Qanuna dəyişikliklər təklif olunur

Bakı:

28 °C

56 %

9 m/s

Əlaqə

AZ RU EN

Ana səhifə / İqtisadiyyat / Qanuna dəyişikliklər təklif olunur

Qanuna dəyişikliklər təklif olunur

20.04.2022 [10:04]

Pensiyaların verilməsində dəyişiklik olacaq

Daha əlçatan, daha tez və daha çox olacaq

Mubariz

Sosial dövlət olan Azərbaycanda əhalinin müxtəlif kateqoriyalarının həyat şəraitinin yaxşılaşdırılması, gəlir imkanlarının artırılması istiqamətində ardıcıl tədbirlər həyata keçirilir. Hüquqi bazanın təkmilləşdirilməsi də bu istiqamətdə atılan addımlar sırasında yer alır. Qanunvericilik bazasında edilən dəyişikliklər bir qayda olaraq ölkənin iqtisadi imkanlarının artması ilə adekvatlıq təşkil edir. Yəni Azərbaycan inkişaf etdikcə, iqtisadi potensialı artdıqca ölkə vətəndaşlarının sosial müdafiəsinin gücləndirilməsini hədəfləyən siyasətin miqyası da genişləndirilir. Bunu “Əmək pensiyaları haqqında” Qanuna təklif edilən son dəyişikliklərdən də görmək mümkündür.

Pensiyalara əlçatanlığın artırılması

Yeni qanun layihəsində təklif olunan dəyişikliklər müxtəlif istiqamətləri əhatə edir. Milli Məclisin deputatı Vüqar Bayramov “Əmək pensiyaları haqqında” Qanuna təklif edilən son dəyişiklikləri “Yeni Azərbaycan”a şərh edib. O bildirib ki, dəyişikliyə görə, beş və daha çox uşaq dünyaya gətirən analar ilə yanaşı, uşaqları övladlığa və ya qəyyumluğa götürüb onları səkkiz yaşınadək tərbiyə etmiş və böyütmüş qadınlar da 5 il daha tez pensiyaya çıxa biləcəklər.

Ən mühüm dəyişikliklərdən biri gələcəkdə atalara da daha tez pensiyaya çıxmaq imkanının yaradıması ilə bağlıdır. Bu, aşağıdakı hallarda mümkün olacaq. Ana vəfat etdiyinə və ya onunla nikaha xitam verildiyinə, eləcə də ana valideynlik hüququndan məhrum edildiyinə görə 5 və daha çox uşağı və ya sağlamlıq imkanları məhdud uşağını növbəti nikah bağlamadan, təkbaşına səkkiz yaşınadək böyüdən atalar tez pensiyaya çıxmaq hüququ əldə edəcəklər. “Sənəd çox doğru olaraq pensiyalara əlçatanlığın artırılması və yığılmış pensiya kapitalının daha ədalətli bölgüsü baxımdan vacib layihə kimi qiymətləndirilir”, - deyə V.Bayramov bildirib.

Daha tez pensiyaya çıxma kateqoriyası genişləndirilir

Təklif olunan yeni qanun layihəsində əksini tapan digər dəyişikliklərə əsasən, axırıncı iş yerindən asılı olmayaraq, güzəştli şərtlərlə yaşa görə əmək pensiyası almaq hüququ verən incəsənətin xüsusi sahələrinin, yeraltı, əmək şəraiti xüsusilə zərərli və ağır olan işlərdə ən azı 12 il 6 ay çalışmış kişilər, eləcə də azı 10 il çalışmış qadınlar da 5 il daha tez pensiyaya çıxmaq hüququ qazancaqlar.

Pensiyaya tez çıxmaq hüququnun digər bir sıra şəxslərə də şamil ediləcəyini deyən Milli Məclisin deputatı vurğulayıb: “Hipovizqanizm xəstəliyinə tutulan şəxslərin (liliputların) və fizioloji mütənasibliyi pozulmuş cırtdanboy şəxslərin azı 5 il sığorta stajı olduqda 20 il daha tez pensiyaya çıxa biləcəklər.

Eyni zamanda, mülki aviasiya uçuş və uçuş-sınaq heyətində işlə əlaqədar vəzifələrdə çalışanların həmin işlər üzrə azı 25 il, səhhətinə görə uçuş işindən azad olunmuş şəxsərin isə həmin işlər üzrə azı 20 il sığorta stajı olduqda pensiyaya çıxma yaşı həddi 15 il azaldılacaq”.

Ailə başçısını itirən ailələrdə pensiya hesablanması qaydası dəyişəcək

Yeni layihəyə əsasən, ailə başçısını itirən ailələrdə pensiya hesablanması qaydasında da dəyişiklik olacaq. “Bu dəyişikliyin mahiyyəti bundan ibarətdir ki, mövcud qanunvericiliyə əsasən, yaşa, yaxud əlilliyə görə pensiya alan şəxs ailə başçısını itirdikdə və ailə başçısını itirməyə görə də pensiya hüququ yarandıqda öz pensiyasını seçirsə, ona hesablanan pensiya məbləği digər ailə üzvləri arasında bölüşdürülmür. Təklif edilən dəyişikliklərə əsasən, ailə başçısını itirməyə görə pensiya hüququ olan şəxs digər növ əmək pensiyasını və ya sosial müavinəti seçdikdə, ona hesablanan pensiya məbləği digər ailə üzvləri arasında bölüşdürüləcək və bu da onların gəlirlərinin artmasına səbəb olacaq”, - deyə Vüqar Bayramov bildirib.

Pensiyanın bir növündən digərinə keçid

Dəyişikliklərə əsasən, pensiyaçının əmək pensiyasının bir növündən başqa növünə keçmək hüququ var. Bu zaman, əmək pensiyasının bir növündən başqa növünə keçirilmə bu barədə ərizənin və tələb olunan sənədlərin təqdim edildiyi tarixdən, şəhid ailəsi üzvləri üçün isə ailə başçısına şəhid statusunun verildiyi tarixdən hesablanmaqla aparılır. Bu o deməkdir ki, yaşa görə əmək pensiyası növündən əlilliyə görə əmək pensiyası növünə keçmək istisna olmaqla, digər bütün növ əmək pensiyalarına keçmək mümkündür.

Paylaş:

Baxılıb: 811 dəfə