Azərbaycanın Göyçay və İtaliyanın Valmontone şəhərlərinin qardaşlaşması haqqında sənəd imzalanıb

Bakı:

14 °C

82 %

1 m/s

Əlaqə

AZ RU EN

Ana səhifə / Siyasət / Azərbaycanın Göyçay və İtaliyanın Valmontone şəhərlərinin qardaşlaşması haqqında sənəd imzalanıb

Azərbaycanın Göyçay və İtaliyanın Valmontone şəhərlərinin qardaşlaşması haqqında sənəd imzalanıb

04.03.2014 [09:40]

Göyçay rayon İcra Hakimiyyətinin başçısı Mənsur Məmmədovun başçılıq etdiyi nümayəndə heyətinin İtaliyaya səfəri çərçivəsində Valmontonenin “Palazzo Doria” sarayında bu şəhərin meri Alberto Latini ilə görüş keçirilib. Azərbaycanın İtaliyadakı səfiri Vaqif Sadıqovun da iştirak etdiyi görüşdə qarşılıqlı maraq doğuran bir sıra məsələlər ətrafında fikir mübadiləsi aparılıb.
A.Latini ötən il Valmontonedən olan nümayəndə heyətinin Göyçaya səfərini xatırladıb və bildirib ki, Azərbaycanda keçirilən görüşlər iki şəhər arasında əməkdaşlıq istiqamətlərinin və layihələrin təsbit edilməsində mühüm addım olub. A.Latini Göyçayın Valmontone üçün Şərqə, Valmontonenin isə Göyçay üçün Avropaya açılan qapı rolunu oynayacağını deyib.
M.Məmmədov Göyçay ilə Valmontone arasında iqtisadiyyat, kənd təsərrüfatı, təhsil, mədəniyyət və digər sahələrdə davamlı və faydalı əlaqələrin yaradılmasının əhəmiyyətini diqqətə çatdırıb. Qeyd edib ki, bu cür tədbirlərin keçirilməsi xalqlarımızın daha da yaxınlaşmasına, oxşar dəyərləri paylaşmasına geniş imkan yaradır.
Göyçayın xüsusən qeyri-adi dada malik narı ilə məşhur olduğunu deyən M.Məmmədov bölgədə son illər narçılıq təsərrüfatlarının inkişaf etdiyini vurğulayıb. Bildirib ki, Göyçayda hər il ənənəvi Nar bayramı keçirilir və gələcəkdə bu cür maraqlı bir festivalın İtaliyanın şəhərləri ilə birgə təşkil edilməsi maraqlı olardı.
Səfir V.Sadıqov Azərbaycan-İtaliya əlaqələrinin tarixindən danışıb, tərəflər arasında təkcə iqtisadi sahədə deyil, təhsil, mədəniyyət, humanitar və digər istiqamətlərdə də münasibətlərin yüksələn xətlə inkişaf etdiyini deyib. Ölkə rəsmilərinin qarşılıqlı səfərlərinin və müxtəlif sahələr üzrə ikitərəfli sənədlər imzalanmasının əlaqələrin inkişafına töhfə verdiyini vurğulayan səfir regionlarımız arasında da münasibətlərin genişləndiyini təqdir edib.
Sonra Valmontone və Göyçay şəhərlərinin qardaşlaşması haqqında sənəd imzalanıb.
Sənədi M.Məmmədov və A.Latini imzalayıblar. Müqavilədə iki şəhər arasında bütün səviyyələrdə, o cümlədən təhsil, iqtisadi-sosial, mədəniyyət, incəsənət, idman kimi sahələrdə əlaqələrin genişləndirilməsi, məlumat və təcrübə mübadilələrinin təşviq edilməsi nəzərdə tutulur. Sənəddə Göyçay və Valmontonenin coğrafi baxımdan bir-birindən uzaqda yerləşməsinə baxmayaraq, ortaq dəyər və maraqlara malik olduğu xüsusi vurğulanır.
Qeyd edək ki, İtaliya və Azərbaycan şəhərləri arasında əlaqələrin genişləndirilməsi baxımından mühüm önəm kəsb edən qardaşlaşma münasibətlərinin qurulması ənənə halını alıb. Artıq Çerveteri ilə Lənkəran, Valmontone ilə Göyçay, Pozitano ilə Naftalan şəhərlərinin qardaşlaşmasına dair müvafiq əməkdaşlıq sənədləri imzalanıb. Həmçinin Turin ilə Gəncə, Genuya ilə Sumqayıt, Florensiya ilə Şəki, Bormio ilə Qax şəhərlərinin qardaşlaşması ilə bağlı razılıq əldə olunub. Eyni zamanda Genuya ilə Sumqayıt arasında əməkdaşlıq sənədi imzalanıb.
Səfər çərçivəsində Azərbaycan nümayəndə heyətinin Valmontonedəki bir sıra sosial, kənd təsərrüfatı və sənaye obyektləri ilə tanışlığı da nəzərdə tutulur.
Səfər martın 3-də başa çatacaq.

Paylaş:

Baxılıb: 896 dəfə