27 Sentyabr – Anım Günü: Şəhidlərimizin əziz xatirəsi daim yaşayacaq

Bakı:

21 °C

64 %

3 m/s

Əlaqə

AZ RU EN

Ana səhifə / YAP xəbərləri / 27 Sentyabr – Anım Günü: Şəhidlərimizin əziz xatirəsi daim yaşayacaq

27 Sentyabr – Anım Günü: Şəhidlərimizin əziz xatirəsi daim yaşayacaq

26.09.2026 [20:25]

27 Sentyabr – Anım Günü Azərbaycanın müstəqilliyi, ərazi bütövlüyü və suverenliyi uğrunda canından keçmiş şəhidlərimizin əziz xatirəsinə dərin ehtiramın ifadəsidir. Bu tarix Vətən müharibəsinin başlandığı gün kimi xalqımızın yaddaşında xüsusi yer tutur. Azərbaycan Prezidenti İlham Əliyevin 2 dekabr 2020-ci il tarixli Sərəncamı ilə hər il 27 sentyabrın Anım Günü kimi qeyd edilməsi şəhidlərimizin xatirəsinin əbədiləşdirilməsinə dövlət səviyyəsində verilən böyük önəmin göstəricisidir.
Azərbaycan uzun illər Ermənistanın işğalı ilə üz-üzə qalmış, xarici havadarları tərəfindən silahlandırılan Ermənistan silahlı qüvvələri ölkəmizin beynəlxalq səviyyədə tanınmış ərazilərinin təxminən 20 faizini işğal etmişdi. Lakin Azərbaycan xalqı bu işğalla heç zaman barışmadı. Ölkəmiz bütün imkanlarını səfərbər edərək güclü ordu qurdu, iqtisadi və hərbi potensialını artırdı və tarixi ədalətin bərpası üçün qətiyyətli mövqe nümayiş etdirdi.
2020-ci il sentyabrın 27-də başlayan Vətən müharibəsi Azərbaycan Ordusunun tarixi Zəfəri ilə başa çatdı. 44 gün davam edən müharibə nəticəsində ölkəmizin ərazi bütövlüyü bərpa edildi, işğal altında olan torpaqlarımız azad olundu və Azərbaycan xalqının milli iradəsi, həmrəyliyi və dövlətçilik əzmi bütün dünyaya nümayiş etdirildi.
Bu Qələbənin əsasını şəhidlərimizin canı və qəhrəmanlığı təşkil edir. Prezident İlham Əliyevin Anım Günü ilə bağlı çıxışlarında vurğuladığı kimi, Birinci və İkinci Qarabağ müharibələrinin şəhidlərinin xatirəsi xalqımızın qəlbində əbədi yaşayacaq. Onların qəhrəmanlığı, şücaəti və fədakarlığı Azərbaycanın müasir tarixinin ən şərəfli səhifələrindən birinə çevrilib.
Anım Günü həm də şəhid ailələrinə və Vətən müharibəsi iştirakçılarına dövlət qayğısının ifadə olunduğu mühüm gündür. Şəhidlərimizin əziz xatirəsinin daim yaşadılması, onların adlarının gələcək nəsillərə çatdırılması dövlət siyasətinin mühüm istiqamətlərindəndir.
2021-ci il sentyabrın 27-də Anım Günü münasibətilə Bakıda Vətən müharibəsində həlak olmuş hərbçilərin, şəhidlərin, mülki qurbanların və itkin düşmüş soydaşlarımızın xatirəsinə ehtiram əlaməti olaraq yürüş keçirildi. Prezident İlham Əliyev və birinci xanım Mehriban Əliyeva yürüşdə iştirak etdilər. Həmin gün ölkə üzrə saat 12:00-da şəhidlərin xatirəsi bir dəqiqəlik sükutla yad edildi.
Şəhidlərimizin xatirəsinin əbədiləşdirilməsi istiqamətində həyata keçirilən mühüm layihələrdən biri Bakıdakı Zəfər Parkı və Zəfər Muzeyidir. Prezident İlham Əliyevin 2020-ci il 3 dekabr tarixli Sərəncamı əsasında yaradılan kompleks Azərbaycanın Vətən müharibəsində qazandığı tarixi Zəfərin və şəhidlərimizin qəhrəmanlığının gələcək nəsillərə çatdırılması məqsədi daşıyır.
2024-cü il 8 noyabrda Zəfər Parkının açılışı keçirilib. Parkın memarlığında 44 günlük Vətən müharibəsinin rəmzləri xüsusi yer tutur. Zəfər Muzeyi isə Azərbaycanın tarixi Qələbəsinin, xalqımızın həmrəyliyinin və şəhidlərimizin qəhrəmanlığının yaddaşda yaşadılmasına xidmət edir. Muzeydə Vətən müharibəsində Azərbaycanın ərazi bütövlüyü uğrunda canından keçmiş hərbçilərin adlarının əbədiləşdirilməsi nəzərdə tutulub.
27 Sentyabr – Anım Günü bizə bir daha xatırladır ki, Azərbaycanın bugünkü Zəfəri böyük fədakarlıqlar hesabına qazanılıb. Şəhidlərimizin əziz xatirəsi xalqımızın yaddaşında daim yaşayacaq, onların qəhrəmanlığı isə gələcək nəsillər üçün Vətənə sədaqətin və milli iradənin parlaq nümunəsi olacaq.
Allah bütün şəhidlərimizə rəhmət eləsin!

Nofəl Atakişiyev,

YAP İmişli rayon təşkilatı Aparatının məsləhətçisi

Paylaş:

Baxılıb: 166 dəfə