Agentliyin sədr müavini: İKT sahəsində əmək müqavilələrinin sayı 34 minə çatıb

Bakı:

23 °C

72 %

12 m/s

Əlaqə

AZ RU EN

Ana səhifə / İqtisadiyyat / Agentliyin sədr müavini: İKT sahəsində əmək müqavilələrinin sayı 34 minə çatıb

Agentliyin sədr müavini: İKT sahəsində əmək müqavilələrinin sayı 34 minə çatıb

29.11.2025 [15:26]

Gənclərin əmək bazarına inteqrasiyası və rəqəmsal bacarıqlarının inkişafı dövlət siyasətinin prioritet istiqamətlərindəndir.

AZƏRTAC xəbər verir ki, bunu Dövlət Məşğulluq Agentliyinin İdarə Heyəti sədrinin müavini Hasil Abbasov “İKT Karyera Sərgisi”nin açılışında deyib.

Sədr müavini bildirib ki, dünyada gələcəyin əmək bazarına dair həm nikbin, həm də pessimist yanaşmalar mövcuddur, müxtəlif tədqiqatlar və hesabatlar bu istiqamətdə proqnozlar təqdim edir.

Dünya İqtisadi Forumunun 2025-ci il hesabatına görə, qarşıdakı 5 ildə dünyada ixtisasların 22 faizi struktur olaraq dəyişəcək.

“Şirkətlərin 39 faizi isə bacarıq boşluqlarına görə transformasiyanı lazımınca həyata keçirə bilməyəcək. Bu səbəbdən dövlətlər və korporasiyalar bacarıq boşluqlarını aradan qaldıran xüsusi proqramlara böyük önəm verirlər. Azərbaycanda dövlət qurumları, özəl sektor və ictimai təşkilatlar arasında əmək bazarının inkişafı, gənclərin məşğulluq imkanlarının genişləndirilməsi və onların müasir bacarıqlarla təmin olunması istiqamətində əməkdaşlıq gücləndirilir. Bu əməkdaşlıq gənclərin bilik və bacarıqlarının əmək bazarının tələblərinə uyğun formalaşmasına mühüm təsir göstərir”, - deyə sədr müavini əlavə edib.

Hasil Abbasov qeyd edib ki, tədbirdə informasiya və kommunikasiya sahəsində siyasəti formalaşdıran və icra edən qurumlarla yanaşı, məşğulluq xidmətlərinin təşkili ilə məşğul olan qurumlar və ali təhsil müəssisələrinin iştirakı təsadüfi deyil. Bu, gənclərin peşəkar şəxsiyyət kimi formalaşması prosesində bütün bu institutların mühüm rol oynadığını göstərir: “Gəncləri işəgötürənlərlə eyni platformada bir araya gətirmək işəgötürənlərin axtardığı səriştəli, bacarıqlı, enerjili, emosional zəka və yumşaq bacarıqlara malik namizədləri daha asan tapmasına imkan yaradır. Bu, dövlətin gənclərin gələcəyinə göstərdiyi qayğının bariz nümunəsidir”.

Sədr müavininin sözlərinə görə, əgər 2020-ci ilə qədər İKT sahəsində əmək müqavilələrinin sayı 26 min idisə, hazırda bu göstərici 34 minə çatıb.

“Agentliyin prioritet sahələr üzrə peşə hazırlığı kurslarının 27 istiqaməti məhz informasiya-kommunikasiya texnologiyalarına aiddir ki, bu da gənclərin əmək bazarına daha sürətli adaptasiyasına xidmət edir. 2019–2030-cu illəri əhatə edən Məşğulluq Strategiyası gənclərin əmək bazarında transformasiyası, rəqəmsal texnologiyalardan səmərəli istifadə etməsi və peşəkar inkişafı üçün əsas hədəfləri müəyyənləşdirir. Formal təhsillə yanaşı, qeyri-formal və informal öyrənmə imkanlarının genişləndirilməsi də gənclərin rəqabətqabiliyyətliliyinin artırılmasında mühüm rol oynayır. Sizin gələcəyiniz üçün yalnız formal təhsil deyil, əlavə bilik və bacarıqların qazanılması, fərdi inkişaf və rəqəmsal trendlərə uyğunlaşma əsas şərtlərdəndir”, – deyə Hasil Abbasov qeyd edib.

Paylaş:

Baxılıb: 533 dəfə