“MUZ TV Azərbaycan”ın peyk yayımına başlaması tamaşaçıya fərqli kanal seçmək imkanı verəcək

Bakı:

19°C

63%

7m/s

Əlaqə

AZ RU EN

Ana səhifə / Mədəniyyət / “MUZ TV Azərbaycan”ın peyk yayımına başlaması tamaşaçıya fərqli kanal seçmək imkanı verəcək

“MUZ TV Azərbaycan”ın peyk yayımına başlaması tamaşaçıya fərqli kanal seçmək imkanı verəcək

04.11.2017 [01:02]

İxtisaslaşmış yeni musiqi kanalının yaranması tamaşaçı sifarişinin və dünya təcrübəsinin ölkəmizdə uğurla tətbiq olunmasının təzahürüdür. “MUZ TV Azərbaycan” bu formatda beynəlxalq standartı yerli televiziya məkanına gətirməklə yanaşı, tamaşaçılara fərqli kanal seçmək imkanı yaradır, efiri daha əyləncəli və maraqlı edir.
2012-ci il mayın 11-də fəaliyyətə internet yayımı ilə başlayan telekanal yarandığı gündən musiqi mədəniyyətimizin təbliğinə xüsusi önəm verir. “Muz-tv.az” saytı vasitəsilə yayımlanan ilk musiqili internet televiziya kanalı kimi o, bir çox yeniliklərə imza atıb.
“MUZ TV Azərbaycan” telekanalının bədii rəhbəri Sədi Məmmədov AZƏRTAC-ın müxbirinə deyib: “Musiqiyə sevgi ilə” devizi altında 5 il ərzində bir dəqiqə belə dayanmadan musiqi mədəniyyətimizi, tariximizi və çağdaş musiqimizi təbliğ etmişik. Yayıma başladığımız ilk gündən tamaşaçıya dünya və yerli musiqi xəzinəsinin incilərini, orijinal layihələri, məxsusi klipləri, canlı reportajları təqdim etmək əsas prioritetimiz olub. “MUZ TV Azərbaycan”ın yeni musiqiçilər nəslinin yetişdirilməsi, gənc istedadların üzə çıxarılması, onların peşəkar musiqiyə istiqamətləndirilməsi ilə bağlı layihələri bu sırada xüsusi yer tutur”.
Telekanalın bədii rəhbəri qeyd edib ki, indiki dövrdə bir sahə üzrə ixtisaslaşmış, ayrıca kontenti olan televiziyalar daha çox uğur qazanır. Ümumiyyətlə, bir sıra ölkələrdə televiziya keyfiyyətli və nadir məhsul yaradılması ilə məşğuldur. Çünki sonsuz sayda seçim imkanı olan izləyiciyə elə məhsul təqdim edilməlidir ki, o, həm davamlı olsun, həm də tamaşaçını özünə cəlb edə bilsin. Bu baxımdan musiqi kanalları xüsusi önəm daşıyır. İnternet əsrində tamaşaçının irihəcmli televiziya layihələrindən daha lakonik və cəlbedici layihələrə istiqamətlənməsi fonunda musiqili televiziyanın önə çıxması təbiidir.
“Muz-tv.az” saytı vasitəsilə telekanalın verilişləri, eksklüziv süjetləri, musiqiçilər və sənət adamları ilə maraqlı söhbətlərlə tanış olmaq mümkündür. Veb-resursların bol olduğu bir dövrdə yalnız orijinal kontent vasitəsilə oxucuların diqqətini cəlb etmək olar və muz-tv.az saytının özəlliyi də elə bundadır. Resurs həqiqətən məxsusi materialları ilə istifadəçinin diqqətini uzun müddət özündə saxlaya bilir. İnformasiyanın bol olduğu onlayn mediada oxuculara özəl xəbərlər təqdim etmək böyük zəhmət və fəallıq tələb edir. “Muz-tv.az” saytı bu işin öhdəsindən məharətlə gəlir.
“MUZ TV Azərbaycan”ın peyk yayımına başlaması yerli və xarici tamaşaçıya fərqli kanal seçmək imkanı verməklə yanaşı, həm də dünya təcrübəsini, digər ölkələrdə mövcud olan musiqili televiziya formatını Azərbaycana gətirir. Bundan əlavə, məqsəd Azərbaycan milli və müasir musiqisinin dünya arenasına çıxması, təbliği və geniş yayılmasıdır.
Xatırladaq ki, MUZ TV ilə “Azərkosmos” arasında əldə olunmuş razılığa əsasən, kanal oktyabrın 6-dan etibarən “Azerspace-1” peyki vasitəsilə 13975 V/11174,4 H tezliyində yayımlanır.

Paylaş:

Baxılıb: 833 dəfə