Pensiya, müavinət və təqaüdlərdə yeni artımlar

Bakı:

17°C

67%

4m/s

Əlaqə

AZ RU EN

Ana səhifə / İqtisadiyyat / Pensiya, müavinət və təqaüdlərdə yeni artımlar

Pensiya, müavinət və təqaüdlərdə yeni artımlar

01.03.2022 [10:04]

Azərbaycanın dərinməzmunlu sosial siyasətində insanların gəlir imkanlarının genişləndirilməsi istiqaməti xüsusi yer tutur. O cümlədən respublikamızda əməkhaqları və pensiyalar davamlı olaraq artırılır. Bu ənənə 2022-ci ildə də davam etdirilir. Prezident İlham Əliyevin imzaladığı sənədlər əsasında bu ilin əvvəlindən növbəti islahat paketi çərçivəsində pensiya, müavinət və təqaüdlərin artırılması təmin edilib. Əmək və Əhalinin Sosial Müdafiəsi Nazirliyi pensiya, müavinət və təqaüdlərin nə qədər artdığını açıqlayıb.

Sosial islahat paketi üçün ayrılan illik əlavə vəsait 2,1 mlrd. manatdır

Pensiyaçılara xoş müjdə

Nazirlikdən “Yeni Azərbaycan”a daxil olan məlumatda bildir?lir ki, ölkə əhalisinin 12 faizini əhatə edən pensiya təminatında ilin əvvəlindən iki istiqamətdə artım baş verib. Belə ki, minimum pensiya 20 faiz artımla 200 manatdan 240 manata çatdırılıb. Bu artım 40 min şəxsin pensiyasının artımına imkan verib.

İkinci istiqamət pensiyaların indeksləşdirilməsi ilə bağlıdır. Pensiyalar orta aylıq əməkhaqqı artımına uyğun indeksləşdirilərək artırılıb. Bundan başqa, pensiyaçılara bu il üzrə 200 manat məbləğində maddi yardım ayrılacaq. Beləliklə, pensiyalarda orta hesabla 9 faiz artım edilib. Ölkə üzrə 1,1 mln. pensiyaçını əhatə edən bu artım üçün dövlət büdcəsindən illik əlavə 352 mln. manat sərf olunacaq.

Sosial müavinətlərdə və bəzi təqaüdlərdə artım

ƏƏSMN-dən bildirilib ki, 2022-ci ilin 1 yanvarından, həmçinin sosial müavinətlər və bəzi təqaüdlərdə də artımlar olub. Əlilliyə, yaşa, ailə başçısını itirməyə görə, sağlamlıq imkanları məhdud uşaqlar və b. üçün aylıq sosial müavinətlər orta hesabla 25 faiz, birdəfəlik müavinətlər təxminən 46 faiz artırılıb. Bəzi təqaüdlərdə isə artım orta hesabla 32 faiz olub. Tələbə təqaüdlərində də təxminən 20 faiz artım baş verib.

Ümumilikdə 722 min şəxsin (o cümlədən 132 min tələbənin) rifahına dəstək olan bu artımlar üçün illik əlavə 194 mln. manat ayrılıb.

Ünvanlı sosial yardım alanlar da sevinəcək

Sosial ödənişlərdə davamlı artım əhalinin həssas qruplarından olan insanlara verilən ünvanlı sosial yardımı da əhatə edir. Ünvanlı sosial yardımın hesablanması üçün tətbiq olunan ehtiyac meyarı cari ilin əvvəlindən 170 manatdan 200 manata çatdırılıb. Bu artım 250 minədək insanı əhatə edən ailələrə yönələn ünvanlı sosial yardımların da artması ilə nəticələnir. Həmin artım üçün illik əlavə 20 mln. manat xərclənəcək.

Yeni sosial islahat mərhələsi dövlət başçısının tapşırıqları əsasında müharibə iştirakçılarına yeni dəstək tədbirlərini də nəzərdə tutur. Bu tədbirlərə 1991-1997-ci illərdə xəsarət almış Qarabağ müharibəsi əlillərinin birdəfəlik ödəmə ilə təmin edilməsi və 2020-ci il sentyabrın 27-dən noyabrın 10-dək olan dövrdə ölkəmizin ərazi bütövlüyü uğrunda döyüş əməliyyatlarında iştirak etmiş hərbi qulluqçulara “Müharibə veteranı” adı verilərək Prezidentin aylıq təqaüdünün təyin olunması daxildir.

Ümumilikdə 2022-ci il üzrə əməkhaqqı, pensiya və digər sosial ödənişlərin artımını nəzərdə tutan islahatlar paketi 3,4 milyon şəxsi əhatə edir. Bu islahat paketinin maliyyə yükü də kifayət qədər böyükdür. Belə ki, bəhs olunan artımlar üçün ayrılan illik əlavə vəsait 2,1 mlrd. manata bərabərdir.

Mübariz ABDULLAYEV

Paylaş:

Baxılıb: 987 dəfə