Dünya Bankının Azərbaycanla bağlı 3 prioriteti

Bakı:

20 °C

77 %

2 m/s

Əlaqə

AZ RU EN

Ana səhifə / İqtisadiyyat / Dünya Bankının Azərbaycanla bağlı 3 prioriteti

Dünya Bankının Azərbaycanla bağlı 3 prioriteti

13.10.2026 [10:41]

Bank ölkəmizdə iqtisadi artımın sürətləndirilməsinə yönəlmiş islahatlara dəstək vermək niyyətindədir

Dünya Bankı (DB) Azərbaycanda iqtisadi artımla bağlı yeni proqnozlarını açıqlayıb. Bankın Avropa və Mərkəzi Asiya regionu üzrə hesabatında qeyd edilir ki, ölkəmizdə ümumi daxili məhsulun (ÜDM) 1,2 faiz təşkil edəcəyini fərz edir. Əlavə dəyərin gələn il 1,8 faiz, 2028-ci ildə isə 1,9 faiz artacağı proqnozlaşdırılır.

DB hesab edir ki, Azərbaycanda son illərdə və cari ilin ötən aylarında xüsusi artım nümayiş etdirən qeyri-neft sektorundakı mənbələr iqtisadi artımın neftə deyil, qeyri-neft sahələrinə əsaslandığını təsdiqləyir. Qeyd edək ki, 2026-cı ilin yanvar-avqust aylarında ölkəmizdə ÜDM istehsalı 87 milyard 709,5 milyon manat məbləğində və ya əvvəlki ilin eyni dövrü ilə müqayisədə 1,2 faiz çox yüksəlib. ÜDM-in tərkibində qeyri-neft-qaz sektoru əsas dəyər yaradan sütun olmaqla, 2,1 faiz artıb. ÜDM istehsalının 34,6 faizi sənaye, 10,8 faizi ticarət; nəqliyyat vasitələrinin təmiri, 7,6 faizi nəqliyyat və anbar təsərrüfatı, 6,2 faizi kənd təsərrüfatı, meşə təsərrüfatı və balıqçılıq, 5,1 faizi tikinti, 3 faizi turistlərin yerləşdirilməsi və ictimai iaşə, 2 faizi informasiya və rabitə sahələrinin, 20,7 faizi digər sahələrin payına düşüb.

“FINGROW” layihəsi üzrə yeni maliyyələşmə

Dünya Bankı Azərbaycanda iqtisadi artıma töhfə vermək üçün əməkdaşlıq strategiyası çərçivəsində bir sıra sahələrə maliyyə yatırımları edəcəyini, xüsusilə də kiçik və orta biznesə dəstək verəcəyini bəyan edib. Yeni Ölkə Tərəfdaşlıq Çərçivəsinə əsasən, bölgələrdə kiçik ailə təsərrüfatlarına yardım, iş yerlərinin yaradılması üçün mikrokreditlərin ayrılması, “yaşıl iqtisadiyyat”a keçid prosesində maliyyə donorluğunun təmin edilməsi nəzərdə tutulur.

Dünya Bankının Cənubi Qafqaz üzrə regional direktoru Roland Prays yaxın günlərdə “İş yerləri və iqtisadi artım üçün maliyyə əlçatanlığı” (FINGROW) layihəsinə dəstək veriləcəyini bildirib.Vurğulanıb ki, “FINGROW” layihəsi üzrə nəzərdə tutulan qismən kredit zəmanəti və kapital maliyyələşdirilməsi komponentlərinin həyata keçirilməsi üçün müvafiq maliyyələşdirmə və hüquqi mexanizmlərin formalaşdırılması, eləcə də layihənin konseptual çərçivəsinin müəyyənləşdirilməsi istiqamətində işlər yekunlaşmaqdadır. Eyni zamanda, DB digər infrastrukturların inkişafına yönəlmiş təşəbbüslərin həyata keçirilməsi istiqamətində dəstəyini davam etdirəcəyini bəyan edib.

“3I” konsepsiyasına əsaslanan artım modelinə keçid

Dünya Bankının Azərbaycan üzrə baş iqtisadçısı Stiv Loris Qi-Dibi Bakıda keçirilən “Fitch on Azerbaijan 2026” tədbirində bildirib ki, DB Azərbaycan hökuməti ilə birgə ölkədə iqtisadi artımın sürətləndirilməsinə yönəlmiş struktur islahatlarının üç əsas istiqamətdə prioritetləşdirib. Birinci istiqamət dövlət şirkətləri ilə özəl sektor üçün bərabər şəraitin yaradılmasına dəstəkdir. Bu, daxili rəqabətin gücləndirilməsində mühüm əhəmiyyət daşıyır. İkinci istiqamət xarici rəqabətqabiliyyətliliyin artırılmasıdır. Bu kontekstdə qeyri-neft sahələrinə birbaşa xarici investisiyaların cəlb edilməsi, ticarət siyasətinin təkmilləşdirilməsi, eləcə də xammal idxalı və yerli məhsulların hədəf bazarlarına çıxarılması zamanı xərclərin azaldılması məqsədilə qeyri-tarif tədbirlərinin sadələşdirilməsi nəzərdə tutulur. Üçüncü istiqamət isə qeyri-neft sahələrində məhsuldarlığın artırılmasıdır.

DB-nin baş iqtisadçısı hesab edir ki, Azərbaycan orta gəlirli dövlət kimi yeni inkişaf modelinə uyğun ssenarilər hazırlamalıdır. Hazırkı mərhələdə Azərbaycan üçün prioritet vəzifə özəl sektorun möhkəmləndirilməsinə, rəqabət şəraitinin təkmilləşdirilməsinə və birbaşa xarici investisiyaların axınının artırılmasına yönəlmiş islahatlar paketinin həyata keçirilməsidir. İlk növbədə bu, investisiya prosedurlarının sadələşdirilməsi, investorların hüquqlarının müdafiəsinin təmin edilməsi və bazara daxil olmaq üçün maneələrin aradan qaldırılması tədbirlərinə aiddir. Bu məqsədlə hökumət neft-qaz sektorundan asılılığı azaltmaq üçün özəl sektorun artımını sürətləndirməyə və iqtisadiyyatın şaxələndirilməsini dərinləşdirməyə yönəlmiş struktur dəyişiklikləri həyata keçirməlidir. Bunun üçün ölkəmizin “3I” (Investment, Infusion, Innovation - İnvestisiyalar, Tətbiq, İnnovasiyalar) konsepsiyası üzərində qurulmuş artım modelinə keçməsi vacib hesab edilir. Qarşıdakı dövrdə sərmayələr də məhz biliklərə, texnologiyaların transferinə və rəqəmsal quruculuğa cəlb edilməlidir.

Azərbaycan Cənubi Qafqaz Mərkəzi Asiya ilə Avropa arasında regional liderdir

Dünya Bankının Mərkəzi Asiya və Cənubi Qafqaz üzrə regional direktoru Rolande Simone bir neçə gün əvvəl “Pryce CAMCA” Regional Forumunda çıxışı zamanı Azərbaycan iqtisadiyyatında dayanıqlı indikatorlara diqqət çəkərək bildirib ki, ölkənin aşağı dövlət borcu, təmkinli fiskal və monetar siyasəti sabitliyin təmin edilməsində mühüm rol oynayır. Vurğulanıb ki, biznes mühitinin yaxşılaşdırılması, rəqabətin gücləndirilməsi və özəl sektorun iqtisadiyyatda daha fəal iştirakının təşviqinə yönəlmiş islahatlar qeyri-neft artımına təkan verir. Bu amil karbohidrogen istehsalını aşağı düşdüyü mühitdə belə ortamüddətli artımın stabil qalmasına səbəb olur.

Xanım R.Simonde Cənubi Qafqaz Mərkəzi Asiya ilə Avropa arasında yolayrıcında yerləşdiyini bildirərək bu coğrafi mövqenin regional lideri olan Azərbaycanın təbii sərvətləri ilə yanaşı, kommunikasiya həmrəyliyinin güclənməsində geosiyasi və geoiqtisadi əhəmiyyətinə diqqət çəkib. Onun fikrincə, hazırda kənar bölgələrdə risklərin artdığı vəziyyətdə belə mürəkkəb coğrafiyada düzgün istiqamət seçmək, mövcud imkanları görmək və onlardan səmərəli istifadə etmək geniş baxış və yüksək bacarıq tələb edir. Azərbaycan bu baxımdan uğurlu model quraraq region üçün əməkdaşlığın davamlılığını da təmin edən ölkədir. Hazırda Azərbaycanın xüsusi önəm verdiyi trans-kontinental bağlantılar, xüsusilə də Orta Dəhlizin uğurlu daşınma imkanları təkcə dövlətlərin inteqrasiyasını deyil, bizneslərin yaxın əlaqələrini təmin edir, rəqabətqabiliyyətli, etibarlı, proqnozlaşdırılabilən və investisiya qoyuluşu üçün cəlbedici mühit formalaşdırır.

E.CƏFƏRLİ

Paylaş:

Baxılıb: 51 dəfə

Xəbər lenti

Hamısına bax