Rusiyanın Azərbaycanlı Gənclər Təşkilatının sədri Leyla Əliyeva RAGT-nin Həştərxan vilayətindəki regional bölməsinin üzvləri ilə görüşüb

Bakı:

29 °C

51 %

3 m/s

AZ RU EN

Ana səhifə / Siyasət / Rusiyanın Azərbaycanlı Gənclər Təşkilatının sədri Leyla Əliyeva RAGT-nin Həştərxan vilayətindəki regional bölməsinin üzvləri ilə görüşüb

Rusiyanın Azərbaycanlı Gənclər Təşkilatının sədri Leyla Əliyeva RAGT-nin Həştərxan vilayətindəki regional bölməsinin üzvləri ilə görüşüb

13.09.2012 [16:04]

Leyla xanım Əliyeva: Məqsədimiz Rusiyada yaşayan azərbaycanlı gəncləri bir araya gətirməkdir. Bu gün RAGT-nin 60-dan çox regional bölməsi var
AzərTAc-ın xüsusi müxbiri xəbər verir ki, sentyabrın 12-də Həştərxanda Heydər Əliyev adına 11 nömrəli orta məktəbdə Rusiyanın Azərbaycanlı Gənclər Təşkilatının (RAGT) sədri Leyla xanım Əliyeva qurumun Həştərxan bölməsinin üzvləri ilə görüşüb.
Əvvəlcə Leyla Əliyeva Heydər Əliyev Fondunun təşəbbüsü və Azərbaycan dövlətinin maliyyə dəstəyi ilə əsaslı təmir edilmiş məktəbin binası ilə tanış olub. Yenidənqurma işləri zamanı iki yeni korpus tikilib, yeni mebel gətirilib, sinif otaqları ən müasir avadanlıqla təchiz edilib.
Leyla Əliyeva sinif otaqlarını gözdən keçirərək, şagirdlər üçün yaradılan şəraitlə tanış olub. Bildirilib ki, hazırda məktəbdə 650 şagird təhsil alır. Bu şagirdlərin 32-si azərbaycanlıdır. Məktəbdə 20 sinif otağı var. Burada 42 müəllim işləyir.
Leyla xanım Əliyeva görüşdə çıxış edərək bildirib ki, RAGT- nin Həştərxan bölməsi ən fəal regional bölmələrdən biridir. O vurğulayıb ki, RAGT Həştərxanda çoxlu layihə, o cümlədən təhsil sahəsində layihələr həyata keçirib. Leyla xanım Əliyeva deyib: “RAGT, demək olar, beş ildir mövcuddur. Məqsədimiz Rusiyada yaşayan azərbaycanlı gəncləri bir araya gətirməkdir. Bu gün RAGT-nin 60-dan çox regional bölməsi vardır”.
RAGT-nin regional bölmələrinin Azərbaycanın milli bayramlarını qeyd etdiklərini, ölkəmizin Ermənistan-Azərbaycan, Dağlıq Qarabağ münaqişəsindəki ədalətli mövqeyini təbliğ etdiklərini, respublikamızın həqiqətlərini yaydıqlarını bildirən Leyla xanım Əliyeva vurğulayıb: “Biz inanırıq ki, münaqişə tezliklə öz ədalətli həllini tapacaqdır, bütün qaçqınlar və məcburi köçkünlər öz torpaqlarına qayıdacaqlar”.
RAGT-nin sədri qeyd edib ki, Heydər Əliyev Fondunun təşəbbüsü ilə Azərbaycanda “IDEA” adlı beynəlxalq kampaniya başlanıb. Ötən dövrdə bu kampaniya çərçivəsində çoxlu maraqlı layihə həyata keçirilib, təxminən 60 min ağac əkilib, konfranslar, seminarlar keçirilib. Çıxışının sonunda Leyla Əliyeva deyib: “Mən sizi bu hərəkata fəal qoşulmağa və öz təkliflərinizi bölüşməyə dəvət edirəm”.
Təşkilatın Həştərxan regional bölməsinin sədri Elvin Hüseynov bu görüşə görə vilayətin azərbaycanlı gəncləri adından Leyla xanım Əliyevaya minnətdarlığını bildirərək deyib ki, RAGT-nin Həştərxan vilayətindəki bölməsi öz sıralarında regionun ictimai-siyasi həyatında fəal iştirak edən 350-dən çox gənci birləşdirir. E.Hüseynov vurğulayıb ki, Həştərxan Vilayət Administrasiyası 2010-2011-ci illərin yekunlarına görə şəhərin gənclər təşkilatları arasında ən yüksək qiyməti məhz RAGT-nin regional bölməsinə verib.
Sonra Leyla xanım Əliyeva tədbir iştirakçılarının və RAGT-nin üzvlərinin suallarını cavablandırıb.
Sonda xatirə şəkli çəkdirilib.

Paylaş:

Baxılıb: 1086 dəfə