"Xalçalarda yaşayan tariximiz”

Bakı:

16°C

82%

1m/s

Əlaqə

AZ RU EN

Ana səhifə / Mədəniyyət / "Xalçalarda yaşayan tariximiz” - Reportaj

"Xalçalarda yaşayan tariximiz” - Reportaj

04.05.2024 [12:56]

Mayın 3-də Azərbaycan Milli Xalça Muzeyində Əməkdar rəssam Taryer Bəşirovun 65 illiyinə həsr olunmuş “Xalçalarda yaşayan tariximiz” adlı fərdi sərgi açılıb.

Sərgidə müxtəlif sahələrdə çalışan elm adamları, incəsənət xadimləri, rəssamlar və media nümayəndələri iştirak ediblər. Qonaqlara muzeydə quraşdırılmış xüsusi monitorda rəssamın müxtəlif illərdə yaratdığı əsərlər nümayiş olunub. Bu xalçalar xalqın həyat və məişətini əks etdirən, insan, heyvan, quş, bitki ornamentləri ilə zəngin olan sənət nümunələridir.

Açılış mərasimində Azərbaycan Milli Xalça Muzeyinin direktor vəzifəsini müvəqqəti icra edən Mira Məmmədxanova, Heydər Əliyev Fondunun Humanitar siyasət məsələləri departamentinin rəhbəri Afət Əliyeva, Azərbaycan Milli İncəsənət Muzeyinin direktoru Şirin Məlikova, AMEA Memarlıq və İncəsənət İnstitutunun professoru, Əməkdar elm xadimi Kübra Əliyeva, Tahir Salahovun Ev-Muzeyinin direktoru Səadət Mirzəyeva, Əməkdar incəsənət xadimi, professor Ziyadxan Əliyev, “Azərxalça” ASC-nin istehsalat direktoru Əlisəfa Nuriyev, Azərbaycan dövlət Rəssamlıq Akademiyasının professoru, Əməkdar rəssam Məmmədhüseyn Hüseynov çıxış edərək Taryer Bəşirovun fəaliyyətindən, özünəməxsus yaradıcılıq yolundan danışıblar.

Açılış mərasimində Milli Məclisin Mədəniyyət komitəsinin eksperti Əkbər Qoşalı Mədəniyyət komitəsinin sədri Fazil Mustafanın yubilyara ünvanladığı təbrik məktubunu təqdim edib.

Ə.Qoşalı çıxışından sonra sərgi haqqında təəsüratlarını bizimlə bölüşüb: "Bu gün çox gözəl bir tədbirdə şahidlik edirik. Eyni zamanda 4-5 mayda Milli Xalça Festivalı baş tutacaq. Çox şükür ki, may ayında sevincimizi bölüşmək üçün daha çox imkanlar əldə edirik. Qarşıdan 8 May tarixi gəlir. Əvvəlki illərdə bu tarixdə kədərə bürünmüşdüksə, bu il Şuşaya köçün sevincini yaşayacağıq. Belə bir ayda 65 yaşlı rəssamın ilk sərgisinə yığışmağının ayrı bir ecazı var. Bizi xüsusilə cəlb edən, sərginin bu qədər diqqətli və maraqlı olmasıdır. Rəssamın əsərlərində əcdadlarımıza qarşı nə qədər sayğının olduğu nümayiş olunur. T. Bəşirova daha böyük uğurlar və nailiyyətlər arzulayırıq".

Sonra tədbir iştirakçıları Taryer Bəşirovun müəllifi olduğu “Heydər Əliyev Fondu-20” xalçasının qədim ənənələrə uyğun hanadan kəsimi mərasiminə qatılıblar.

Azərbaycan Respublikası Mədəniyyət Nazirliyi və Azərbaycan Milli Xalça Muzeyinin təşkilatçılığı ilə “Xalçaçı günü” ərəfəsində keçirilən sərgidə müəllifin ornamental, portret, süjetli xalçaları, xalça eskizləri, eləcə də orijinal tərzdə işlənmiş nəbati və həndəsi naxışlı, süjetli çətənləri nümayiş olunur. Bu sənət əsərləri Azərbaycan Milli Xalça Muzeyinin, Tahir Salahovun Ev-Muzeyinin, Leopold və Mstislav Rostropoviçlərin Ev-Muzeyinin və T.Bəşirovun şəxsi kolleksiyasındandır.

Xalçaçı-rəssam əsərlərində xalqımızın dünya mədəniyyəti xəzinəsinə bəxş etdiyi inciləri, milli irsimizi, dövlətçilik tariximizi əks etdirməyə üstünlük verib. Buna bariz nümunə kimi Azərbaycanın 44 günlük Vətən müharibəsindəki qələbəsinə, Ümummilli Lider Heydər Əliyevin 100 illiyinə həsr etdiyi “Zəfər” (2021), “Tarixin salnaməsi” (2023) kimi xalçaları göstərmək olar.

Sərgidə iştirak edən daha bir qonaq - Azərbaycanın Əməkdar artisti Aydın Əliyev Taryer Bəşirovla uzun illərdir dostluq əlaqələrinin olduğunu bildirib və ona uğurlar arzulayıb: "Bu gün onun yubileyi ilə bağlı belə bir sərginin təşkil olunması bizi çox sevindirdi. Onu təbrik etməyə gəlmişik. Əsərlərini təxmini bilirdik, lakin tam detallı məlumatım yox idi. Rəssama yeni-yeni uğurlar arzulayırıq".

Taryer Bəşirovun “Türkün inancı, xalqın qazancı” (2016), “Beşiyim əbədiyyətim” (2024), “Müqəddəs üçlük” (2023) xalçaları qədim türk mədəniyyətindən, inanclarından bəhrələnərək yaradılıb. Orijinallığı ilə diqqət çəkən “Bəhram Gur və Dürsəti” (2024) xalçası isə dahi Azərbaycan şairi və mütəfəkkiri Nizami Gəncəvinin “Yeddi gözəl” poemasına həsr olunub.

Taryer Bəşirov 1986-cı ildə müəllimi, görkəmli alim, Xalq rəssamı Lətif Kərimovun 80 illiyi münasibətilə yaratdığı “XX əsrin korifeyi” adlı çətəndə ilk dəfə nəbati naxışlar tətbiq edib. O, həm də çətəndə ilk dəfə qızılı saplardan istifadə edən sənətkardır.

Özünəməxsus dəsti-xətti ilə təkrarolunmaz sənət nümunələri ərsəyə gətirən, yaradıcılığında daim müxtəlif yeniliklər edən xalçaçı-rəssamın sərgisinə dair kataloq da nəşr olunub, onun fəaliyyətinə həsr edilən mühazirə keçirilib.

Qeyd edək ki, “Xalçalarda yaşayan tariximiz” sərgisi 12 may tarixinədək davam edəcək.

Havar Şəfiyeva

Paylaş:

Baxılıb: 608 dəfə