Kənd Təsərrüfatı Nazirliyi ilə Qida Təhlükəsizliyi Agentliyi anlaşma memorandumu imzalayıb

Bakı:

24 °C

72 %

15 m/s

Əlaqə

AZ RU EN

Ana səhifə / İqtisadiyyat / Kənd Təsərrüfatı Nazirliyi ilə Qida Təhlükəsizliyi Agentliyi anlaşma memorandumu imzalayıb

Kənd Təsərrüfatı Nazirliyi ilə Qida Təhlükəsizliyi Agentliyi anlaşma memorandumu imzalayıb

28.07.2018 [09:35]

İyulun 27-də Kənd Təsərrüfatı Nazirliyi ilə Azərbaycan Qida Təhlükəsizliyi Agentliyi (AQTA) arasında qida təhlükəsizliyi və kənd təsərrüfatı sahəsində əməkdaşlıq haqqında anlaşma memorandumu imzalanıb.
AZƏRTAC xəbər verir ki, sənədi kənd təsərrüfatı naziri İnam Kərimov və Azərbaycan Qida Təhlükəsizliyi Agentliyinin sədri Qoşqar Təhməzli imzalayıb.
Memorandumda qurumlar arasında kənd təsərrüfatı və qida təhlükəsizliyi sahəsində əməkdaşlığı və məlumat mübadiləsini inkişaf etdirmək nəzərdə tutulur. Memorandumda, həmçinin əməkdaşlığın istiqamətləri, tərəflərin öhdəlikləri öz əksini tapıb. Sənədə əsasən, tərəflər qida zəncirinin bütün mərhələlərində mütəxəssislərin iştirakı ilə sanitar, baytarlıq və fitosanitar norma və qaydaların təhlilinin aparılmasına, nəticələrin ümumiləşdirilərək bu sahədə qüvvədə olan norma və qaydaların beynəlxalq standartlara uyğunlaşdırılmasına dair birgə təkliflər hazırlayacaq, qida zənciri boyu bütün potensial təhlükələrin müəyyənləşdirilməsi və aradan qaldırılması üçün birgə tədbirlər həyata keçirəcək.
Bundan başqa, Kənd Təsərrüfatı Nazirliyi və Qida Təhlükəsizliyi Agentliyi böhran vəziyyətlərində qida təhlükəsizliyinin çevik qiymətləndirilməsi, idarə edilməsi və xəbərdarlıq prosedurlarının müəyyənləşdirilməsi ilə bağlı təkliflər hazırlayacaq, risklər barədə maraqlı tərəflərin məlumatlandırılması formalarını müəyyənləşdirəcək.
Kənd təsərrüfatı naziri İnam Kərimov qeyd edib ki, son illər Prezident İlham Əliyev tərəfindən ölkəmizdə qeyri-neft sektoruna göstərilən yüksək diqqətin nəticəsi kimi iqtisadiyyatın aparıcı sahələrindən olan aqrar sahə yeni inkişaf mərhələsinə qədəm qoyub. Bununla da kənd təsərrüfatı sahəsində sosial-iqtisadi göstəricilər yüksəlib və respublikada bu sahənin inkişafı prosesində əhəmiyyətli uğurlar əldə olunub.
Nazir ölkədə qida təhlükəsizliyinin təminatı sahəsində qarşıya qoyulan vəzifələrin həyata keçirilməsi üçün bu prosesdə iştirak edən dövlət qurumları arasında əməkdaşlığın və məlumat mübadiləsi aparılmasının vacib olduğunu deyib. O deyib ki, anlaşma memorandumu çərçivəsində hər iki qurum insan sağlamlığının qorunmasında kənd təsərrüfatı məhsullarının istehsalı, idxalı və ixracı zamanı beynəlxalq təşkilatlar tərəfindən qəbul edilmiş prinsip və normalara əməl olunmasını, qida zəncirinin bütün mərhələlərində xidmətlərin keyfiyyətinin artırılmasını təmin edəcək.
Azərbaycan Qida Təhlükəsizliyi Agentliyinin sədri Qoşqar Təhməzli memorandumun dövlət başçısının həyata keçirdiyi islahatların iqtisadi sahədə, o cümlədən kənd təsərrüfatı və qida təhlükəsizliyi sahəsində səmərəliyinin daha da artırılması məqsədi daşıdığını bildirib. Qeyd edib ki, milli iqtisadiyyat perspektivləri üzrə həyata keçirilən islahatlar, kənd təsərrüfatı və qida sənayesi sektorunda müasir standartların tətbiqi kənd təsərrüfatının inkişafı ilə yanaşı qida təhlükəsizliyinin təmin olunmasına nəzarət imkanlarını da genişləndirməkdədir. Azərbaycanın kənd təsərrüfatı və qida sahəsi üzrə həyata keçirilən tədbirlər daxili və beynəlxalq bazarlarda istehlakçıların ehtiyaclarına cavab verən yüksək keyfiyyətli və təhlükəsiz qida məhsullarının istehsalına kömək göstərəcək.
“İki qurumun bundan sonra daha səmərəli şəkildə fəaliyyəti Azərbaycan ərazisində kənd təsərrüfatı sahəsində, eyni zamanda, qida təhlükəsizliyi sahəsində həyata keçiriləcək tədbirlərin daha da proqressiv, islahatyönümllü, şəffaf və iqtisadiyyata töhfə verəcək xarakter daşıyır. Hesab edirəm ki, bugünkü memorandumun nəticəsi bilavasitə Azərbaycan ərazisində kifayət qədər əhalinin lazımi səviyyədə ərzaqla təmin olunmasına və həmin qidanın təhlükəsiz şəkildə əhaliyə çatdırılmasına imkan yaradacaq”, - deyə Q.Təhməzli vurğulayıb.

Paylaş:

Baxılıb: 1042 dəfə