“Ekspo 2025”in Bakı şəhərində keçirilməsi ilə əlaqədar ölkəmizə dəstək ifadə olunub

Bakı:

25 °C

65 %

9 m/s

Əlaqə

AZ RU EN

Ana səhifə / İqtisadiyyat / “Ekspo 2025”in Bakı şəhərində keçirilməsi ilə əlaqədar ölkəmizə dəstək ifadə olunub

“Ekspo 2025”in Bakı şəhərində keçirilməsi ilə əlaqədar ölkəmizə dəstək ifadə olunub

07.02.2018 [10:07]

Azərbaycan nümayəndə heyəti İƏT Turizm Nazirlərinin 10-cu Konfransında iştirak edir
Banqladeş Xalq Respublikasının paytaxtı Dəkkə şəhərində İslam Əməkdaşlıq Təşkilatına (İƏT) üzv ölkələrin Turizm Nazirlərinin 10-cu Konfransı keçirilir. Konfransda ölkəmizi mədəniyyət və turizm nazirinin müavini Nazim Səmədovun rəhbərliyi ilə nümayəndə heyəti təmsil edir.
Nazirlikdən AZƏRTAC-a bildirilib ki, səfər çərçivəsində N.Səmədov Banqladeşin turizm və mülki aviasiya naziri Şahcəlal Xan ilə görüşüb. Görüş zamanı Azərbaycanın turizm potensialı, iki ölkə arasında turizm sahəsində əməkdaşlığa dair müqavilə-hüquq bazasının yaradılması, qarşılıqlı turist mübadiləsi barədə danışılıb. Həmçinin Qəbələ şəhərinin 2020-ci il üçün İƏT Turizm Paytaxtı seçilməsi, İƏT Turizm Koordinasiyası Komitəsinə keçiriləcək seçkilərdə Azərbaycanın namizədliyi, “Ekspo 2025”in Bakı şəhərində keçirilməsi ilə əlaqədar Banqladeş tərəfindən ölkəmizə dəstək ifadə olunub.
Azərbaycan nümayəndə heyəti Bəhreyn Krallığının sənaye, ticarət və turizm naziri və “Gulf Airline” şirkətinin rəhbəri Z.R.Əlzəyani ilə görüşüb. Görüşdə iki ölkə arasında turizm üzrə əməkdaşlıq məsələləri müzakirə edilib, 2017-ci ildə Oman Sultanlığının paytaxtı Maskat şəhərində Birləşmiş Millətlərin Dünya Turizm Təşkilatı (BMDTT) və UNESCO-nun birgə təşkilatçılığı ilə keçirilən II Ümumdünya Turizm və Mədəniyyət Konfransı zamanı Azərbaycan tərəfinin irəli sürdüyü təklifə əsasən cari ilin yay ayılarında Bəhreyndən Azərbaycana birbaşa aviareyslərin açılacağı bildirilib.
Bu gün Banqladeş Xalq Respublikasının Baş naziri Şeyx Hasina Vazed və İƏT-in baş katibi Yusif bin Əhməd Əl-Osayminin iştirakı ilə İƏT Turizm Nazirlərinin 10-cu Konfransının rəsmi açılışı olub. Baş katib öz çıxışı zamanı Dağlıq Qarabağ münaqişəsinə toxunaraq münaqişə zonalarındakı İslam irsinin qorunmasının əhəmiyyətini qeyd edib.
Açılışdan sonra baş tutan konfransda çıxış edən Nazim Səmədov Azərbaycanın yüksək səviyyəli turizm infrastrukturu, turizm sahəsində aparılan islahatlar, İƏT ölkələri ilə turizm sahəsində əldə olunmuş əməkdaşlıq nəticəsində turist səfərlərinin sayının 2016-cı ilə nisbətən 2017-ci ildə 34 faiz artması və ölkəmizdə keçirilən beynəlxalq tədbirlər barədə məlumat verib. Azərbaycanın İslam həmrəyliyinə verdiyi töhfədən, Naxçıvan şəhərinin 2018-ci il üçün “İslam Mədəniyyəti Paytaxtı” seçilməsindən danışan Nazim Səmədov “Ekspo 2025”in keçirilməsi üçün namizəd şəhərlər sırasında Bakının yeganə İslam paytaxtı olduğunu vurğulayaraq İƏT ölkələrini namizədliyimizi dəstəkləməyə çağırıb.
Konfrans çərçivəsində, həmçinin bir sıra görüşlər keçirilib. Bu görüşlərdə Azərbaycan ilə İƏT ölkələri arasında turizm üzrə əməkdaşlığın mövcud vəziyyəti və gələcək perspektivləri müzakirə olunub.
Konfrans işini fevralın 7-də yekunlaşdıracaq.

Paylaş:

Baxılıb: 1175 dəfə