İtaliya və Monteneqro mətbuatında AZƏRTAC-ın xüsusi müxbirinin ilk Avropa Oyunları ilə bağlı məqaləsi yayılıb

Bakı:

15 °C

67 %

5 m/s

AZ RU EN

Ana səhifə / İdman / İtaliya və Monteneqro mətbuatında AZƏRTAC-ın xüsusi müxbirinin ilk Avropa Oyunları ilə bağlı məqaləsi yayılıb

İtaliya və Monteneqro mətbuatında AZƏRTAC-ın xüsusi müxbirinin ilk Avropa Oyunları ilə bağlı məqaləsi yayılıb

26.06.2015 [10:20]

İtaliyanın “Piu news” informasiya portalında və Monteneqronun aparıcı nəşrlərindən olan “Pobjeda” qəzetində AZƏRTAC-ın xüsusi müxbiri Maqsud Dadaşovun “Artıq köhnə qitənin də öz oyunları var: Odlar Yurdu ilk Avropa Oyunlarına ev sahibliyi edir” sərlövhəli məqaləsi yayılıb. Məqalədə ilk Avropa Oyunlarının keçirilməsinin əhəmiyyətindən, yarışların yüksək səviyyədə təşkilindən və Azərbaycanın mötəbər idman tədbirlərinə uğurla ev sahibliyi etməsindən bəhs olunur.
Vurğulanır ki, cari ilin iyun ayı boyunca Avropa özünün idman tarixinin ən böyük bayramını qeyd edir: Nəhayət ki, köhnə qitənin də yarışları təşkil olunur. Digər qitələrin isə bu formatda yarışları çoxdan keçirilir. Avropa Oyunları qitənin çoxnövlü və innovativ formatda idman tədbiridir. Bu yarışların keçirilməsi qərarı 2012-ci ilin dekabrında Avropa Olimpiya Komitəsinin Romada keçirilmiş Baş Assambleyasında verilib. Avropa Milli Olimpiya Komitələrinin 84 faizi bu Oyunların təşkilinin lehinə səs verib. Məhz həmin tədbirdə iştirakçılar böyük səs çoxluğu ilə ilk ev sahibi kimi Azərbaycanın paytaxtı Bakını seçiblər. Növbəti yarışların isə dörd ildən bir keçirilməsi nəzərdə tutulur.
Müəllif yazır: “Möhtəşəm şou ilə yaddan qalan açılış mərasimi, Oyunlar üçün yaradılmış böyük infrastruktur, çoxlu sayda titullu idmançının yarışlara qatılması, təşkilatçılığın yüksək səviyyədə olması bir daha göstərir ki, Azərbaycan bu yarışları Olimpiya Oyunları səviyyəsində keçirir. Təşkilatçılar da Bakının bütün gözləntiləri doğrultduğunu bildirirlər”.
Azərbaycanlı idmançıların yarışlardakı uğurlarından bəhs edilən məqalədə diqqətə çatdırılır ki, ölkəmiz Avropanın ən böyük idman tədbirində mübarizəyə 291 idmançı ilə qatılıb. Yarışların ilk günlərindən etibarən Azərbaycan medalların sayına görə ilk sıraları bölüşür. Təbii ki, bu, azərbaycanlı atletlərin yarışların ciddiliyini yaxşı dərk etdiklərini və Odlar Yurdunun bayrağını qalib ölkələrin bayraqları arasında göstərmək üçün əllərindən gələni etdiklərini göstərir. Azərbaycan dövləti idmanın inkişafına və atletlərimizin yüksək nəticələr göstərmələri üçün hər cür şəraitin yaradılmasına böyük diqqət göstərir. Məhz bu amillər idmançılarımızı bütün bacarıqlarını nümayiş etdirməyə və ən yüksək nəticə üçün çalışmağa həvəsləndirir.
Müəllif sonda qeyd edir ki, heç şübhəsiz, Azərbaycan növbəti Avropa Oyunları üçün yüksək standartlar yaradıb. Əsas hədəf sülh və dostluğu bütün dünya ilə paylaşmaq üçün idmanın necə güclü bir amil olduğunu Avropaya nümayiş etdirməkdir. Məhz bu Oyunlar vasitəsilə Azərbaycan qədim tarixini, zəngin mədəni irsini, qonaqpərvərliyini, güclü idman köklərini, özünəməxsus ənənələrini, sülh və dialoq mərkəzi olmasını möhtəşəm şəkildə göstərə bildi.

Paylaş:

Baxılıb: 990 dəfə