Ağdama Böyük Qayıdış!

Bakı:

15 °C

72 %

9 m/s

Əlaqə

AZ RU EN

Ana səhifə / MEDİA / Ağdama Böyük Qayıdış!

Ağdama Böyük Qayıdış!

28.12.2023 [11:33]

4-cü və 5-ci yaşayış məhəlləsi 8 mindən çox sakini qəbul edəcək

Ağdam rayonu işğaldan azad edildikdən sonra bu ərazidə sosial-iqtisadi quruculuq məqsədilə işlər görülür. Dövlətin qarşıya qoyduğu prioritet məsələlərdən biri isə keçmiş məcburi köçkünlərin Ağdama qayıdışıdır. Bu ərazinin iqtisadi inkişafının təmin olunması məqsədilə mütəmadi olaraq Ağdamda tədbirlər, konfranslar həyata keçirilir. Görüləcək işlər barədə ictimaiyyətə geniş məlumat ötürülür.

Yeri gəlmişkən, Prezident İlham Əliyevin dekabrın 24-də Ağdama səfəri zamanı yeni layihələrin təməlinin qoyulması bu diqqət və qayğının bir nümunəsidir.

Qarabağ iqtisadi rayonuna daxil olan işğaldan azad edilmiş ərazilərdə Prezidentin xüsusi nümayəndəsinin müavini Bəşir Hacıyev KİV-ə açıqlamasında bildirib ki, Prezident İlham Əliyevin dekabrın 24-də Ağdama səfəri zamanı təməlini qoyduğu 4-cü və 5-ci yaşayış məhəllələrinə 8 min nəfərdən çox adamın köçürülməsi nəzərdə tutulur: “4-cü yaşayış məhəlləsinin ərazisi 13,96 hektar, bura köçürülməsi nəzərdə tutulmuş əhalinin sayı 4 450 nəfər təşkil edir. Ümumilikdə 1, 2, 3 və 4 otaqdan ibarət olan mənzillərin sayının 1 080 olması nəzərdə tutulur. 5-ci yaşayış məhəlləsinin isə ərazisi 12,12 hektar, bura köçürülməsi nəzərdə tutulmuş əhalinin sayı 3 803 nəfər təşkil edir. Mənzillərin sayının isə 1 115 olması planlaşdırılır.

Burada mənzillərdən başqa istirahət guşələrinin, futbol meydançalarının, yerüstü dayanacağın, söhbətgahın, uşaq oyun meydançalarının tikintisi nəzərdə tutulub. Həmçinin yaşayış kompleksləri daimi su, elektrik enerjisi və yüksəksürətli internetlə təchiz ediləcək. İstilik və isti su təchizatının isə mərkəzi qazanxana sistemi vasitəsi ilə təmin edilməsi planlaşdırılır. Yaşayış komplekslərində işlər mərhələli şəkildə həyata keçiriləcək. Yaxın zamanlarda ilk olaraq söküntü və şaquli planlama işlərinə başlanacaq. Növbəti mərhələdə isə yaşayış binalarının tikintisinə başlanması nəzərdə tutulub”, - deyə o qeyd edib.

Mərkəzi parkda məşhur çay evinin inşası nəzərdə tutulub

Bəşir Hacıyev həmçinin qeyd edib ki, Prezident İlham Əliyevin dekabrın 24-də təməlini qoyduğu Ağdam şəhər Mərkəzi parkının ümumi ərazisi 5,5 hektar olacaq.

“Bunun 70 %-ni yaşıllıqlar, 25 %-ni səki və meydançalar, 5 %-ni isə tikililər təşkil edəcək. Parkın ərazisi 4 zonaya bölünüb. Bunlar, şəhər mərkəzi, botanika bağı, çəmənliklər və meşəliklərdir. Burada inzibati binanın, mobil tipli köşklərin, restoranın, uşaq əyləncə mərkəzinin, məşhur Ağdam Çay Evinin inşası nəzərdə tutulub”, - deyə o qeyd edib.

“Azərenerji” enerji xəritəsi hazırlayıb

“Azərenerji” səhmdar cəmiyyətinin Qarabağ Regional Elektrik Şəbəkəsinin rəisi Mircəlal Hüseynovun sözlərinə görə, dekabrın 24-də Prezident İlham Əliyevin açılışını etdiyi “Ağdam” qovşaq yarımstansiyası həmin enerji xəritəsinə daxildir: “Bu yarımstansiyanın çox böyük əhəmiyyəti var. Belə ki, bu obyekt Ağdam şəhərinin bir hissəsinin, ətraf kəndlərin, yaxınlıqda yerləşən Xocalı rayonunun Əsgəran qəsəbəsinin və digər ərazilərinin, Ağdərə rayonunun enerji təchizatında mühüm rol oynayacaq. Yarımstansiyada 2 ədəd 40 MVA-lıq transformator çalışır, obyekt 35/10 KV-luq qapalı, 110KV-luq açıq paylayıcı qurğulardan ibarətdir. Bu qovşaq yarımstansiyaya “Ağdam 1” yarım?tansiyasından 10 km məsafədə 110 KV-luq ikidövrəli elektrik verilişi hava xətti çəkilib. Eyni zamanda quraşdırılan bütün avadanlıqlar SCADA dispetçer idarəetmə sisteminə tam inteqrasiya olunub”.

Şəhərdaxili yolların inşası 2026-cı ildə yekunlaşacaq

Azərbaycan Avtomobil Yolları Dövlət Agentliyinin (AAYDA) avtomobil yollarının istismarı və təmiri idarəsinin böyük mütəxəssisi Məmməd Məmmədov qeyd edib ki, Ağdam şəhərinin daxili yollarının inşaat işlərinin 2026-cı ildə yekunlaşması nəzərdə tutulub.

Onun sözlərinə görə, Ağdam şəhərinin Baş Planına əsasən şəhərin daxili yollarının ümumi uzunluğu 189,7 km təşkil edir: “Şəhərin yol və kommunikasiya şəbəkəsinin təməli Prezident tərəfindən 2022-ci ilin oktyabrında qoyulub. Şəhərin daxili yolları 2 və 8 hərəkət zolaqlı olmaqla 6 tip en kəsiyinə uyğun tikilməsi nəzərdə tutulub”.

O bildirib ki, 189,7 km-lik yolun 17,5 km hissəsində 6-8 zolaqlı olmaqla torpaq yatağının eni 55-60 metr, 50 km hissəsində torpaq yatağının eni 35-40 metr olmaqla hərəkət zolaqlarının sayı 4 ədəd, 122,2 km hissədə isə hərəkət zolaqlarının sayı 2 olmaqla torpaq yatağının eni 20-24 metr təşkil edəcək: “Artıq tikinti işlərinə başlanıb. Birinci mərhələ üzrə avtomobil yollarının 58,7 km-lik hissəsinin tikintisi nəzərdə tutulub. Ümumilikdə isə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na uyğun olaraq Ağdam şəhərinin daxili yollarının tikintisinin 2026-cı ildə yekunlaşdırılması nəzərdə tutulub”.

Günel ABBASOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Regionların sosial-iqtisadi inkişafının təşviq edilməsi” istiqaməti üzrə hazırlanmışdır

Paylaş:

Baxılıb: 726 dəfə