Bakıda Azərbaycan-Vyetnam Hökumətlərarası Komissiyanın 2-ci iclası keçirilib

Bakı:

28 °C

65 %

8 m/s

Əlaqə

AZ RU EN

Ana səhifə / İqtisadiyyat / Bakıda Azərbaycan-Vyetnam Hökumətlərarası Komissiyanın 2-ci iclası keçirilib

Bakıda Azərbaycan-Vyetnam Hökumətlərarası Komissiyanın 2-ci iclası keçirilib

21.06.2018 [10:12]

Azərbaycan Respublikası və Vyetnam Sosialist Respublikası arasında iqtisadi, ticarət, elmi və texniki əməkdaşlıq üzrə Hökumətlərarası Komissiyanın 2-ci iclasında iştirak məqsədilə Vyetnamın sənaye və ticarət naziri Tran Tuan Anhın rəhbərlik etdiyi nümayəndə heyəti Azərbaycanda səfərdədir.
AZƏRTAC xəbər verir ki, tədbirdən əvvəl hər iki ölkə nümayəndələri Fəxri xiyaban və Şəhidlər xiyabanını ziyarət edib.
İkitərəfli görüşdən sonra Azərbaycan Respublikasının energetika naziri, hökumətlərarası komissiyanın həmsədri Pərviz Şahbazov və Tran Tuan Anhın həmsədrliyi ilə komissiyanın iclası keçirilib. Pərviz Şahbazov Azərbaycanla Vyetnam arasında münasibətlərin inkişafında iki ölkə prezidentlərinin, eləcə də digər səviyyədə qarşılıqlı səfərlərin mühüm rolunu qiymətləndirərək, ölkəmizdə sosial-iqtisadi, neft sektoru ilə yanaşı, qeyri-neft sektorunun inkişafı, biznes və investisiya mühitinin yaxşılaşdırılması istiqamətində görülən işlər, beynəlxalq tranzit imkanları barədə ətraflı məlumat verib.
Nazir, Ümummilli lider Heydər Əliyevin uzaqgörən siyasətinin nəticəsi kimi 1994-cü ildə imzalanan “Əsrin müqaviləsi” və Azərbaycan neftinin Avropa bazarlarına çatdırılmasını təmin edən Bakı-Tbilisi-Ceyhan neft kəməri ilə ölkəmizin inkişaf tarixində yeni bir mərhələnin başlandığını qeyd edib.
Onun sözlərinə görə, Cənub Qaz Dəhlizi Azərbaycan Respublikasının Prezidenti İlham Əliyevin qətiyyətli siyasətinin töhfəsi kimi Azərbaycan qazını Avropa bazarlarına çatdıraraq Avropanın enerji təhlükəsizliyinin təminatında mühüm rol oynamaqla yanaşı, digər yeni layihələrin icrasına da imkan yaradır. İclasda, həmçinin “Şərq-Qərb”, “Şimal-Cənub” nəqliyyat dəhlizlərinin üzərində yerləşən ölkəmizin həyata keçirdiyi Bakı-Tbilisi-Qars dəmir yolu xətti və digər infrastruktur layihələrdən də bəhs edilib.
Komissiyanın Vyetnam tərəfindən həmsədri Tran Tuan Anh modernləşmə prosesləri nəticəsində ölkəsinin əldə etdiyi sosial-iqtisadi nailiyyətlər, eləcə də dünya iqtisadiyyatına inteqrasiya istiqamətində görülən tədbirlər barədə məlumat verib.
Sonra hökumətlərarası komissiyanın 2017-ci il yanvarın 16-da Hanoy şəhərində keçirilən 1-ci iclasının Protokolunda qeyd olunan müvafiq sahələr üzrə görülən işlər müzakirə edilib. Ticarət-iqtisadiyyat sahəsində əlaqələrin hazırkı vəziyyəti nəzərdən keçirilib. Qeyd olunub ki, ötən il iki ölkə arasında ticarət dövriyyəsinin həcmi 101 milyon ABŞ dolları olub. Azərbaycandan Vyetnama ixracın həcmi 55 milyon ABŞ dolları, Vyetnamdan idxalın həcmi isə 46 milyon ABŞ dolları təşkil edib. Azərbaycanla Vyetnam arasında əməkdaşlığın istiqamətlərindən biri kimi enerji sektoruna da diqqət yetirilib. Azərbaycan Respublikası Dövlət Neft Şirkəti (SOCAR) və Vyetnamın Neft və Qaz Qrupu (PVN), eləcə də digər şirkətləri arasında əməkdaşlıq yüksək qiymətləndirilib. Neft-qaz sahəsində yeni texnologiyaların tətbiqi, enerji səmərəliliyi və bərpa olunan enerji mənbələri üzrə əməkdaşlıq imkanları nəzərdən keçirilib. Bundan başqa, iki ölkə arasında əməkdaşlığın müqavilə-hüquq bazasının genişləndirilməsi və təkmilləşdirilməsi, investisiya, nəqliyyat, kənd təsərrüfatı, ətraf mühit, təhsil və digər sahələrdə əməkdaşlıq məsələləri, əlaqələrin inkişaf istiqamətləri barədə müzakirələr aparılıb.
Tədbirin sonunda Azərbaycan Respublikası ilə Vyetnam Sosialist Respublikası arasında iqtisadi, ticarət, elmi və texniki əməkdaşlıq üzrə Hökumətlərarası Komissiyanın 2-ci iclasının yekunlarına dair Protokol imzalanıb. Sənədi Komissiyanın həmsədrləri - Azərbaycan Respublikası energetika naziri Pərviz Şahbazov və Vyetnamın sənaye və ticarət naziri Tran Tuan Anh imzalayıb. Sənəd siyasi, ticarət, investisiya, enerji, kənd təsərrüfatı, nəqliyyat, kommunikasiya, yüksək texnologiyalar, mədəniyyət, turizm, idman, elm, təhsil, ətraf mühitin mühafizəsi və digər sahələrdə əməkdaşlığı əhatə edir.

Paylaş:

Baxılıb: 984 dəfə