I İohan Sebastyan Bax Beynəlxalq festivalı çərçivəsində növbəti konsert “ÜNS” Yaradıcılıq Səhnəsində təqdim olunub

Bakı:

11 °C

87 %

7 m/s

AZ RU EN

Ana səhifə / Mədəniyyət / I İohan Sebastyan Bax Beynəlxalq festivalı çərçivəsində növbəti konsert “ÜNS” Yaradıcılıq Səhnəsində təqdim olunub

I İohan Sebastyan Bax Beynəlxalq festivalı çərçivəsində növbəti konsert “ÜNS” Yaradıcılıq Səhnəsində təqdim olunub

20.03.2014 [09:57]

Xəbər verdiyimiz kimi, Moskvanın fransalı müqəddəs Lüdovik kilsəsinin, “Art-noyabr” Beynəlxalq incəsənət festivalının təşəbbüsü, “ÜNS” Yaradıcılıq Səhnəsinin və “AR Production”ın dəstəyi ilə martın 1-dən başlanan və Moskva, Riqa, Bakı şəhərlərini əhatə edən “BWV-2014” I İohan Sebastyan Bax Beynəlxalq festivalı davam edir.
Bu yeni festivalın əsas strukturu 1950-ci ildə Volfqanq Şmider tərəfindən tərtib olunmuş “Baxın əsərlərinin kataloqu”na (Bach-Werke-Verzeichnis - qısaldılmış formada BWV) uyğun hazırlanıb. İ.S.Baxın 1120 əsərinin əhatə olunduğu bu kataloq həmin vaxtadək digər bəstəkarların xronoloji prinsiplə hazırladıqları kataloqlardan tematikliyi ilə fərqlənir. Şübhəsiz ki, Volfqanq Şmider kataloqun hazırlanmasında müvafiq sahə üzrə uzun illər toplanmış təcrübədən, o cümlədən 1851-ci ildən Bax Cəmiyyətinin dünya şöhrətli bəstəkarın əsərlərinin akademik nəşri üzrə fəaliyyət istiqamətindən bəhrələnib. İ.S.Baxın əsərləri xronoloji ardıcıllıqla deyil, janrlar üzrə nəşr edilib.
Bu prinsipi əsas götürən “BWV-2014” I İohan Sebastyan Bax Beynəlxalq festivalı dünya şöhrətli bəstəkarın irsini orqan, kamera-instrumental, orkestr və oratoriya istiqamətlərində təqdim edir.
Festival çərçivəsində Bakıda ilk konsert martın 4-də Müslüm Maqomayev adına Azərbaycan Dövlət Filarmoniyasının kamera və orqan musiqisi zalında təqdim edilib. Həmçinin martın 16-da “ÜNS” Yaradıcılıq Səhnəsinin dəstəyi ilə Riqanın Böyük Gildiya konsert zalında Liepaya kamera orkestri İ.S.Baxın əsərlərini ifa edib. Orkestrə Azərbaycanın Xalq artisti Yalçın Adıgözəlov dirijorluq edib. Konsertin solistləri Xalq artisti Murad Adıgözəlzadə (fortepiano), Aleksandr Trostyanski (skripka), Andrey Qridçuk (alt) olublar.
AzərTAc xəbər verir ki, martın 18-də “ÜNS” Yaradıcılıq Səhnəsində festival çərçivəsində növbəti konsert olub.
Konsertdə Xalq artisti Teymur Göyçayevin dirijorluğu ilə Qara Qarayev adına Azərbaycan Dövlət kamera orkestri çıxış edib. Solistlər Xalq artisti Murad Adıgözəlzadə (fortepiano), Aleksandr Trostyanski (skripka), Andrey Qridçuk (alt), Zərifə Alxasova (skripka) və konsertin xüsusi qonağı İlham Nəzərov (kontratenor) olublar.
“ÜNS” Yaradıcılıq Səhnəsində tamaşaçılara İ.S.Baxın “Brandenburq 3 nömrəli sol major konserti”, “Skripka və orkestr üçün mi major konserti”, “Qoboy və orkestr üçün fa major konserti”nin alt və orkestr üçün işlənmiş variantı, “Klavir və orkestr üçün fa minor konserti”, “Skripka, qoboy və orkestr üçün do minor konserti”nin skripka, alt və orkestr üçün işlənmiş versiyası, “Matfey əzabları” əsərindən ariya səslənib.
Martın 29-dək davam edəcək festivalın sonuncu konserti Moskvada keçiriləcək və həmin gün İ.S.Baxın “İoanın əzabları” əsəri səslənəcək.
“ÜNS” Yaradıcılıq Səhnəsində təqdim olunan konsert alqışlarla qarşılanıb.

Paylaş:

Baxılıb: 1348 dəfə