“Bu cür qonaqpərvərliyi heç yerdə görməmişik”

Bakı:

26 °C

50 %

4 m/s

Əlaqə

AZ RU EN

Ana səhifə / İdman / “Bu cür qonaqpərvərliyi heç yerdə görməmişik”

“Bu cür qonaqpərvərliyi heç yerdə görməmişik”

09.06.2015 [09:59]

“Bakı-2015 ilk Avropa Oyunlarına velosipedlə” layihəsi çərçivəsində Azərbaycana səfər edən Portuqaliya və Xorvatiyadan olan velosipedçilər iyunun 6-dan Azərbaycan ərazisindədirlər. Xatırladaq ki, portuqaliyalı velosipedçi Jorge Kristovao aprelin 10-da öz ölkəsindən yola düşüb və ümumilikdə 6000 km-dən çox məsafə qət edib. Xorvatiyada velosiped idmanının və turizmin təşviqi ilə məşğul olan “Pedalinac” velosiped klubunun 5 üzvü isə mayın 5-də yola çıxıb. Onların marşrutunun uzunluğu təxminən 4000 km-dir.
“Bakı-2015” ilk Avropa Oyunları Əməliyyat Komitəsi, Azərbaycan Velosiped İdmanı Federasiyası, Portuqaliya Milli Olimpiya Komitəsi və Azərbaycanın Xorvatiyadakı səfirliyinin birgə təşəbbüsü əsasında baş tutan bu yürüş zamanı velosipedçilər səfər etdikləri ölkələrdə “Bakı-2015”in təbliği ilə məşğul olaraq, yerli əhaliyə ilk Avropa Oyunları barədə məlumat veriblər.
İyunun 6-da Balakən rayonundakı “Mazimçay” sərhəd gömrük-keçid məntəqəsindən Azərbaycan ərazisinə daxil olan qonaqları Azərbaycan Velosiped İdmanı Federasiyasının təmsilçiləri, mətbuat nümayəndələri, milli geyimli gənclər və həvəskar velosipedçilər qarşılayıb. Azərbaycanda gördüklərindən heyran olduğunu gizlətməyən portuqaliyalı Jorge Kristovao qarşılanma mərasimindən çox təsirləndiyini deyib: “Məni bu cür qəbul etməyiniz həqiqətən də çox xoş oldu. Azərbaycanın ilk Avropa Oyunlarını qəbul edəcəyini bildikdən sonra belə bir qərar qəbul etdim ki, Portuqaliyadan Azərbaycana velosipedlə səyahətə çıxım və özümü ilk Avropa Oyunlarının açılışına çatdırım. Eşitdiklərim və ən əsası gördüklərim məni bir daha əmin etdi ki, ölkəniz bu yarışı ən yüksək səviyyədə təşkil edəcək. Belə böyük idman bayramının iştirakçısı olmaqdan böyük qürur hissi keçirirəm. Özümlə Portuqaliya bayrağını da gətirmişəm və onu Bakıya çatdıqdan sonra ilk Avropa Oyunlarında iştirak edəcək ölkəmin nümayəndə heyətinə təqdim edəcəm”.
Xorvatiyanın “Pedalinac” velosiped klubunun rəhbəri Mladen Qaçeşa isə ölkəmizdə gördüyü qonaqpərvərliyə heyran olduğunu deyib: “Belə qarşılanmanı heç gözləmirdim. Çox səyahətə çıxmışam, çox ölkədə olmuşam, amma bu cür qonaqpərvərliyi heç yerdə görməmişəm. İnsanların bizə göstərdiyi münasibəti görəndə, göz yaşlarımı saxlaya bilmədim. Hamı bizə yaxınlaşır, səyahətimiz haqda maraqlanır. Azərbaycan Velosiped İdmanı Federasiyası tərəfindən bizim üçün təşkil olunmuş qarşılanma, yolboyu müşayiət və ölkənizdə yaşadığımız xoşbəxt dəqiqələrə görə, sizə dərin minnətdarlığımızı bildiririk”.
Proqrama əsasən Azərbaycan ərazisində Balakən - Zaqatala - Qax - Şəki - Oğuz - Qəbələ - İsmayıllı - Şamaxı - Qobustan - Bakı marşrutu üzrə hərəkət edəcək səfər iştirakçılarına Azərbaycan Velosiped İdmanı Federasiyasının nümayəndələri tərəfindən ölkəmizin tarixi, görməli yerləri barədə məlumat verilir, onların yerli əhali ilə görüşləri təşkil edilir. Velosipedçilər Bakıya iyunun 10-da çatacaqlar.

Paylaş:

Baxılıb: 1142 dəfə