Ermənistan BMT-də ifşa olundu

Bakı:

16 °C

36 %

13 m/s

Əlaqə

AZ RU EN

Ana səhifə / Siyasət / Ermənistan BMT-də ifşa olundu

Ermənistan BMT-də ifşa olundu

05.12.2024 [09:08]

Bu ölkədə irqi ayrı-seçkilik, ekstremizm və terrorizm dövlət siyasəti səviyyəsindədir

Ermənistanda irqi ayrı-seçkilik, ekstremizm və terrorizm dövlət siyasəti səviyyəsindədir. Ermənilər tarixən azərbaycanlılara və türklərə qarşı düşmənçilik siyasəti yürüdüblər. Hazırda xarici ölkələrdəki erməni diasporaları da bu zərərli fəaliyyətini davam etdirir. İrqi ayrı-seçkilik, ksenofobiya, etnik nifrət, “ASALA” terrorçularından “qəhrəman” obrazının yaradılması, terrorizm və ekstremizmin ideoloji təbliğatı bu ölkədə davam etməkdədir. Bir neçə il öncə Ermənistanın sabiq prezidenti Robert Köçəryan erməni və Azərbaycan xalqlarının etnik uyğunsuzluğu barəsində rasizm meylli fikirlər söyləmiş, Serj Sarkisyan isə erməni gəncləri qarşısında çıxış edərək, ermənilərin “üstün genetik xüsusiyyətləri” və qonşu dövlətləri nəzərdə tutaraq, erməni gəncləri qarşısında “tarixi erməni torpaqları”nı azad etmək kimi missiyanın durması barəsində çağırışlar etmişdi. Hazırda Nikol Paşinyanın da mövqeyi onlardan çox da fərqlənmir.

Zərərli ideologiyanın nəticələri

Ermənistanda dövlət səviyyəsində irqi ayrı-seçkilik, ekstremizm və terrorizm əsasında aparılan bu kimi ideoloji təbliğat, gənc nəsil, o cümlədən diaspordan olan gənclərin bu ruhda tərbiyə edilməsi və erməni apostol kilsəsinin yeparxiyasının da bu proseslərdə iştirakı bütün regionu ciddi potensial təhlükələr qarşısında qoyur. Belə “ideologiyanın” nəticəsidir ki, ermənilər son 200 ildə xalqımıza qarşı dəfələrlə soyqırımı törədib, indiki Ermənistandan azərbaycanlılar kütləvi qovulub, 30 il ərazində torpaqlarımızın bir hissəsi işğal altında saxlanılıb. İşğal dövründə həmin ərazilərdə hər şey tamamilə məhv edilib. Eləcə də tarixi, dini və mədəni abidələrimiz yerlə yeksan olunub. Məqsəd bu torpaqlardan Azərbaycan xalqının izini silmək idi.

Lakin Azərbaycan öz torpaqlarını işğaldan azad etməklə tarixi ədaləti bərpa etdi. Nə qədər paradoksal olsa da, işğalçı Ermənistan bu gün beynəlxalq müstəvidə ölkəmizə qarşı iddialar qaldırır. Bu iddialar sırasında irqi ayrıseçkilik, etnik təmizləmə və s. var. Halbuki, Ermənistanın konstitusiyasında ölkəmizə və Türkiyəyə qarşı ərazi iddiaları hələ də mövcuddur. Azərbaycanın çağırışlarına rəğmən, konstitusiyada dəyişikliklər edilmir.

Erməni diplomat haqlı suallar qarşısında aciz qalıb

Artıq ermənilər beynəlxalq müstəvidə hər kəsi öz yalanlarına inandıra bilmir. Buna BMT-nin İrqi ayrı-seçkiliyin ləğv edilməsi üzrə Komitəsinin 114-cü sessiyası zamanı bir daha şahid olduq. Belə ki, sessiya çərçivəsində dekabrın 3-də Ermənistanın dövrü məruzəsinə baxılıb. Ermənistan üzrə məruzəçi Yeung Sık Yuen Yeung Kam Con Komitənin bu ölkədə irqçi təşkilatları və bu təşkilatlarda iştirakı kriminallaşdıran qanunvericiliyin olmadığından narahatlığını ifadə edib və son dövrlər ərzində nifrət zəminində baş vermiş cinayətlər barədə danışıb.

Məruzəçi: Ermənistanda azərbaycanlılara və türklərə qarşı nifrət mövcuddur

Erməni kimliyinin azlıqlara qarşı dözümsüzlüyə haqq qazandırmaq üçün istifadə olunduğunu bildirən məruzəçi Ermənistanda etnik və milli mənsubiyyətinə görə insanlara qarşı nifrət zəminində çıxışların olduğuna diqqəti çəkib və azərbaycanlılara və türklərə qarşı da bu cür çıxışların edildiyini vurğulayıb. Eyni zamanda, bir neçə gün öncə Azərbaycan əsilli Gürcüstan vətəndaşının Ermənistanda təcili eniş etmiş təyyarədən enməsinə icazə verilməməsi məsələsini qaldıraraq, erməni nümayəndə heyətindən bununla bağlı açıqlama istəyib.

Ermənistan nümayəndə heyətinin rəhbəri, xarici işlər nazirinin müavini Vahan Kostanyan vəziyyətdən çıxmağa çalışaraq, Ermənistan hakimiyyətinin üzləşdiyi çətinliklərdən bəhs edib.

Ermənistanda niyə azərbaycanlı yaşamır?

Eyni zamanda, digər çıxış edənlər Ermənistanın məruzəsində Azərbaycanla bağlı çox sayda iddiaların yer aldığına təəccüblənərək, Ermənistanda bir nəfər azərbaycanlının belə yaşamadığı halda sənəddə Azərbaycana bu qədər yer ayrılmasına aydınlıq gətirilməsini sorğu ediblər. Vahan Kostanyan bu suala cavab verməkdə çətinlik çəkərək, azərbaycanlıların Ermənistanda yaşamadığını təsdiq edib, sənəddə Azərbaycanla bağlı yazılanların məruzənin mahiyyətinə uyğun olmayan təhlükəsizlik və siyasi vəziyyətlə “əlaqələndirməyə” çalışıb.

Göründüyü kimi, artıq ermənilər saxta iddialarını və yalanlarını həqiqət kimi qəbul etdirməyə çətinlik çəkirlər. Ona görə də, Ermənistan və erməni diaspor təşkilatları rasizm meyilli bu təhlükəli siyasətə son qoymalı, qonşu xalqlar və dövlətlərlə barışığa, sülhə xidmət edən siyasət yürütməlidir.

Nardar BAYRAMLI

Paylaş:

Baxılıb: 520 dəfə