Qadın problemləri əsərlərdə -

Bakı:

26 °C

57 %

12 m/s

Əlaqə

AZ RU EN

Ana səhifə / Mədəniyyət / Qadın problemləri əsərlərdə - "E TİRAZ" sərgisindən reportaj

Qadın problemləri əsərlərdə - "E TİRAZ" sərgisindən reportaj

04.03.2024 [10:46]

Müasir İncəsənət Muzeyində rəssam Günel Ravilovanın qadın mövzusuna həsr olunan sərgisi keçirilir. Sərgidə Azərbaycanın xalq rəssamları, incəsənət adamları və müxtəlif sahələrdən olan digər tanınmış gənclər iştirak edirlər.

Bir-birindən fərqli və maraqlı əsərləri insanı dərindən düşündürür.

40-a yaxın rəngkarlıq və müxtəlif ölçüdə olan qrafik əsərlərinin tamaşaçılara təqdim olunduğu bu sərgidə qadınların bir çox problemləri tam çılpaqlığı ilə göstərilib.

Açılışda çıxış edən Xalq rəssamı, professor Arif Hüseynov bildirib ki, Günel Ravilova əsərlərində daha çox qadın obrazı və qadın problemlərinə toxunur. "Günel xanım həmişə axtarışda olan bir rəssamdır. Onun özünə aid qrafikaları, rəngkarlıq işləri var. Hər işdə də özünün fəlsəfəsi var. Bu fəlsəfə də odur ki, bütün qadınların problemlərini həll etmək istəyir. Məhz əsərlərində də bunu çox aydın əks etdirir", - deyə A.Hüseynov qeyd edib.

Rəssam var ki, çox vaxt eyni rəsmlərə müraciət edir. Günel xanım isə hər zaman qadınların xoşbəxtliyini, cəmiyyətdəki rolunu əsas tutaraq əsərlər yaratmaq istəyib. Rəssam əsərləri semantik mərkəzini tablonun daxilində deyil, yaradılmış obrazla onun seyrçisi arasındakı boşluğa köçürərək, şəkli tamaşaçıya ruhən “hopdurur”.

Qonaqlar arasında yer alan Milli Məclisin deputatı Ülviyyə Həmzəyeva qadın obrazına həsr olunan bu sərginin çox maraqlı olduğunu deyib. "Azərbaycanda rəssamlara yaxşı şərait yaradılıb. Onlar ictimaiyyətə öz əsərlərini belə sərgilər vasitəsilə göstərə bilirlər. Bu çox önəmlidir. Günel xanımın özünəməxsus yanaşması və üslubu var", - deyə deputat diqqətə çatdırıb.

Sonra çıxış edən Günel Ravilova hər dəfə əsərlərində qadın mövzusuna toxunduğunu vurğulayaraq deyib: "Mən əsərlərimdə qadın həyatını, yaşadığı dövrü, sevgisini göstərməyə çalışıram. İşlərimə baxdığınızda görəcəksiniz ki, əsərlər həyat tərzidir, danışan əsərlərdir, hamısında nələrisə deməyə çalışmışam".

Çıxışlardan sonra qonaqlar əsərlər sərgilənən zala üz tuturlar.

Əsərləri seyr edə-edə daha bir gənc rəssam yaxınlaşıram. Gənc rəssam Məryəm Məmmədova da qeyd edir ki, müəllifin əsərlərinin başlıca obrazı qadın olub: "Günel Ravilova özünə məxsus tərzi olan rəssamlardan biridir. Tanınmış rəssam hər zaman fərqli formalarda əsərlərini nümayiş elətdirir. Onun əsərlərində qadınlar əsas obrazdır".

Rəssamı narahat edən problemlərdən ən başlıcası cəmiyyətdə qadınlara qarşı doğulduğu andan münasibətlə bağlıdır. Cəmiyyətdə daimi təzyiq və qadınlara qoyulan sərhədlər səbəbindən mübarizə aparmaq çox çətinləşir və bununla qorxular yaranır. Ailə qurmamaq, müəyyən yaşa qədər layiqli ailə qurmağa vaxt tapmamaq, sosial statusuna uyğun olmayan bəy seçmək, hətta ömrünü tək keçirmək qorxusu - bütün bu inanclar nəsildən-nəslə keçir, çünki bütün bu çətinliklərdən keçmiş, qızlarını qorumağa çalışan analar özləri də istəmədən qorxularını onların üzərinə qoymağa başlayırlar.

Qeyd edək ki, Günel Ravilova sənətkar ailəsində böyüyüb. 1998-ci ildən indiyədək bir çox sərgilərdə uğurla iştirak edib. Həmçinin “Qadınlara qarşı zorakılıq” adlı sərgidə birinci yerə layiq görülüb. Onun möhtəşəm rəsmləri müxtəlif sərgilərdə nümayiş etdirilib, birinci yerə, bir çox mükafat və diplomlara layiq görülüb. Həmçinin onun “Fransız öpüşü” adlı əsəri Mənzər Hacıyeva Moda Evinin təşkil etdiyi “Paint a Scarf” müsabiqəsində birinci yerə və diploma layiq görülüb. Hazırda Günelin əsərləri həm şəxsi qalereyalarda, həm də dünyanın müxtəlif ölkələrində yerləşən muzeylərdə nümayiş etdirilir.

Sərgi martın 10-dək davam edəcək.

Havar Şəfiyeva

Paylaş:

Baxılıb: 1040 dəfə