Var içində Xarı bülbül...

Bakı:

14°C

77%

3m/s

Əlaqə

AZ RU EN

Ana səhifə / Maraqlı / Var içində Xarı bülbül...

Var içində Xarı bülbül...

01.12.2021 [10:50]

Dəb dünyasının yeni ornamenti - Xarı bülbül

Moda aləminin öz fəsilləri, hər fəslinə uyğun da yeni rəngləri, yeni tendensiyaları, hətta yeni simaları olur. Yer üzündə nə baş verirsə, mütləq olaraq moda dünyasına da sirayət edir. Dünyanın tarixinə və moda tarixinə müxtəlif zamanlar üçün nəzər yetirsək, bunu özümüz də görə bilərik. Müharibə mövzusu da zaman-zaman moda dünyasında özünə aid xüsusi ştrixlərlə yer edib. Elə Birinci Qarabağ müharibəsini xatırlayaq. Ön cəbhədə olan igidlərimizin geyimləri rəngində donlar, ətəklər, saç sancaqları xanımlarımızın qarderobuna daxil olmuşdu. Ancaq o vaxtlar bu sadəcə xaki rəngin çalarları idi. Torpaqlarımız əldən getdikcə, həmin xaki rəngi də qara rəng əvəz etdi və sonra sadəcə böyük bir “qarageyimlilər” ölkəsinə döndük az qala. 2020-ci ilin payızındakı 44 günlük Vətən müharibəmizdən sonra isə qadınlı-kişili, uşaqlı-qocalı hər kəs əsgər geyimlərini xatırladan parçalara müraciət etdi. Hətta nişanını, toyunu bu parçadan tikilmiş gəlinliklərlə keçirənlər var. Lakin bütün parçaların, geyimlərin ümumi fonunda hamımıza əziz, qiymətli olan bir ornament görürük. Bu, Əziz Şuşanın, Azad Qarabağın, Zəfərlə bitən Vətən müharibəsinin rəmzi olan Xarı bülbüldür! Döş nişanlarından tutmuş ta zərgərlik nümunələrinə qədər hər yerdə Xarı bülbül görürük. Hər kəsdə!

Bəs geyim sənayemizdə, moda aləmimizdə Xarı bülbül varmı?

Elə 2022-ci ilin bahar-yay kolleksiyasını təqdim etməyə hazırlaşan modelyer Fəxriyyə Xələfova ilə söhbətimiz də bu mövzuda oldu.

“Mənim böyük istəyim vardı ki, kolleksiyamdakı bir neçə geyimin üzərində Xarı bülbülün təsviri olsun. Çünki 2021-ci il bizim Zəfər ilimizdir, möhtəşəm qələbəmizi qeyd etdiyimz ildir. Zəfərimizin simvolu isə məhz Xarı bülbüldür. Yeni kolleksiyamda Xarı bülbülün bütün gözəlliyini, rənglərini, möhtəşəmliyini göstərmək istəyirəm”.

Fəxriyyə xanım dekabrın 2-3-də Bakıda keçiriləcək moda həftəsinin pandemiyadan, iki illik fasilədən sonra ilk canlı moda tədbiri olacağını vurğuladı. Modelyer ölkəmizdə hələ ki, üzərində Xarı bülbül təsviri olan parçaların istehsal olunmadığından təəssüfləndiyini bildirdi: “Düşündüm ki, bu, mütləq əl işi olmalıdır. Qədim rəssamlıq sənəti olan ebru ilə məşğul olan Sevinc Əliyeva ilə əməkdaşlığa başladıq. Ebru sənəti vasitəsilə parçalar üzərində təmiz əl işi olan Xarı bülbül rəsmi işləndi. Bu gözəl rəsmləri bir neçə libasımın üzərində istifadə edib moda həftəsində təqdim edəcəyəm. Düşünürəm ki, biz Xarı bülbülü artıq bir çox yaradıcılıq istiqamətlərində görə biləcəyik. Bu çiçək Qarabağımızda bitir və bütün dünyanı heyrətləndirə biləcək bir gözəllikdir. Fikrimcə, biz Xarı bülbülü müxtəlif incəsənət nümunələri vasitəsilə dünya miqyasında, beynəlxalq festivallarda tanıtmalı, təbliğ etməliyik”.

Paylaş:

Baxılıb: 1022 dəfə