Əli Əhmədov: “Siyasi məhbus” məsələsi bəzi Avropa dairələrinin Azərbaycana təzyiq üsulundan başqa bir şey deyil

Bakı:

16 °C

36 %

13 m/s

AZ RU EN

Ana səhifə / Siyasət / Əli Əhmədov: “Siyasi məhbus” məsələsi bəzi Avropa dairələrinin Azərbaycana təzyiq üsulundan başqa bir şey deyil

Əli Əhmədov: “Siyasi məhbus” məsələsi bəzi Avropa dairələrinin Azərbaycana təzyiq üsulundan başqa bir şey deyil

24.01.2013 [02:54]

Yeni Azərbaycan Partiyasının Sədr müavini - İcra katibi Əli Əhmədov dünən AŞPA-da müzakirə olunan “Azərbaycanda siyasi məhbuslar məsələsində atılmalı olan addımlar” və Azərbaycanın Avropa Şurası qarşısında üzərinə götürdüyü öhdəliklərlə bağlı hesabatlara münasibət bildirib. Əli Əhmədov APA-ya müsahibəsində hər iki hesabatda Azərbaycana qarşı iradları cavablandırıb.
Əli Əhmədovun sözlərinə görə, bir sıra beynəlxalq təşkilatlarda belə bir təəssürat yaranıb ki, Azərbaycanı kim tənqid edirsə o haqlıdır, kim isə Azərbaycanın mövqeyini müdafiə edirsə, haqsızdır: “Yəni, bu məntiqlə əgər Azərbaycanın əleyhinə hansısa hesabat varsa, bu, həqiqət sayılır. Bu cür yanaşma əsasında real həqiqəti ortaya çıxarmaq mümkün deyil. Belə yanaşma qərəzlidir”.
YAP-ın Sədr müavini bildirib ki, AŞPA-da hazırda təqdim olunan hesabatlarla əlaqədar dəfələrlə müzakirələr aparılıb: “Mən belə hesab edirəm ki, siyasi məhbuslar problematikası bəzi Avropa dairələrinin Azərbaycana təzyiq üsulundan başqa bir şey deyil. Azərbaycanda istər amnistiya aktı, istərsə də Prezidentin əfv sərəncamları ilə xeyli məhbus azadlığa buraxılıb. Qəribəsi ondadır ki, hər amnistiyadan, əfvdən sonra Azərbaycanda “siyasi məhbus”ların sayı artır. Yüzlərlə məhbus azad olunur, onlar arasında da ayrı-ayrı beynəlxalq təşkilatların guya “siyasi məhbus” hesab elədiyi adamlar da var, azadlığa buraxılanlar arasında onların da sayı heç də az olmur. Amma bu azadlığa buraxılmadan bir neçə gün sonra hazırlanan hesabatda Azərbaycandakı “siyasi məhbus”ların sayı onlara görə artır. Əslində bu müddət ərzində bəlkə də bütövlükdə Azərbaycanda o qədər adam həbs olunmayıb, məhkəmə qərarları çıxarılmayıb. Bax bunun özü “siyasi məhbus” problematikasının nə qədər mübahisəli, qeyri-obyektiv və qərəzli olmasını sübuta yetirir. Azərbaycan cəmiyyəti də bunu obyektiv olmayan reallıq kimi qəbul etməlidir”.
Əli Əhmədov hesab edir ki, Azərbaycana qarşı iradlardan ibarət həmin məruzələr ətrafında aparılan diskussiyaların özü Azərbaycan dövlətçiliyinə qarşı olan qüvvələrin apardığı mübarizənin bir elementidir. Onun sözlərinə görə, bu mübarizədə Azərbaycanda olan bəzi hüquq müdafiəçiləri, yaxud siyasi təşkilatlar da yaxından iştirak edirlər: “Yəni o məruzələrin hazırlanması üçün tutulan uydurma siyahılar üçün buradan materiallar göndərirlər. Təbii ki, bu, tam ədalətsizlikdir. “Siyasi məhbus” anlayışından bir dövlətə qarşı istifadə etmək ənənəsinə son qoyulmalıdır”.
Seçki Məcəlləsinə dəyişikliyin edilməsi ilə bağlı edilən tövsiyəyə də toxunan Əli Əhmədov deyib ki, Azərbaycanın Seçki Məcəlləsi ölkədə ədalətli və bərabər seçkilərin keçirilməsi üçün ciddi hüquqi baza yaradır: “Seçki Məcəlləsini təkmilləşdirməyə və yaxud da onun hansısa komponentlərində dəyişiklik etməyə elə də ciddi ehtiyac yoxdur. Seçki Məcəlləsini dəyişməklə kimlərinsə seçki ilə bağlı iddialarını və istəklərini həyata keçirmək mümkün deyil. Azərbaycanda seçki qanunvericiliyi ilə bağlı kifayət qədər təcrübə formalaşıb. İndi imkan vermək olmaz ki, Azərbaycanın seçki qanunvericiliyini bir poliqona çevirsinlər. Hansısa qüvvələr Azərbaycanda kimlərinsə hakimiyyətə gəlməyini istəyirsə, onların bu istəkləri üçün seçki qanunvericiliyi bir alətə çevrilə bilməz. Ona görə də hesab edirəm ki, Seçki Məcəlləsində hansısa bir dəyişikliyin edilməsi üçün əsas mövcud deyil. Seçkidə qələbə qazanmayan yeganə səbəbi insanların rəyidir. İndiki seçki qanunvericiliyi də buna kifayət qədər şərait yaradır”.

Paylaş:

Baxılıb: 1072 dəfə