Novruz Məmmədov: Dövlət Departamentinin hesabatı Azərbaycandakı reallığı əks etdirmir

Bakı:

26 °C

38 %

4 m/s

Əlaqə

AZ RU EN

Ana səhifə / Siyasət / Novruz Məmmədov: Dövlət Departamentinin hesabatı Azərbaycandakı reallığı əks etdirmir

Novruz Məmmədov: Dövlət Departamentinin hesabatı Azərbaycandakı reallığı əks etdirmir

01.03.2014 [11:53]

Bildiyimiz kimi, ABŞ Dövlət Departamentinin dünyada insan haqlarının vəziyyətinə dair illik hesabatında Azərbaycanla bağlı növbəti dəfə qərəzli mövqe nümayiş etdirilib. Öz növbəsində sözügedən hesabata münasibət bildirən Azərbaycan Prezidenti Administrasiyasının (PA) rəhbərinin müavini, Xarici əlaqələr şöbəsinin müdiri Novruz Məmmədovun sözlərinə görə, həmin hesabatda bütün məsələlərə yanaşmada ifrat qərəzlilik müşahidə olunur: “Hesabat qeyri-obyektivdir və Azərbaycandakı reallığı əks etdirmir. Bu hesabatı biz, əlbəttə, qəbul etmirik. Çox təəssüf ki, ABŞ Azərbaycana qərəzli mövqeyini hər zaman olduğu kimi, fürsət düşəndə nümayiş etdirir. İnsan hüquqları, fikir və ifadə azadlığı, sərbəst toplaşma azadlığı və digər məsələlərlə bağlı göstərilən mövqe Azərbaycandakı reallıqdan tam fərqlidir”.
N.Məmmədov bildirib ki, ABŞ Dövlət Departamentinin Azərbaycana qarşı belə qərəzli mövqeyi tez-tez müşahidə edilir: “Əgər belə olmasaydı, elə bu günlərdə 22 il əvvəl bir gecədə qətlə yetirilmiş 613 günahsız uşaq, qadın, qocanın hüquqları barədə verilən suala Dövlət Departamentinin sözçüsü xanım Psaki heç olmazsa, deməyə bir söz tapardı, jurnalisti sualını təkrar edərək “niyə mövqe bildirmirsiniz” deyə irad tutmağa məcbur etməzdi. Yaxud, 20 ildən artıq bir müddətdə ərazilərimizi işğal altında saxlayan tərəfə işğalçı deyilməsinin təhqir hesab edilməsi ilə bağlı onun bəyanatını necə başa düşmək lazımdır? Budur ABŞ-ın ədalətli mövqeyi? Amma göründüyü kimi, budəfəki hesabatda onu tərtib edən “dostlar” Azərbaycandakı real prosesləri yox, özlərinin qərəzli mövqelərini nümayiş etdirmək üçün dəridən-qabıqdan çıxıblar”.
Şöbə müdiri əlavə edib ki, xarici amillərdən asılı olmayaraq, Azərbaycan öz inkişaf yoluna davam edir: “Bildiyimiz kimi, bu gün dünyanın 50-dən çox ölkəsi müxtəlif səbəblər üzündən gərginlik yaşayır. 10-a yaxın ölkədə müxtəlif xarakterli münaqişə və müharibə gedir. Bu proseslər isə heç də özbaşına olmur. Azərbaycan belə bir beynəlxalq şəraitdə 20 ildir ki, sabitlik və dinamik inkişaf adasına çevrilib. Bunu hamı əla görür və qiymətləndirir. Bunu elə 2013-cü ilin oktyabrında keçirilən prezident seçkiləri də nümayiş etdirdi. Əminəm ki, Azərbaycan xalqı öz tarixi uğurlarını, 20 il ərzində nail olduğu sabitliyi, dinamik inkişafı bundan sonra da qoruyub saxlayacaqdır”.
Hülya

Paylaş:

Baxılıb: 1056 dəfə