Azərbaycanda medianın inkişafı dövlətin diqqət mərkəzindədir

Bakı:

17°C

63%

2m/s

Əlaqə

AZ RU EN

Ana səhifə / MEDİA / Azərbaycanda medianın inkişafı dövlətin diqqət mərkəzindədir

Azərbaycanda medianın inkişafı dövlətin diqqət mərkəzindədir

23.07.2021 [09:07]

Bu istiqamətdə ardıcıl və məqsədyönlü islahatlar uğurla davam etdirilir
Azərbaycan milli mətbuatının yaranmasından 146 il ötür. Əsası 1875-ci il iyulun 22-də “Əkinçi” qəzetinin ilk nömrəsinin nəşri ilə qoyulan milli mətbuatımız ötən dövr ərzində böyük inkişaf yolu keçib.
Məsələ ilə bağlı Yeni Azərbaycan Partiyası (YAP) Təftiş Komissiyasının sədri, Milli Məclisin deputatı Sevinc Hüseynova bildirib ki, keşməkeşli yol keçən milli mətbuatımızın inkişafı Ulu Öndər Heydər Əliyevin adı ilə bağlıdır. Ulu Öndərin 1993-cü ildə xalqın təkidli tələbi ilə hakimiyyətə qayıdışı mətbuatımızın inkişaf tarixində də yeni mərhələ açdı. 1998-ci ildə Ümummilli Lider Heydər Əliyev tərəfindən Azərbaycan mətbuatının üzərindən dövlət senzurasının ləğv edilməsi mətbuatın inkişafına ciddi təkan verdi.
Millət vəkilinin sözlərinə görə, Ulu Öndərin mətbuata və mətbuat nümayəndələrinə göstərdiyi diqqət və qayğı Prezident İlham Əliyev tərəfindən uğurla davam etdirilir: “Ölkəmizdə söz və mətbuat azadlığı tam təmin olunub. Təsadüfi deyil ki, hazırda respublikada çoxlu sayda müxtəlif qəzet və jurnallar nəşr olunur, internet qəzetçilik inkişaf edir. Müasir dövrdə informasiya texnologiyalarının inkişafı Azərbaycan mətbuatını qlobal informasiya şəbəkəsinin bir hissəsinə çevirib. Yeni dövr milli mətbuatımızın inkişafı ilə bağlı qanunvericilik bazasının təkmilləşdirilməsini zərurətə çevirir. Hazırda media məkanında sürətli qloballaşma prosesi gedir. Bu baxımdan, mövcud qanunvericiliyin təkmilləşdirilməsi zamanın tələbi idi. Bununla əlaqədar, Prezident İlham Əliyevin tapşırığı ilə media haqqında qanunvericiliyin təkmilləşdirilməsi istiqamətində məqsədyönlü iş aparılır. “Media haqqında” yeni qanun layihəsi hazırlanıb. Dövlətimizin başçısı İlham Əliyevin 2021-ci il 12 yanvar tarixli “Azərbaycan Respublikasında media sahəsində islahatların dərinləşdirilməsi haqqında” Fərmanı ilə Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradıldı. MEDİA agentliyinin yaradılması ölkəmizdə media sahəsində islahatların daha sürətlə aparılmasına və dərinləşdirilməsinə imkan verəcək”.
Deputat qeyd edib ki, Azərbaycan mediası həm Birinci, həm də İkinci Qarabağ müharibələrində üzərinə düşən vəzifəni layiqincə yerinə yetirib, Azərbaycanın böyük Zəfərinin müjdəçisi olub: “Hər zaman Azərbaycan həqiqətlərinin təbliği missiyasını uğurla həyata keçirən mətbuatımız 44 günlük Vətən müharibəsinin gedişində ölkəmizin düşmən təbliğatına qarşı informasiya mübarizəsinə töhfələrini verdiyi kimi, postmüharibə dövründə də bu işi davam etdirməkdədir. Azərbaycan mediası bu gün də dövlətimizin başçısı, Silahlı Qüvvələrin Müzəffər Ali Baş Komandanı İlham Əliyevin artıq tarixə qovuşmuş Dağlıq Qarabağ münaqişəsi ilə bağlı səsləndirdiyi hər bir fikrin, hər bir bəyanatın, işğaldan azad edilmiş ərazilərimizdəki vəziyyət barədə həqiqətlərin ölkə və dünya ictimaiyyətinə çatdırılmasında fəal rol oynayır. Peşə fəaliyyətini həyata keçirərkən biz Məhərrəm İbrahimov və Sirac Abışovun timsalında canlarını qurban verən, şəhidlik zirvəsinə ucalan jurnalistlərimizin əziz xatirəsini daim hörmətlə yad edirik”.
S.Hüseynova onu da söyləyib ki, 44 günlük Vətən müharibəsində və müharibədən sonrakı dövrdə Azərbaycan həqiqətlərinin dünyaya çatdırılmasında mətbuatın rolu və jurnalistlərin fəaliyyəti böyük oldu: “Məhz nümayiş olunan peşəkarlıq, fədakarlıq və çeviklik sayəsində dünya ictimaiyyətinə müharibə ilə əlaqədar, o cümlədən Ermənistanın törətdiyi müharibə cinayətləri haqqında dolğun məlumatların çatdırılması mümkün oldu. Bu işlərin həyata keçirilməsində ən böyük missiyanı Ali Baş Komandanın Özü reallaşdırdı. Onun Vətən müharibəsi dövründə 30-dan çox beynəlxalq media qurumlarına geniş müsahibələri bu reallıqların dünya ictimaiyyətinə çatdırılmasında müstəsna rol oynadı”.
“Dünyanın əksər dövlətlərində media baş verən texniki yeniliklərə ən tez uyğunlaşan və bunu öz əməli işlərində uğurla tətbiq edən bir sahədir. Müasir dövrdə texnoloji imkanlardan istifadə edərək sürətli inkişaf mərhələsinə qədəm qoyan media, o cümlədən sosial media çox böyük inkişaf və tərəqqi yolu keçir. Lakin nə qədər texnoloji inkişaf bu sahə ilə bağlı yeni imkanlar yaratsa da, medianın inkişafı həm də dövlətlərin bu cameəyə münasibətindən asılıdır. Demokratik dəyərlərə, söz azadlığının əhəmiyyətinə xüsusi həssaslıq göstərən dövlətlər medianın inkişafı üçün normal şərait yaradırlar. Düşünürəm ki, Azərbaycanda da medianın hərtərəfli inkişafı üçün kifayət qədər şərait yaradılıb və Prezident İlham Əliyev tərəfindən siyasi iradə ortaya qoyulub. Bunun nəticəsi olaraq “Əkinçi” qəzeti ilə başlayan milli mətbuat tariximiz bu gün sürətli inkişaf dövrünü yaşayır. Milli mətbuatımız bütün istiqamətlərdə öz missiyasını uğurla həyata keçirir”.
Bu fikirləri isə Milli Məclisin deputatı, YAP İdarə Heyətinin üzvü Şahin İsmayılov deyib.
Deputat bildirib ki, ötən illər ərzində milli mətbuatın yubileylərinin ölkədə geniş qeyd olunması, KİV-ə yardımların göstərilməsi, mətbuat işçilərinin sosial müdafiəsinin gücləndirilməsi, onların mənzil-məişət şəraitlərinin yaxşılaşdırılması istiqamətində tədbirlər mətbuata və mətbuat işçilərinə qayğının tərkib hissəsidir.
Onun sözlərinə görə, bu günə qədər fasiləsiz davam edən informasiya müharibəsində mətbuat işçiləri öz peşəkarlığı və vətənpərvərliyi ilə daim fərqləniblər: “Jurnalistlər 44 günlük Vətən müharibəsində cəbhə xəttində həm xəbər istehsalçısı, həm də səfərbərlik proqramı çərçivəsində əməliyyatlara cəlb olundular. Qarabağ uğrunda döyüşlərdə fərqlənən və müxtəlif medallarla təltif edilənlər arasında jurnalistlərin də olması ölkəmizdə bu sahədə çalışanlara göstərilən böyük etimadın və diqqətin təzahürüdür”.
“Bu gün biz medanın inkişafı naminə ciddi islahatların həyata keçirildiyini müşahidə edirik. Hesab edirəm ki, bu istqaimətdə cənab Prezidentin müvafiq Sərəncamı ilə yaradılmış Azərbaycan Respublikası Medianın İnkişafı Agentliyinin layihələri də vacib rol oynayacaq”, - deyə YAP İdarə Heyətinin üzvü vurğulayıb.
Nardar BAYRAMLI

Paylaş:

Baxılıb: 697 dəfə