Azərbaycanda istinad standartları hazırlanacaq

Bakı:

23 °C

78 %

10 m/s

Əlaqə

AZ RU EN

Ana səhifə / İqtisadiyyat / Azərbaycanda istinad standartları hazırlanacaq

Azərbaycanda istinad standartları hazırlanacaq

16.10.2024 [16:42]

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti “Milli standartlaşdırma sisteminin beynəlxalq tələblərə uyğunlaşdırılmasına dair 2023-2025-ci illər üçün Dövlət Proqramı” üzrə Tədbirlər Planında nəzərdə tutulan işlərin icrası məqsədilə yaradılan işçi qrupun növbəti iclasını keçirib.

Dövlət Xidmətindən AZƏRTAC-a bildirilib ki, istinad standartlarının hazırlanmasına dair iclasda Nazirlər Kabineti, o cümlədən 2024-cü il üzrə İş Planında nəzərdə tutulmuş tapşırıqların icrasına məsul olan Energetika Nazirliyi, Fövqəladə Hallar Nazirliyi, Rəqəmsal İnkişaf və Nəqliyyat Nazirliyi, Kənd Təsərrüfatı Nazirliyi, Səhiyyə Nazirliyi, Əmək və Əhalinin Sosial Müdafiəsi Nazirliyi, Ekologiya və Təbii Sərvətlər Nazirliyi, Daxili İşlər Nazirliyi, habelə Azərbaycan Respublikasının Dövlət Neft Şirkəti, Dövlət Şəhərsalma və Arxitektura Komitəsi, Dövlət Gömrük Komitəsi, Azərbaycan Avtomobil Yolları Dövlət Agentliyi, “Azərbaycan Dəmir Yolları” QSC, “Azergold” QSC və digər dövlət qurumlarının, o cümlədən standartlaşdırma üzrə texniki komitələrin 100-dən artıq nümayəndəsi iştirak edib.

İclas işçi qrupun cari il üzrə iş planında nəzərdə tutulan tapşırıqların icra statusu, istinad edilmiş standartlar istiqamətində görülən işlər, habelə həmin tədbirlərin icrası zamanı yaranan çətinliklər barədə müzakirələrin aparılması məqsədilə keçirilib.

İclasda Nazirlər Kabinetinin Sənaye və energetika şöbəsinin müdir müavini Faiq Hüseynov və Antiinhisar və İstehlak Bazarına Nəzarət Dövlət Xidmətinin Standartlaşdırma, texniki tənzimləmə və sertifikatlaşdırma şöbəsinin müdiri Elməddin Quluyev çıxış ediblər. Çıxışlar zamanı Dövlət Proqramında yer alan tədbirlərin icra vəziyyəti və texniki tənzimləmə sisteminin qurulması sahəsində dövlət siyasəti barədə məlumat verilib, texniki reqlamentlərin əsas tələblərinin yerinə yetirilməsini təmin edən istinad standartlarının əhəmiyyətindən söz açılıb.

Daha sonra Dövlət Xidmətinin tabeliyində olan Azərbaycan Standartlaşdırma İnstitutunun baş direktor müavini Kəmalə Məmmədzadə istinad edilmiş standartların təsdiq edilməsi istiqamətində görülmüş işlərə dair təqdimatla çıxış edib. Təqdimat çərçivəsində aidiyyəti dövlət orqanları nümayəndələrinin iştirakı ilə həmin standartların qəbul edilməsi prosesində qarşıya çıxan çətinliklər və onların həlli yolları ətrafında müzakirələr aparılıb.

İş planında səlahiyyətli dövlət orqanları tərəfindən müxtəlif mal kateqoriyalarının təhlükəsizliyinə dair hazırlanması nəzərdə tutulan 34 milli texniki reqlamentdən 27-nin layihəsi artıq hazırdır. Eyni zamanda, beynəlxalq təcrübə nəzərə alınmaqla, həmin texniki reqlamentlərdən irəli gələn 5192 istinad edilmiş standartın siyahısı hazırlanıb.

Qeyd edək ki, “Milli standartlaşdırma sisteminin beynəlxalq tələblərə uyğunlaşdırılmasına dair 2023–2025-ci illər üçün Dövlət Proqramı” Azərbaycan Respublikası Prezidentinin 2023-cü il 23 yanvar tarixli Sərəncamı ilə təsdiq olunub. Dövlət Proqramı milli texniki reqlamentlərin qəbulu, texniki tənzimləmə sahəsində normativ hüquqi bazanın təkmilləşdirilməsi, bu istiqamətdə müasir laboratoriya şəbəkəsinin qurulması, istehsal prosesi, keyfiyyətin qiymətləndirilməsi və xidmət sferasının təşkilinə dair mühüm sahələri əhatə edir.

Paylaş:

Baxılıb: 692 dəfə