Müluzlular Azərbaycanı kəşf edir

Bakı:

25 °C

65 %

2 m/s

Əlaqə

AZ RU EN

Ana səhifə / Siyasət / Müluzlular Azərbaycanı kəşf edir

Müluzlular Azərbaycanı kəşf edir

07.02.2013 [01:11]

Azərbaycanı tanıtmaq istiqamətində Heydər Əliyev Fondunun təşkilatçılığı və ölkəmizin Fransadakı səfirliyinin dəstəyi ilə “Qafqazın mirvarisi olan Azərbaycanın mədəni dəyərləri” layihəsinə əsasən Fransanın Alzas regionunun Müluz şəhərində keçirilən Azərbaycan günləri böyük əks-səda doğurub. Keçirilən tədbirlər “Alzasın son xəbərləri”, “Alzas” və digər yerli mətbu orqanlarda geniş işıqlandırılıb.
Alzas bölgəsində gündəlik nəşr olunan “Alzasın son xəbərləri” qəzetində dərc olunan “Müluzlular Azərbaycanı kəşf edir” sərlövhəli məqalədə qədim tarixə, zəngin mədəniyyətə, geniş turizm imkanlarına malik olan Azərbaycan ilə ilk tanışlığa Müluz şəhərindən başlanması diqqətə çatdırılıb. Şəhərdə Azərbaycan mədəni dəyərlərindən ibarət sərginin açılmasından, incəsənət ustalarımızın konserti sayəsində müluzluların ölkəmizi kəşf etmələrindən, respublikamız barədə ətraflı məlumat əldə etmələrindən söhbət açılıb.
Qəzetin “Azərbaycan mənim məhəbbətim” sərlövhəli məqaləsində Müluzda təşkil olunan sərgidə Azərbaycanın müxtəlif adda şərablarından, musiqi alətlərindən, xalçalarından, misgərlik və dulusçuluq sənəti nümunələrindən ibarət guşənin şəhər sakinləri arasında böyük maraq doğurduğu xüsusi vurğulanıb.
Məqalədə beynəlxalq sərginin təşkil edildiyi “Park-ekspo” sərgi salonunun prezidenti Filipp Metronun Azərbaycan şərabları ilə bağlı səsləndirdiyi fikirlərinə yer verilib. O, şərabçılıq sahəsində Azərbaycanın da Alzas kimi uzun yol keçdiyini, ölkəmizdə istehsal olunan şərabların keyfiyyətinə görə diqqəti cəlb etdiyini bildirib.
Məqalədə, eyni zamanda, Alzas regionunun və ətraf qəsəbələrin prezidenti senator Jan-Mari Bokelin Müluzun Sin teatrının binasında təşkil olunan konsertin fransızlarda böyük maraq doğurduğuna, Azərbaycanın təbii sərvətlərlə zəngin bir ölkə olduğuna dair söylədiyi fikirlərdən də bəhs olunub. Senator Azərbaycan ilə Fransa arasında əlaqələrin daha da gücləndirilməsinin vacibliyini vurğulayıb, daha çox fransız müəssisələrinin ölkəmizlə əməkdaşlıq qurmaqda maraqlı olacağına ümid etdiyini bildirib.
“Alzas” qəzetində dərc olunmuş məqalədə Müluzda təşkil edilmiş sərgidə Azərbaycan şərablarının böyük maraq doğurduğu, ölkəmizdə də şərab festivalının keçirildiyi diqqətə çatdırılıb.
“Alzasın son xəbərləri” qəzetinin başqa bir nömrəsində dərc olunmuş “Müluzlular Azərbaycanı kəşf edir” adlı məqalədə Qafqazın mirvarisi olan Azərbaycanın mədəniyyəti ilə müluzluların ilk dəfə tanış olmalarından bəhs edilib. Müluz şəhərinin sakinlərinin Şərq ilə Qərbin qovuşuğunda yerləşən, Cənubi Qafqazın əsas söz sahibi olan və on milyona yaxın əhalinin yaşadığı Azərbaycan kimi sürətlə inkişaf edən, gözəl təbiətə malik bir ölkə ilə tanışlıqda bəxtlərinin gətirdiyi qeyd edilib.
Məqalədə Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə “Qafqazın mirvarisi olan Azərbaycanın mədəni dəyərləri” layihəsinin Fransada keçirilməsi ilə iki ölkə arasında diplomatik əlaqələrin yaradılmasının bayram edildiyi diqqətə çatdırılıb.
Azərbaycan günlərinin Müluzda keçirilməsinin heç də təsadüfü olmadığı bildirilən yazıda Alzas və ətraf qəsəbələrin prezidenti senator Jan-Mari Bokelin və onun beş senator həmkarının Azərbaycan-Fransa diplomatik əlaqələrini daha da inkişaf etdirmək üçün keçən il Bakıya səfər etdiyi xatırlanıb. Məqalədə, həmçinin senatorun “Azərbaycan sürətli inkişaf yolundadır. İnkişaf isə özlüyündə demokratiyadan xəbər verir. Azərbaycanda yalnız folklor deyil, bütün mədəni sahələrdə yüksək inkişaf tempi mövcuddur” fikirləri xüsusi vurğulanıb.
Müluzda açılan beynəlxalq sərgidə Azərbaycan guşəsi ilə tanış olan Fransa turizm şirkətinin rəsmisi Jan-Pyer Valterin ölkəmiz barədə söylədikləri fikirlər də məqalədə yer alıb. J.P.Valter deyib: “Avropa ilə Asiya arasında qapı rolunu oynayan Azərbaycan mədəniyyətini mütləq kəşf etmək lazımdır. Çünki qədim tarixə malik bu ölkə zəngin mədəniyyətə və geniş turizm imkanlarına malikdir. Azərbaycan muğamı UNESCO tərəfindən bəşəriyyətin qeyri-maddi mədəni irisinin şedevr əsərlər siyahısına daxil olunmuşdur”.
Məqalədə Azərbaycan və fransız xalqlarının bir-birilərini yaxından tanımalarında belə tədbirlərin müntəzəm olaraq keçirilməsinin xüsusi əhəmiyyət daşıdığı diqqətə çatdırılıb.

Paylaş:

Baxılıb: 1130 dəfə