idman proqramının düzgün istiqamətdə inkişafının göstəricisidir və bu, məni çox sevindirir. AOK-un Avropa Oyunlarına aid konsepsiyasına görə, idmançıların özlərini daha yüksək səviyyədə sınamaları üçün elit idman yarışları yaradılmalı idi və “Bakı-2015” bunu etdi”.
“Bakı-2015”in Əməliyyatlar üzrə baş direktoru Saymon Kleq isə bununla bağlı bildirib: “Olimpiya Oyunlarının təsnifat prosesinin bir hissəsi kimi, ilk Avropa Oyunlarında çoxlu sayda beynəlxalq idman federasiyasının iştirakı Azərbaycanda nə dərəcədə yüksək keyfiyyətli idman tədbirinin olacağının sübutudur. Avropa Olimpiya Komitəsi və prezident Patrik Hikki ən güclü idmançıların qarşıdakı illərdə Olimpiya Oyunları üçün şanslarını doğrultmaları baxımından bu böyük, multiidman yarışının bütün qitə üçün mühüm olacağına əmindirlər”.
“Bakı-2015”in boks yarışlarında kişilər arasında on çəki dərəcəsinin hər biri üzrə medal qazanan idmançı 2015-ci il dünya boks çempionatında iştirak üçün yer qazanacaq. Yarışların ən yüksək dərəcəli boksçuları təmsil etdikləri Milli Olimpiya komitələri adından “Rio-2016”da iştirak hüququ qazanacaqlar.
Güləş üzrə avropalı idmançılar və Milli Olimpiya komitələri “Rio-2016” üçün təsnifat prosesinin bir hissəsi kimi, “Bakı-2015” Avropa Oyunlarında iştirak etməlidirlər.
“Bakı-2015”in idman şöbəsinin direktoru Pirs O’Kallahan deyib: “Avropa federasiyaları “Bakı-2015” konsepsiyasının tamamilə tərəfdarıdır. Proqramımızın 16 Olimpiya idman növündən 11-nə növbəti Olimpiya Oyunlarında iştirak üçün təsnifat imkanlarının verilməsi Bakıda dünya miqyaslı yarışların olacağına işarədir. İlk Avropa Oyunlarının ən məşhur idman növləri arasında boks və güləş də olacaq. Odur ki, idmançıların çoxunun “Rio-2016”ya doğru yollarına məhz buradan başlayacaqlarını bilmək çox xoşdur”.
“Rio-2016” üçün təsnifat imkanları təklif edən 11 idman növünə oxatma, yüngül atletika, boks, velosiped idmanı, atıcılıq, üzgüçülük, stolüstü tennis, taekvondo, triatlon, güləş və voleybol daxildir.

Paylaş:

Baxılıb: 972 dəfə